ગુજરાતમાં અને દેશમાં ફરી એકવાર ડ્રગ્સ ઘુસાડવા માટે કચ્છના દરિયાઈ માર્ગનો ઉપયોગ થતો હોવાનું સામે આવ્યું છે. બાતમીના આધારે ગુજરાત ATS, ભારતીય કોસ્ટગાર્ડ અને સ્થાનિક SOGની ટીમે કચ્છના દરિયામાં સંયુક્ત ઓપરેશન હાથ ધરીને અંદાજે 200 કરોડ રૂપિયાની કિંમતનું ડ્રગ્સ જપ્ત કર્યું છે. આ કાર્યવાહી દરમિયાન કેટલાક શકમંદોની પણ અટકાયત કરવામાં આવી હોવાનું જાણવા મળ્યું છે.
પ્રાથમિક માહિતી મુજબ, ડ્રગ્સનો આ મોટો જથ્થો યુરોપથી દરિયાઈ માર્ગે ગુજરાત સુધી લાવવામાં આવી રહ્યો હતો. સુરક્ષા એજન્સીઓને અગાઉથી મળેલી ચોક્કસ બાતમીના આધારે દરિયામાં શંકાસ્પદ જહાજ પર નજર રાખવામાં આવી હતી. ત્યારબાદ ATS અને કોસ્ટગાર્ડે ઓપરેશન ચલાવી જહાજને રોકી તપાસ કરતા મોટી માત્રામાં નશીલા પદાર્થો મળી આવ્યા હતા.
સૂત્રોના જણાવ્યા અનુસાર, જપ્ત કરાયેલ ડ્રગ્સની આંતરરાષ્ટ્રીય બજારમાં કિંમત અંદાજે 200 કરોડ રૂપિયા જેટલી થાય છે. હાલ તપાસ એ દિશામાં ચાલી રહી છે કે આ જથ્થો કોના દ્વારા મોકલવામાં આવ્યો હતો અને ગુજરાત અથવા ભારતના કયા નેટવર્ક સુધી પહોંચાડવાનો હતો.
આ કેસમાં ઝડપાયેલા શકમંદોની પૂછપરછ શરૂ કરવામાં આવી છે. તપાસ એજન્સીઓ હવે ડ્રગ્સ સપ્લાય ચેઇન, આંતરરાષ્ટ્રીય કનેક્શન અને સ્થાનિક નેટવર્ક અંગે માહિતી એકત્રિત કરી રહી છે. કચ્છનો દરિયાઈ વિસ્તાર અગાઉ પણ અનેક વખત ડ્રગ્સ સ્મગલિંગ માટે ઉપયોગમાં લેવાયો હોવાના કેસો સામે આવી ચૂક્યા છે, જેના કારણે સુરક્ષા એજન્સીઓ વધુ સતર્ક બની છે.
ગુજરાત ATS આ સમગ્ર ઓપરેશન અંગે બપોરે પ્રેસ કોન્ફરન્સ કરીને વધુ વિગતો જાહેર કરે તેવી શક્યતા છે. તેમાં ડ્રગ્સનો પ્રકાર, જથ્થો, જહાજની માહિતી તેમજ ઝડપાયેલા આરોપીઓ અંગે સત્તાવાર ખુલાસો કરવામાં આવી શકે છે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
