CJPનો દાવો- તમામ પ્રદર્શનકારીઓની FIR પાછી ખેંચાશે: સરકાર સાથે વાતચીત બાદ રાત્રે 1 વાગ્યે વીડિયો જાહેર, સુરક્ષાની પણ ખાતરી

નવી દિલ્હી: કોકરોચ જનતા પાર્ટી (CJP)એ દાવો કર્યો છે કે દેશભરના પ્રદર્શનકારીઓ માટે મોટી રાહત મળવા જઈ રહી છે. પાર્ટીના પ્રવક્તા સૌરવ દાસ અને રત્ના સિંહે સોમવારે મોડી રાત્રે લગભગ 1 વાગ્યે વીડિયો જાહેર કરીને જણાવ્યું કે સરકારના પ્રતિનિધિઓ સાથે થયેલી બેઠક બાદ તમામ પ્રદર્શનકારીઓ સામે નોંધાયેલી FIR પાછી ખેંચવાનો નિર્ણય લેવાયો છે. સાથે જ ભવિષ્યમાં પણ કોઈ પ્રદર્શનકારી સામે કાર્યવાહી નહીં થાય અને તેમની સુરક્ષાની ખાતરી માટે અલગથી નોટિફિકેશન પણ બહાર પાડવામાં આવશે.

સરકારના પ્રતિનિધિઓ સાથે થઈ બેઠક

CJP પ્રવક્તા સૌરવ દાસે જણાવ્યું કે દિલ્હી પોલીસ સહિત સરકારના પ્રતિનિધિઓ તેમની મુલાકાતે આવ્યા હતા. બેઠક દરમિયાન પાર્ટીએ શંકા વ્યક્ત કરી હતી કે સરકાર દ્વારા અગાઉ આપવામાં આવેલા વચનોનું પાલન થશે કે નહીં.

સૌરવે જણાવ્યું કે અધિકારીઓએ તેમને બિહાર સરકારના ગૃહ વિભાગની પ્રેસ રિલીઝ બતાવી, જેમાં સ્પષ્ટ લખવામાં આવ્યું છે કે વિરોધ પ્રદર્શનોમાં સામેલ લોકો સામે નોંધાયેલી તમામ FIR પાછી ખેંચવામાં આવશે અને ભવિષ્યમાં પણ તેમની સામે કોઈ કાયદેસરની કાર્યવાહી કરવામાં આવશે નહીં.

પ્રદર્શનકારીઓની સુરક્ષાની પણ ખાતરી

CJPનું કહેવું છે કે તેમની સૌથી મોટી ચિંતા પ્રદર્શનકારીઓની સુરક્ષા હતી. કેટલાક રાજ્યોમાં પ્રદર્શનકારીઓને નુકસાન પહોંચાડવાની શક્યતા અંગે સરકાર સમક્ષ રજૂઆત કરવામાં આવી હતી.

પાર્ટીના જણાવ્યા અનુસાર સરકારે ખાતરી આપી છે કે તમામ પ્રદર્શનકારીઓ સુરક્ષિત રહેશે અને આ અંગે સત્તાવાર નોટિફિકેશન પણ બહાર પાડવામાં આવશે, જેથી કોઈ પણ રાજ્યમાં તેમની સામે કાર્યવાહી ન થઈ શકે.

FIR નહીં હટે તો ફરી આંદોલનની ચેતવણી

આ પહેલા સોમવારે સાંજે CJPએ પ્રેસ કોન્ફરન્સ કરીને ચેતવણી આપી હતી કે જો પ્રદર્શનકારીઓ સામે નોંધાયેલી FIR પાછી નહીં ખેંચાય તો દેશવ્યાપી આંદોલન ફરી શરૂ કરવામાં આવશે.

પ્રવક્તા આશુતોષ રાંકાએ આરોપ લગાવ્યો હતો કે સરકાર સમજૂતીનું ઉલ્લંઘન કરી રહી છે. પાર્ટીનું કહેવું હતું કે કેન્દ્ર સરકારે કોઈ કાર્યવાહી નહીં કરવાની ખાતરી આપ્યા બાદ જ આંદોલન સમાપ્ત કરવામાં આવ્યું હતું.

આ પ્રેસ કોન્ફરન્સમાં રાજ્યસભાના સાંસદ કપિલ સિબ્બલ પણ હાજર રહ્યા હતા. તેમણે જણાવ્યું હતું કે તેઓ CJPને બહારથી કાનૂની સહાય પૂરી પાડી રહ્યા છે.

બિહાર સરકારે પણ કર્યો મોટો નિર્ણય

બિહાર સરકારે જાહેરાત કરી છે કે 26 જુલાઈ સાંજે 6 વાગ્યા પહેલાં રાજ્યમાં થયેલા તમામ વિરોધ પ્રદર્શનોમાં સામેલ લોકો સામે કોઈ નવી કાયદેસરની કાર્યવાહી કરવામાં આવશે નહીં.

સરકારે જણાવ્યું છે કે વિરોધ પ્રદર્શનો સાથે સંબંધિત તમામ FIR, ગુનાહિત ફરિયાદો અને કારણદર્શક નોટિસ પાછી ખેંચવાની પ્રક્રિયા શરૂ કરવામાં આવશે. ઉપરાંત, ધરપકડ કરાયેલા અથવા અટકાયતમાં લેવાયેલા લોકોને પણ મુક્ત કરવામાં આવશે અને ભવિષ્યમાં તેમની સામે કાર્યવાહી નહીં થાય તેની ખાતરી આપવામાં આવશે.

CJPની લીગલ ટીમ સક્રિય

CJPના કાનૂની સંપર્ક અધિકારી તરીકે રજૂ કરાયેલા રત્ના સિંહે દાવો કર્યો કે પાર્ટીના વકીલો આસામ, પશ્ચિમ બંગાળ અને બિહારમાં અટકાયતમાં લેવાયેલા પ્રદર્શનકારીઓને કાનૂની મદદ આપી રહ્યા છે.

તેમણે આરોપ લગાવ્યો કે કોલકાતામાં 11 લોકોની ધરપકડ કરવામાં આવી છે, જેમાંથી 10 મુસ્લિમ છે. ઉપરાંત બિહારના પટના, સિવાન અને છપરામાં પોલીસની કથિત બર્બરતા તથા હજારો અજાણ્યા લોકો સામે કેસ નોંધવાના આરોપો પણ લગાવ્યા.

આંદોલન બાદ CJPના ત્રણ મોટા નિર્ણય

આંદોલન પૂર્ણ થયા બાદ CJPએ ત્રણ મહત્વપૂર્ણ પહેલની જાહેરાત કરી છે.

• પ્રદર્શન દરમિયાન ઘાયલ થયેલા અને પોલીસ કેસોમાં ફસાયેલા લોકો માટે ફંડ એકત્ર કરવા વેબસાઇટ શરૂ કરવામાં આવશે.
• દેશભરમાં લીગલ એડ સેલ બનાવવામાં આવશે. કપિલ સિબ્બલે કાનૂની સહાય માટે ₹1 કરોડ આપવાની જાહેરાત કરી છે.
• ‘સાક્ષી પોર્ટલ’ લોન્ચ કરવામાં આવશે, જ્યાં લોકો પોલીસ કાર્યવાહીના ફોટા અને વીડિયો અપલોડ કરી શકશે.

દિલ્હી પોલીસનો દાવો- ગંભીર ગુનાઓના આરોપીઓ પણ પ્રદર્શનમાં હતા

બીજી તરફ દિલ્હી પોલીસે ફેસ રિકોગ્નિશન સિસ્ટમ (FCR)ના આધારે તપાસ કરીને દાવો કર્યો છે કે જંતર-મંતર ખાતે વિરોધ પ્રદર્શનમાં સામેલ 2,873 લોકોનું વેરિફિકેશન કરવામાં આવ્યું હતું.

પોલીસના જણાવ્યા મુજબ તેમાંના 989 લોકો સામે હત્યા, લૂંટ, ચોરી, બળાત્કાર, આર્મ્સ એક્ટ, NDPS એક્ટ, સ્નેચિંગ, અપહરણ અને પોક્સો જેવા ગંભીર ગુનાઓના કેસ નોંધાયેલા હોવાનું સામે આવ્યું છે.

દિલ્હી પોલીસે જણાવ્યું છે કે સમગ્ર પરિસ્થિતિ પર સતત નજર રાખવામાં આવી રહી છે અને કાયદો-વ્યવસ્થા જળવાઈ રહે તે માટે સુરક્ષા વ્યવસ્થા વધુ કડક બનાવવામાં આવી છે.

હાલ શું સ્થિતિ?

CJPનું કહેવું છે કે સરકાર સાથે થયેલી ચર્ચા સકારાત્મક રહી છે અને ટૂંક સમયમાં તમામ FIR પાછી ખેંચવાની પ્રક્રિયા શરૂ થશે. જોકે, સરકાર તરફથી આ મુદ્દે અંતિમ સત્તાવાર નોટિફિકેશનની રાહ જોવામાં આવી રહી છે. બીજી તરફ દિલ્હી પોલીસ સુરક્ષા અને કાયદો-વ્યવસ્થાના મુદ્દે સતર્ક હોવાનું જણાવી રહી છે. હવે સરકારના આગામી સત્તાવાર નિર્ણય પર સૌની નજર ટકેલી છે.