PVC આધાર કાર્ડ બનાવવું મોંઘું બન્યું: UIDAIએ ફી ₹25 વધારી, હવે ચૂકવવા પડશે ₹75

ભારતીય વિશિષ્ટ ઓળખ પ્રાધિકરણ (UIDAI) એ આધાર PVC કાર્ડ બનાવવાની ફીમાં વધારો કર્યો છે. અગાઉ જ્યાં આ કાર્ડ માટે ₹50 ફી લેવામાં આવતી હતી, ત્યાં હવે યુઝર્સને ₹75 ચૂકવવા પડશે. UIDAI દ્વારા જાહેર કરાયેલા નવા દરો 1 જાન્યુઆરી 2026થી અમલમાં આવી ગયા છે. પ્રાધિકરણ મુજબ, કાર્ડ બનાવવા માટે ઉપયોગમાં લેવાતા મટિરિયલ, પ્રિન્ટિંગ અને સુરક્ષિત ડિલિવરીના ખર્ચમાં વધારો થતાં આ નિર્ણય લેવામાં આવ્યો છે.

આધાર PVC કાર્ડ એક મજબૂત અને ટકાઉ પ્લાસ્ટિક કાર્ડ છે, જે ATM અથવા ડેબિટ કાર્ડની જેમ સરળતાથી વોલેટમાં રાખી શકાય છે. સામાન્ય કાગળના આધાર લેટર કરતા આ કાર્ડ લાંબા સમય સુધી ખરાબ થતું નથી અને રોજિંદા ઉપયોગ માટે વધુ અનુકૂળ છે.

શું છે આધાર PVC કાર્ડ?

આધાર PVC કાર્ડ આધારનું એક આધુનિક અને ટકાઉ ફોર્મેટ છે. તેનો દેખાવ ક્રેડિટ અથવા ડેબિટ કાર્ડ જેવો હોય છે. પોલિવિનાઇલ ક્લોરાઇડ (PVC) થી બનાવવામાં આવતું આ કાર્ડ પાણી, વળાંક અને સામાન્ય તૂટફૂટ સામે વધુ સુરક્ષિત છે. તેમાં અનેક સુરક્ષા ફીચર્સ આપવામાં આવ્યા છે, જેમ કે સુરક્ષિત QR કોડ, હોલોગ્રામ, ઘોસ્ટ ઈમેજ અને માઇક્રોટેક્સ્ટ, જેનાથી નકલી કાર્ડ બનાવવું મુશ્કેલ બને છે.

આધાર PVC કાર્ડ બનાવવાની સંપૂર્ણ પ્રક્રિયા (ઓનલાઈન)

UIDAI દ્વારા આધાર PVC કાર્ડ માટે ઓનલાઈન અરજી કરવાની સરળ સુવિધા આપવામાં આવી છે. પ્રક્રિયા નીચે મુજબ છે:

• UIDAIની અધિકૃત વેબસાઇટ પર જાઓ
• આધાર નંબર અને કેપ્ચા કોડ દાખલ કરી Send OTP પર ક્લિક કરો
• રજિસ્ટર્ડ મોબાઇલ પર આવેલા OTPને દાખલ કરીને સબમિટ કરો
• હવે Order Aadhaar PVC Card વિકલ્પ પર ક્લિક કરો
• સ્ક્રીન પર દેખાતી તમારી વિગતો ચકાસી Next પર ક્લિક કરો
• પેમેન્ટ વિકલ્પ પસંદ કરો (ડેબિટ/ક્રેડિટ કાર્ડ, નેટ બેન્કિંગ અથવા UPI)
• ₹75ની ફી ચૂકવી પેમેન્ટ પૂર્ણ કરો

પેમેન્ટ સફળ થયા બાદ આધાર PVC કાર્ડની ઓર્ડર પ્રક્રિયા પૂર્ણ થઈ જશે. UIDAI સામાન્ય રીતે 5 દિવસની અંદર કાર્ડ પ્રિન્ટ કરીને ભારતીય ટપાલ વિભાગને સોંપી દે છે. ત્યારબાદ સ્પીડ પોસ્ટ દ્વારા કાર્ડ તમારા ઘરે પહોંચાડવામાં આવે છે.

ઓફલાઇન પણ બનાવી શકો છો આધાર PVC કાર્ડ

જો તમે ઓનલાઈન અરજી કરવા ઇચ્છતા ન હો, તો તમે નજીકના આધાર સેવા કેન્દ્ર પર જઈને પણ નવું આધાર PVC કાર્ડ બનાવી શકો છો. ત્યાં જરૂરી વિગતો આપી અને નિર્ધારિત ફી ચૂકવી તમે સરળતાથી કાર્ડ માટે અરજી કરી શકો છો.

આધારના ઉપલબ્ધ ત્રણ ફોર્મેટ

હાલમાં આધાર કાર્ડ ત્રણ માન્ય ફોર્મેટમાં ઉપલબ્ધ છે – આધાર લેટર, ઈ-આધાર અને આધાર PVC કાર્ડ. UIDAI અનુસાર, બજારમાં ખાનગી રીતે બનાવાતા PVC આધાર કાર્ડ માન્ય નથી. અધિકૃત PVC આધાર કાર્ડ માત્ર UIDAI મારફતે જ બનાવવામાં આવે છે. તાજેતરમાં UIDAIએ આધારને PVC ફોર્મેટમાં રીપ્રિન્ટ કરાવવાની સુવિધા વધુ સરળ બનાવી છે, જેથી નાગરિકોને ટકાઉ અને સરળતાથી લઈ જઈ શકાય તેવું ઓળખપત્ર મળી શકે.