બોલિવૂડ અને પંજાબી મ્યુઝિક ઇન્ડસ્ટ્રીના જાણીતા સિંગર બી પ્રાકને લોરેન્સ ગેંગ તરફથી જાનથી મારી નાખવાની ધમકી મળી છે. ગેંગસ્ટર આરઝુ બિશ્નોઈએ બી પ્રાકની નજીકની વ્યક્તિ દિલનૂર બબલુને વોઈસ મેસેજ મોકલી ₹10 કરોડની ખંડણી માગી છે. પૈસા ચૂકવવા માટે એક અઠવાડિયાનો સમય આપવામાં આવ્યો છે.
ધમકીભર્યા વોઈસ મેસેજમાં કહેવામાં આવ્યું હતું કે, “જો પૈસા નહીં મળે અને અમારી સાથે મળીને નહીં ચાલ્યા તો ભલે ગમે તે દેશમાં જશો, માટીમાં ભેળવી દઈશું.” આ બાદ દિલનૂર બબલુએ મોહાલી SSPને લેખિત ફરિયાદ આપી છે.
મોહાલી પોલીસમાં ફરિયાદ નોંધાઈ
દિલનૂર બબલુએ ફરિયાદમાં જણાવ્યું કે ધમકીના કારણે તે ઘરની બહાર નીકળી શકતા નથી અને તેમને તેમજ બી પ્રાકને જાનનો ખતરો છે. તેમની ફરિયાદના આધારે મોહાલી સ્થિત પંજાબ પોલીસની સાયબર ક્રાઈમ બ્રાન્ચે તપાસ શરૂ કરી છે. પોલીસ બી પ્રાકની સુરક્ષાને લઈને પણ એલર્ટ પર છે.
કૉલ અને વોઈસ મેસેજથી ખંડણીની માંગ
ફરિયાદ અનુસાર, 5 જાન્યુઆરીએ વિદેશી નંબર પરથી દિલનૂરને બે વાર કૉલ આવ્યા હતા, જે તેમણે ઉપાડ્યા નહોતા. ત્યારબાદ 6 જાન્યુઆરીએ આરઝુ બિશ્નોઈનો કૉલ આવ્યો, જે તેમણે શંકાના કારણે કાપી નાખ્યો. પછી વ્હોટ્સએપ પર વોઈસ મેસેજ મોકલી ₹10 કરોડની ખંડણી માગવામાં આવી હતી.
મેસેજમાં સ્પષ્ટ ધમકી આપવામાં આવી કે જો નક્કી સમયમર્યાદામાં પૈસા નહીં મળે તો મોટું નુકસાન કરવામાં આવશે અને બી પ્રાકને જીવતો નહીં છોડવામાં આવે.
દિલનૂરનું નિવેદન
દિલનૂરે જણાવ્યું કે, “આ ધમકી બાદ હું ઘરની બહાર નીકળી શકતો નથી. હું અને બી પ્રાક શૂટિંગ અને શોઝ માટે સતત મુસાફરી કરીએ છીએ, તેથી અમારા જીવને ગંભીર ખતરો છે. પોલીસ અમારી સુરક્ષા સુનિશ્ચિત કરે.”
બી પ્રાક વિશે સંક્ષિપ્ત જાણકારી
બી પ્રાકનો જન્મ 7 ફેબ્રુઆરી 1986ના રોજ ચંદીગઢમાં થયો હતો. તેમના પિતા વરિન્દર બચ્ચન જાણીતા સંગીતકાર હતા. 2017માં ગીતકાર જાનીના ગીત ‘મન ભર્યા’થી તેમણે સિંગિંગમાં ડેબ્યુ કર્યું અને રાતોરાત સ્ટાર બની ગયા. ‘તેરી મિટ્ટી મેં મિલ જાવાં’ ગીતે તેમને દેશભરમાં ઓળખ અપાવી.
બી પ્રાકે ગુજરાતી ફિલ્મ ‘સમંદર’ માટે ‘તું મારો દરિયો’ ગીત પણ ગાયું છે.
જીવનમાં સંઘર્ષ અને સફળતા
બી પ્રાકે પોતાના જીવનમાં અનેક દુઃખદ ક્ષણો પણ જોઈ છે. 2021-22 દરમિયાન તેમણે પોતાના કાકા, પિતા અને નવજાત બાળકને ગુમાવ્યા. તેમ છતાં, તેમણે સંગીતના માધ્યમથી ફરી પોતાનું જીવન ગોઠવ્યું.
તાજેતરમાં તેઓ બીજા દીકરાના પિતા બન્યા છે. 1 ડિસેમ્બર 2025ના રોજ જન્મેલા તેમના પુત્રનું નામ દ્વિજ બચ્ચન રાખવામાં આવ્યું છે, જેનો અર્થ ‘ફરી જન્મ’ થાય છે.
પોલીસ તપાસ ચાલુ
હાલ મોહાલી પોલીસ સમગ્ર મામલાની ગંભીરતાથી તપાસ કરી રહી છે. લોરેન્સ ગેંગના સંડોવણી અંગે ટેક્નિકલ પુરાવા એકત્રિત કરવામાં આવી રહ્યા છે અને બી પ્રાકની સુરક્ષા વધારવામાં આવી છે.
આ કેસે ફરી એકવાર ફિલ્મ અને મ્યુઝિક ઇન્ડસ્ટ્રીમાં સુરક્ષા અંગે ચિંતા ઊભી કરી છે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
