બોર્ડ પરીક્ષાની તૈયારી સરળ, 40 વિષય માટે ડિજિટલ પ્રશ્નબેંક લોન્ચ, એક ક્લિકમાં મળશે પ્રશ્નબેંક

અમદાવાદ શહેર જિલ્લા શિક્ષણાધિકારી કચેરી દ્વારા બોર્ડની પરીક્ષાની તૈયારી કરતા વિદ્યાર્થીઓ માટે એક અનોખી અને ઉપયોગી પહેલ સતત છેલ્લા ચાર વર્ષથી કરવામાં આવી રહી છે. ધોરણ 10 અને ધોરણ 12 (વિજ્ઞાન તથા સામાન્ય પ્રવાહ)ના વિદ્યાર્થીઓ બોર્ડની પરીક્ષામાં વધુ સારી તૈયારી કરી શકે તે હેતુથી આ વર્ષે પણ ડિજિટલ પ્રશ્નબેંક અને મોડલ પ્રશ્નપત્રો લોન્ચ કરવામાં આવ્યા છે.

આ પહેલ અંતર્ગત અનુભવી વિષય નિષ્ણાતો દ્વારા તૈયાર કરાયેલા ગુજરાતી અને અંગ્રેજી માધ્યમના કુલ 80 જેટલા ડિજિટલ પ્રશ્નબેંક અને મોડલ પેપર્સ વિદ્યાર્થીઓ માટે ઉપલબ્ધ કરાયા છે. હવે વિદ્યાર્થીઓ માત્ર એક જ ક્લિકમાં અનુભવી શિક્ષકો દ્વારા તૈયાર કરાયેલ ગુણવત્તાયુક્ત પ્રશ્નબેંક મેળવી શકશે.

રાજ્યભરના વિદ્યાર્થીઓને એક ક્લિકમાં લાભ

અમદાવાદ શહેર જિલ્લા શિક્ષણાધિકારી કચેરી દ્વારા બોર્ડના વિદ્યાર્થીઓના હિતમાં શરૂ કરાયેલી આ પહેલ સતત ચોથા વર્ષે અમલમાં આવી છે. ડિજિટલ પ્રશ્નબેંક સાથે દરેક વિષય માટે બે મોડલ પ્રશ્નપત્રો પણ તૈયાર કરવામાં આવ્યા છે. આ પ્રશ્નબેંકનો લાભ માત્ર અમદાવાદ નહીં પરંતુ સમગ્ર રાજ્યમાં બોર્ડની તૈયારી કરતા વિદ્યાર્થીઓ લઈ શકશે. એક જ ક્લિક દ્વારા તમામ વિષયોની પ્રશ્નબેંક ડાઉનલોડ કરી શકાશે.

ધોરણ 10 અને 12ના વિદ્યાર્થીઓ માટે ઉપયોગી

આ ડિજિટલ પ્રશ્નબેંક ધોરણ 10 તથા ધોરણ 12ના વિજ્ઞાન અને સામાન્ય પ્રવાહના વિદ્યાર્થીઓ માટે અત્યંત ઉપયોગી સાબિત થશે. પ્રશ્નબેંકમાં ધોરણ 10ના મુખ્ય 6 વિષયો, ધોરણ 12 વિજ્ઞાન પ્રવાહના 6 વિષયો અને ધોરણ 12 સામાન્ય પ્રવાહના 8 મહત્વના વિષયોનો સમાવેશ કરવામાં આવ્યો છે. આમ કુલ 40 જેટલા વિષયો આવરી લેવામાં આવ્યા છે.

અમદાવાદના અનુભવી શિક્ષકો અને ટેક્નિકલ ટીમની મહેનતથી તૈયાર કરાયેલી આ પ્રશ્નબેંકમાં દરેક વિષય માટે અંદાજે 300 જેટલા મહત્વપૂર્ણ પ્રશ્નો સામેલ છે, જે બોર્ડ પરીક્ષાના પેટર્ન અને અભ્યાસક્રમને ધ્યાનમાં રાખીને તૈયાર કરવામાં આવ્યા છે.

શાળાઓ મારફતે વાલી-વિદ્યાર્થીઓને લિંક

ગયા વર્ષે પણ આ પ્રકારની પ્રશ્નબેંક લોન્ચ કરવામાં આવી હતી, જેના કારણે વિદ્યાર્થીઓને બોર્ડ પરીક્ષામાં નોંધપાત્ર ફાયદો થયો હતો. ઘણા પ્રશ્નો સીધા પરીક્ષામાં પૂછાયા હતા અને પરિણામમાં પણ સુધારો જોવા મળ્યો હતો. આ વર્ષે પણ પ્રશ્નબેંકની લિંક તમામ શાળાઓને મોકલી આપવામાં આવી છે, જેથી શાળાઓ દ્વારા વાલી અને વિદ્યાર્થીઓ સુધી સરળતાથી પહોંચાડી શકાય.

મોબાઈલથી ગમે ત્યાંથી અભ્યાસ શક્ય

વિદ્યાર્થીઓ મોબાઈલ દ્વારા ગમે ત્યાંથી આ ડિજિટલ મટીરિયલ ડાઉનલોડ કરી શકશે. લિંક પર ક્લિક કરવાથી અથવા QR કોડ સ્કેન કરવાથી પોર્ટલ સીધું ખુલશે. અહીં વિદ્યાર્થીઓ પોતાની પસંદગી મુજબ ગુજરાતી કે અંગ્રેજી માધ્યમ, ધોરણ અને વિષય પસંદ કરી અભ્યાસ સામગ્રી મેળવી શકશે. આ પદ્ધતિ એટલી સરળ બનાવવામાં આવી છે કે અંતરિયાળ વિસ્તારનો વિદ્યાર્થી પણ સરળતાથી ડિજિટલ માધ્યમથી અભ્યાસ કરી શકે.

પરીક્ષા માટે આત્મવિશ્વાસ વધારવાનો પ્રયાસ: DEO

અમદાવાદ શહેર જિલ્લા શિક્ષણાધિકારીએ જણાવ્યું હતું કે અમદાવાદના અનુભવી શિક્ષકોના સમયદાન અને મહેનતથી સતત ચોથા વર્ષે આ પ્રશ્નબેંક તૈયાર કરવામાં આવી છે. વાલીઓ અને વિદ્યાર્થીઓની માંગને ધ્યાનમાં રાખીને આ પહેલ કરવામાં આવી છે. વિદ્યાર્થીઓમાં પરીક્ષા માટે આત્મવિશ્વાસ વધે અને પરિણામ વધુ સારું આવે એ અમારો મુખ્ય ઉદ્દેશ છે. ગયા વર્ષોની જેમ આ વર્ષે પણ આ પ્રશ્નબેંક વિદ્યાર્થીઓ માટે અત્યંત લાભદાયક સાબિત થશે એવી આશા વ્યક્ત કરવામાં આવી છે.