વેનેઝુએલાના રાષ્ટ્રપતિ નિકોલસ માદુરોની ધરપકડ બાદ વૈશ્વિક રાજનીતિમાં તણાવ વધી રહ્યો છે. ચીને અમેરિકાને કડક શબ્દોમાં ચેતવણી આપતાં વેનેઝુએલાના રાષ્ટ્રપતિ નિકોલસ માદુરો અને તેમની પત્ની સીલિયા ફ્લોરેસને તાત્કાલિક મુક્ત કરવાની માંગ કરી છે. હાલ બંને અમેરિકાની કસ્ટડીમાં છે.
ચીની વિદેશ મંત્રાલયે રવિવારે જાહેર કરેલા સત્તાવાર નિવેદનમાં કહ્યું કે કોઈ દેશના રાષ્ટ્રપતિને આ રીતે પકડીને પોતાના દેશમાં લઈ જવું સંપૂર્ણપણે ખોટું છે અને તે આંતરરાષ્ટ્રીય કાયદાનું ઉલ્લંઘન છે. ચીને સ્પષ્ટ જણાવ્યું કે વેનેઝુએલાના સંકટનો ઉકેલ સૈન્ય કાર્યવાહી દ્વારા નહીં પરંતુ સંવાદ અને વાતચીત દ્વારા થવો જોઈએ. ચીને આ પહેલા પણ અમેરિકાની કાર્યવાહી પર આકરી ટીકા કરી હતી અને તેને ખતરનાક પરંપરા ગણાવી હતી.
આ મુદ્દે ઉત્તર કોરિયાએ પણ અમેરિકાની સામે તીખી પ્રતિક્રિયા આપી છે. ઉત્તર કોરિયાના વિદેશ મંત્રાલયે નિવેદનમાં કહ્યું છે કે વેનેઝુએલામાં અમેરિકાની કાર્યવાહી ‘ગુંડાગર્દી’ સમાન છે. ઉત્તર કોરિયાનું કહેવું છે કે આ પગલું કોઈપણ દેશની આઝાદી અને સંપ્રભુતા પર કરવામાં આવેલો સૌથી ગંભીર હુમલો છે. તેમણે આરોપ લગાવ્યો કે અમેરિકા પોતાની શક્તિના બળે અન્ય દેશોના આંતરિક મામલાઓમાં દખલ આપી રહ્યું છે.
ઉલ્લેખનીય છે કે 2 જાન્યુઆરીની રાત્રે અમેરિકી સેનાએ વેનેઝુએલા પર સૈન્ય હુમલો કર્યો હતો. આ કાર્યવાહી દરમિયાન રાષ્ટ્રપતિ નિકોલસ માદુરો અને તેમની પત્ની સીલિયા ફ્લોરેસને રાજધાની કારાકાસમાંથી પકડી લેવામાં આવ્યા હતા. બાદમાં બંનેને અમેરિકા લઈ જવાયા, જ્યાં તેમને ન્યૂયોર્કના ડિટેન્શન સેન્ટરમાં રાખવામાં આવ્યા છે.
અમેરિકી અધિકારીઓ અનુસાર, માદુરો અને તેમની પત્ની સામે હથિયાર અને ડ્રગ્સ સાથે જોડાયેલા કેસોમાં કાર્યવાહી કરવામાં આવશે. જોકે, ચીન અને ઉત્તર કોરિયા સહિત કેટલાક દેશો આ ધરપકડને ગેરકાયદેસર ગણાવી રહ્યા છે અને તેને આંતરરાષ્ટ્રીય કાયદા તથા રાષ્ટ્રની સંપ્રભુતાનો ભંગ કહી રહ્યા છે.
માદુરોની ધરપકડ બાદ વેનેઝુએલા મુદ્દે વૈશ્વિક સ્તરે વિરોધ અને સમર્થન બંને તેજ બન્યા છે. હવે સમગ્ર દુનિયાની નજર એ પર છે કે અમેરિકા આ દબાણ વચ્ચે શું નિર્ણય લે છે અને આ રાજકીય સંકટ કઈ દિશામાં આગળ વધે છે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
