દાવો- ભારતમાં WhatsAppનું Username ફીચર હાલ નહીં આવે? કેન્દ્ર સરકારે Metaને મોકલી નોટિસ, 3 દિવસમાં માંગ્યો જવાબ; છેતરપિંડી વધવાની આશંકા

કેન્દ્ર સરકારે ભારતમાં વોટ્સએપના નવા Username Featureને લઈને ગંભીર ચિંતા વ્યક્ત કરી છે. ન્યૂઝ એજન્સી PTIના અહેવાલ મુજબ સરકારે Metaને સૂચના આપી છે કે, જ્યાં સુધી આ ફીચરને લઈને સરકાર સાથેની ચર્ચા પૂર્ણ ન થાય ત્યાં સુધી તેને ભારતમાં લોન્ચ કરવામાં ન આવે. આ સાથે સરકારે Metaને નોટિસ મોકલીને ત્રણ દિવસની અંદર સ્પષ્ટ જવાબ પણ માંગ્યો છે.

સરકારનું માનવું છે કે આ નવા ફીચરનો દુરુપયોગ કરીને સાયબર ગુનેગારો પોતાની ઓળખ છુપાવી લોકો સાથે છેતરપિંડી કરી શકે છે. હાલ આ મામલે સરકાર અને Meta તરફથી કોઈ સત્તાવાર નિવેદન જાહેર કરવામાં આવ્યું નથી.

શું છે સરકારની ચિંતા?

સરકાર આ ફીચરના તમામ પાસાઓની તપાસ કરી રહી છે. અધિકારીઓના જણાવ્યા મુજબ, જો યુઝર્સ મોબાઇલ નંબર જાહેર કર્યા વગર માત્ર Username દ્વારા ચેટ કરી શકશે તો સાયબર ફ્રોડ, ફેક એકાઉન્ટ અને ઓનલાઈન છેતરપિંડીના કેસોમાં વધારો થઈ શકે છે.

સરકારને આશંકા છે કે છેતરપિંડી કરનારા લોકો કોઈ પણ નામથી નકલી Username બનાવી લોકોને વિશ્વાસમાં લઈને નાણાકીય અથવા વ્યક્તિગત માહિતી મેળવી શકે છે. ખાસ કરીને Telegram જેવી ગોપનીયતા આધારિત સિસ્ટમમાં જે પ્રકારની સમસ્યાઓ જોવા મળી છે, તેવી સ્થિતિ WhatsAppમાં પણ સર્જાઈ શકે છે.

Metaએ ત્રણ દિવસ પહેલા શરૂ કરી Username બુકિંગ

Metaએ 29 જૂનથી વિશ્વભરમાં WhatsApp Usernameની બુકિંગ શરૂ કરી દીધી છે. જોકે આ ફીચર એકસાથે તમામ યુઝર્સ માટે ઉપલબ્ધ નહીં બને.

કંપની આગામી કેટલાક મહિનાઓમાં તબક્કાવાર અલગ-અલગ દેશોમાં આ સુવિધા શરૂ કરશે. જ્યારે કોઈ દેશ અથવા વિસ્તાર માટે આ ફીચર ઉપલબ્ધ થશે ત્યારે યુઝર્સને WhatsApp એપમાં નોટિફિકેશન મળશે.

Username Featureથી શું બદલાશે?

આ નવા ફીચર પછી કેટલીક પરિસ્થિતિઓમાં તમારો મોબાઇલ નંબર સામેની વ્યક્તિને દેખાશે નહીં.

• જ્યારે તમને કોઈ મોટા ગ્રુપમાં જોડવામાં આવશે.
• જ્યારે તમે પહેલીવાર કોઈ અજાણી વ્યક્તિ સાથે ચેટ શરૂ કરશો.
• નવા સંપર્કો સાથે ફક્ત Username શેર કરીને વાતચીત કરી શકશો.

આ રીતે યુઝર્સની પ્રાઇવસી વધુ મજબૂત બનશે અને મોબાઇલ નંબર જાહેર કરવાની જરૂર નહીં રહે.

WhatsApp આ ફીચર કેમ લાવી રહ્યું છે?

WhatsAppનું કહેવું છે કે ઘણી વખત લોકો નવા સંપર્કો સાથે વાતચીત કરવા માંગે છે પરંતુ પોતાનો મોબાઇલ નંબર શેર કરવા ઇચ્છતા નથી.

જેમ કે નેટવર્કિંગ ઇવેન્ટમાં મળેલા લોકો, નવા ક્લાસમેટ્સ, પડોશીઓ અથવા બાળકોના સ્કૂલ અને સ્પોર્ટ્સ ગ્રુપના અન્ય વાલીઓ સાથે વાત કરતી વખતે હવે માત્ર Username દ્વારા સંપર્ક કરી શકાશે.

Username બનાવવાના નિયમો

WhatsApp અનુસાર Username માટે કેટલાક નિયમો નક્કી કરવામાં આવ્યા છે.

• Username 3 થી 35 અક્ષર વચ્ચેનો હોવો જોઈએ.
• તેમાં ફક્ત નાના અંગ્રેજી અક્ષરો (a-z), અંકો (0-9), ડોટ (.) અને અંડરસ્કોર (_)નો જ ઉપયોગ કરી શકાશે.
• દરેક Username સંપૂર્ણપણે અનન્ય (Unique) રહેશે.
• યુઝર જરૂર મુજબ Username બદલી અથવા દૂર પણ કરી શકશે.

શું મોબાઇલ નંબર સંપૂર્ણપણે છુપાઈ જશે?

નહીં. મોબાઇલ નંબર માત્ર નવા સંપર્કો માટે જ છુપાયેલો રહેશે.

જે લોકો પાસે પહેલેથી તમારો નંબર સેવ છે તેઓ પહેલાની જેમ જ તમારો નંબર જોઈ શકશે અને સામાન્ય રીતે ચેટ કરી શકશે. ઉપરાંત WhatsApp એકાઉન્ટ બનાવવા માટે મોબાઇલ નંબરની જરૂરિયાત યથાવત રહેશે.

શું કોઈ પણ Username સર્ચ કરીને તમને શોધી શકશે?

WhatsAppએ સ્પષ્ટ કર્યું છે કે તે કોઈ જાહેર Username ડિરેક્ટરી બનાવશે નહીં.

કંપની કોઈ અન્ય યુઝરને તમારું Username સૂચવશે પણ નહીં. કોઈ વ્યક્તિ ત્યારે જ તમારો સંપર્ક કરી શકશે જ્યારે તેને તમારું સાચું Username ખબર હશે.

આવશે Username Key નામનું નવું સુરક્ષા ફીચર

Meta Username Key નામનું એક વધારાનું સુરક્ષા ફીચર પણ લાવી રહી છે.

જો કોઈ યુઝર આ વિકલ્પ ચાલુ કરશે તો પહેલીવાર મેસેજ મોકલનાર વ્યક્તિએ પહેલા Username Key દાખલ કરવી પડશે. ત્યારબાદ જ ચેટ શરૂ થશે. આ Key યુઝર જ્યારે ઇચ્છે ત્યારે બદલી પણ શકશે.

કંપનીનો દાવો છે કે આ ફીચર સ્પામ અને અનિચ્છનીય મેસેજ ઘટાડવામાં મદદરૂપ બનશે.

Instagram અને Facebook જેવું જ Username મળશે

Metaએ જણાવ્યું છે કે જ્યાં શક્ય હશે ત્યાં ક્રિએટર્સ, બિઝનેસ અને સંસ્થાઓ તેમના Instagram અને Facebook પર જે Username ધરાવે છે તે જ Username WhatsApp પર પણ મેળવી શકશે.

મોટી બ્રાન્ડ્સ અને જાણીતી હસ્તીઓના કેટલાક Username પહેલેથી જ સુરક્ષિત રાખવામાં આવશે જેથી તેમની ઓળખનો દુરુપયોગ ન થઈ શકે.

જૂની ચેટ્સ અને ગ્રુપ્સ પર નહીં પડે કોઈ અસર

કંપનીએ સ્પષ્ટ કર્યું છે કે Username Feature આવવાથી વર્તમાન ચેટ્સ, કોન્ટેક્ટ્સ અને ગ્રુપ્સમાં કોઈ ફેરફાર નહીં થાય.

End-to-End Encryption, Block, Report અને અન્ય તમામ સુરક્ષા સુવિધાઓ પહેલાની જેમ જ કાર્યરત રહેશે.

સૌથી મોટો ફાયદો શું?

જો આ ફીચર ભારતમાં મંજૂરી મેળવે તો યુઝર્સ નવા લોકો સાથે વાતચીત કરવા માટે પોતાનો મોબાઇલ નંબર શેર કર્યા વગર સંપર્ક કરી શકશે. આથી પ્રાઇવસી વધુ મજબૂત બનશે, સ્પામ ઘટાડવામાં મદદ મળશે અને ક્રિએટર્સ તથા બિઝનેસ માટે Metaના તમામ પ્લેટફોર્મ પર એકસરખી ડિજિટલ ઓળખ જાળવવી વધુ સરળ બનશે.

હાલ સરકાર દ્વારા આ ફીચરની સુરક્ષા અને સંભવિત જોખમોની સમીક્ષા ચાલી રહી છે. Meta તરફથી મળનારા જવાબ અને સરકારના આગામી નિર્ણય બાદ જ ભારતમાં આ ફીચરના લોન્ચ અંગે અંતિમ સ્થિતિ સ્પષ્ટ થશે.