અબુ ધાબીથી અમદાવાદ આવેલી Air Arabiaની ફ્લાઇટ નંબર 3L 111માં મુસાફરી કરીને આવેલા શાહરૂખ નામના પેસેન્જરના શરીરમાંથી 21 લાખથી વધુ કિંમતની સોનાની કેપ્સ્યુલ કસ્ટમ વિભાગના એર ઇન્ટેલિજન્સ યુનિટ (AIU) દ્વારા જપ્ત કરવામાં આવી છે. કસ્ટમ્સ એક્ટ, 1962 હેઠળ સોનું જપ્ત કરીને વધુ તપાસ શરૂ કરવામાં આવી છે.
પ્રોફાઇલિંગના આધારે અટકાયત
19 ફેબ્રુઆરી 2026ના રોજ અમદાવાદ કસ્ટમ્સના AIU અધિકારીઓએ પ્રોફાઇલિંગના આધારે ભારતીય પાસપોર્ટ ધરાવતા શાહરૂખને એરપોર્ટ પર અટકાવ્યો હતો. પૂછપરછ દરમિયાન તેણે સ્વીકાર્યું કે તેણે સોનાની કેપ્સ્યુલો ગળી પોતાના શરીરમાં છુપાવી હતી.
કોર્ટના આદેશ બાદ સિવિલ હોસ્પિટલમાં દાખલ
શરીરમાં છુપાયેલા પદાર્થોને બહાર કાઢવા માટે તેને એ જ દિવસે અમદાવાદના ચીફ જ્યુડિશિયલ મેજિસ્ટ્રેટના આદેશથી Ahmedabad Civil Hospital ખાતે દાખલ કરવામાં આવ્યો હતો. ડૉક્ટરોની દેખરેખ હેઠળ મેડિકલ પ્રક્રિયા હાથ ધરવામાં આવી.
ટોઇલેટ દરમિયાન બહાર આવી 3 સોનાની કેપ્સ્યુલ
સિવિલ હોસ્પિટલમાં મળ પસાર કરાવતી વખતે મુસાફરના શરીરમાંથી પીળા રંગની 3 નળાકાર કેપ્સ્યુલ અને 1 ગોળાકાર સ્ટીલ કલરનો બોલ બહાર આવ્યો હતો. 21 ફેબ્રુઆરીએ હોસ્પિટલ દ્વારા મેડિકલ રિપોર્ટ આપવામાં આવ્યો અને ત્યારબાદ મુસાફરને ડિસ્ચાર્જ કરવામાં આવ્યો.
135 ગ્રામ 24 કેરેટ સોનું
જપ્ત કરાયેલા માલના મૂલ્યાંકન મુજબ 3 નળાકાર કેપ્સ્યુલમાંથી કુલ 135.200 ગ્રામ વજનનું 999 શુદ્ધતા (24 કેરેટ) સોનું મળ્યું હતું. તેની બજાર કિંમત રૂ. 21,89,564 ગણવામાં આવી છે, જ્યારે ટેરિફ મૂલ્ય રૂ. 20,17,801 નોંધાયું છે. ચોથી ગોળાકાર કેપ્સ્યુલ ફેરસ ધાતુની હોવાનું બહાર આવ્યું.
કસ્ટમ્સ એક્ટ હેઠળ કાર્યવાહી
કસ્ટમ્સ વિભાગે જણાવ્યું હતું કે સોનું કસ્ટમ્સને જાહેર કર્યા વિના શરીરમાં છુપાવીને ભારતમાં દાણચોરી કરવાનો પ્રયાસ કરવામાં આવ્યો હતો. તેથી કસ્ટમ્સ એક્ટ, 1962ની જોગવાઈઓ હેઠળ સોનું જપ્ત કરવામાં આવ્યું છે અને કેસમાં વધુ તપાસ ચાલુ છે.
અગાઉનો સમાન કેસ
આ પહેલાં પણ યુગાન્ડાની એક મહિલાના શરીરમાંથી 79 હેરોઇન કેપ્સ્યુલ મળી આવી હતી, જેમાં કોર્ટ દ્વારા આરોપીને 20 વર્ષની સજા ફટકારવામાં આવી હતી. તાજેતરની આ કાર્યવાહી કસ્ટમ વિભાગની સચેત કામગીરી દર્શાવે છે.
કસ્ટમ્સ અધિકારીઓએ જણાવ્યું છે કે આંતરરાષ્ટ્રીય ફ્લાઇટ્સ પર દાણચોરી અટકાવવા માટે ચકાસણી વધુ કડક બનાવવામાં આવી છે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
