ગ્લોબલ માર્કેટમાં આજે એટલે કે 10 માર્ચે ક્રૂડ ઓઇલના ભાવમાં નોંધપાત્ર ઘટાડો નોંધાયો છે. એશિયન માર્કેટમાં શરૂઆતી કારોબાર દરમિયાન બ્રેન્ટ ક્રૂડના ભાવ લગભગ 8.5% ઘટીને પ્રતિ બેરલ $92.50 સુધી આવી ગયા. ગઈકાલે બ્રેન્ટ ક્રૂડનો ભાવ લગભગ $115 સુધી પહોંચી ગયો હતો, પરંતુ આજે તેમાં તીવ્ર ઘટાડો નોંધાયો છે.
અમેરિકી ક્રૂડ ઓઇલ (WTI)ના ભાવમાં પણ મોટો ઘટાડો જોવા મળ્યો છે. WTI લગભગ 9% ઘટીને $88.60 પ્રતિ બેરલના સ્તરે આવી ગયું છે. વૈશ્વિક બજારમાં આ ઘટાડાનું મુખ્ય કારણ અમેરિકાના પૂર્વ રાષ્ટ્રપતિ ડોનાલ્ડ ટ્રમ્પનું તાજેતરનું નિવેદન માનવામાં આવી રહ્યું છે.
11 દિવસમાં ક્રૂડ ઓઇલના ભાવમાં ભારે ઉતાર-ચઢાવ
| તારીખ | ક્રૂડ ઓઇલનો ભાવ |
|---|---|
| 28 ફેબ્રુઆરી | $93 પ્રતિ બેરલ |
| 9 માર્ચ | $118 પ્રતિ બેરલ |
| 10 માર્ચ | $93 પ્રતિ બેરલ |
ટ્રમ્પના નિવેદનથી બજારમાં રાહત
સોમવારે ડોનાલ્ડ ટ્રમ્પે નિવેદન આપ્યું હતું કે ચાલી રહેલું યુદ્ધ “ખૂબ જ જલ્દી સમાપ્ત થઈ જશે”. તેમના આ નિવેદન બાદ વૈશ્વિક સપ્લાય ચેઇન અંગેની અનિશ્ચિતતા થોડોક ઘટી છે. રોકાણકારોમાં વિશ્વાસ વધતા ઓઇલ માર્કેટમાં વેચવાલી વધતા ભાવ નીચે આવ્યા છે. જોકે, હાલના ભાવ હજુ પણ યુદ્ધ શરૂ થાય તે પહેલાંના સ્તર કરતાં લગભગ 30% વધુ છે.
એશિયન શેરબજારોમાં તેજી
ક્રૂડ ઓઇલના ભાવમાં ઘટાડાની સકારાત્મક અસર એશિયન શેરબજારો પર પણ જોવા મળી છે. મંગળવારે સવારે જાપાનનો બેન્ચમાર્ક ઇન્ડેક્સ નિક્કેઈ 225 લગભગ 2.8%ના વધારા સાથે કારોબાર કરી રહ્યો હતો.
આ ઉપરાંત દક્ષિણ કોરિયાનો કોસ્પી ઇન્ડેક્સ 5%થી વધુ ઉછળ્યો છે. નિષ્ણાતો અનુસાર સસ્તું તેલ એશિયન અર્થતંત્ર માટે બૂસ્ટર સાબિત થાય છે કારણ કે આ વિસ્તારમાં આવેલા મોટા ભાગના દેશો ખાડી દેશોમાંથી મોટા પ્રમાણમાં તેલ આયાત કરે છે.
ભારત જેવા દેશોને મળશે રાહત
તેલના ભાવમાં ઘટાડો ભારત, ચીન અને જાપાન જેવા દેશો માટે રાહતકારક બની શકે છે. આ દેશો ઊર્જાની જરૂરિયાત માટે મોટા પ્રમાણમાં મિડલ ઈસ્ટ પર નિર્ભર છે. ક્રૂડ ઓઇલ સસ્તુ થતાં આ દેશોનું ઇમ્પોર્ટ બિલ ઘટશે અને મોંઘવારીને કાબૂમાં રાખવામાં પણ મદદ મળશે.
યુદ્ધના કારણે કિંમતોમાં થયો હતો મોટો વધારો
છેલ્લા કેટલાક સમયથી ચાલી રહેલા સંઘર્ષના કારણે વૈશ્વિક બજારમાં ક્રૂડ ઓઇલના સપ્લાયને લઈને અનિશ્ચિતતા વધી હતી. તેના કારણે કિંમતોમાં સતત વધારો નોંધાયો હતો અને ભાવ લગભગ $120 પ્રતિ બેરલ સુધી પહોંચી ગયા હતા. હવે યુદ્ધ સમાપ્ત થવાની આશા વધતા બજારમાં થોડો સ્થિરતા જોવા મળી રહી છે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
