ટ્રમ્પ ભારત આવી શકે છે: અમેરિકી વિદેશ મંત્રી રૂબિયોનું નિવેદન, કહ્યું- ‘અમે મોદીના મોટા પ્રશંસક’; હૈદરાબાદમાં ‘ડોનાલ્ડ ટ્રમ્પ એવન્યુ’ બનતા US રાષ્ટ્રપતિએ વ્યક્ત કર્યો આભાર

અમેરિકાના રાષ્ટ્રપતિ ડોનાલ્ડ ટ્રમ્પ વર્ષ 2027ની શરૂઆતમાં ભારતની મુલાકાતે આવી શકે છે. અમેરિકી ન્યૂઝ એજન્સી IANS અનુસાર, હૈદરાબાદમાં મીડિયા સાથે વાતચીત દરમિયાન અમેરિકાના વિદેશ મંત્રી માર્કો રૂબિયોએ આ સંકેત આપ્યો હતો. તેમણે વડાપ્રધાન નરેન્દ્ર મોદીના નેતૃત્વની પ્રશંસા કરતાં કહ્યું કે, “અમે વડાપ્રધાન મોદી અને તેમના દ્વારા કરવામાં આવેલા કાર્યોના ખૂબ મોટા પ્રશંસક છીએ.”

જો આ પ્રવાસ યોજાશે તો ટ્રમ્પના બીજા કાર્યકાળ દરમિયાન આ તેમની પ્રથમ ભારત મુલાકાત હશે. આ પહેલાં તેઓ ફેબ્રુઆરી 2020માં અમદાવાદમાં યોજાયેલા ઐતિહાસિક ‘નમસ્તે ટ્રમ્પ’ કાર્યક્રમમાં હાજરી આપવા ભારત આવ્યા હતા.

હૈદરાબાદમાં ‘ડોનાલ્ડ ટ્રમ્પ એવન્યુ’ની જાહેરાત

અમેરિકાની આઝાદીની 250મી વર્ષગાંઠ નિમિત્તે હૈદરાબાદમાં યોજાયેલા ‘ફ્રીડમ 250’ કાર્યક્રમ દરમિયાન યુએસ કોન્સ્યુલેટ નજીકના એક માર્ગને ‘ડોનાલ્ડ ટ્રમ્પ એવન્યુ’ નામ આપવાની જાહેરાત કરવામાં આવી હતી.

આ કાર્યક્રમમાં ભારતમાં અમેરિકાના રાજદૂત સર્જિયો ગોર અને તેલંગાણાના નાયબ મુખ્યમંત્રી મલ્લુ ભટ્ટી વિક્રમાર્કા સહિતના મહાનુભાવો હાજર રહ્યા હતા.

આ સન્માન બદલ ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ Truth Social પર ભારતનો આભાર વ્યક્ત કર્યો. તેમણે લખ્યું કે, “ભારતના હૈદરાબાદમાં નવું ડોનાલ્ડ ટ્રમ્પ એવન્યુ. આ રીતે સન્માનિત થનાર હું પ્રથમ અમેરિકી રાષ્ટ્રપતિ છું. આભાર!”

ભારત પ્રવાસ દરમિયાન અનેક મહત્વના મુદ્દાઓ પર થઈ શકે છે ચર્ચા

ટ્રમ્પની સંભવિત ભારત મુલાકાત દરમિયાન બંને દેશો વચ્ચેના અનેક વ્યૂહાત્મક અને આર્થિક મુદ્દાઓ પર ચર્ચા થવાની શક્યતા છે.

વેપાર અને ટેરિફ:
ભારત અને અમેરિકા વચ્ચે દ્વિપક્ષીય વેપાર કરાર (BTA)ને અંતિમ સ્વરૂપ આપવા તેમજ ટેરિફમાં રાહત અંગે ચર્ચા થઈ શકે છે.

સંરક્ષણ સહયોગ:
‘ભારત-યુએસ કોમ્પેક્ટ’ હેઠળ અદ્યતન રક્ષા ટેકનોલોજી, સંયુક્ત ઉત્પાદન અને લશ્કરી ક્ષમતાઓ વધારવા અંગે મહત્વના નિર્ણયો લેવામાં આવી શકે છે.

AI અને સેમિકન્ડક્ટર:
આર્ટિફિશિયલ ઇન્ટેલિજન્સ (AI), સેમિકન્ડક્ટર મેન્યુફેક્ચરિંગ અને સુરક્ષિત વૈશ્વિક સપ્લાય ચેઇન વિકસાવવા બંને દેશો વચ્ચે સહયોગ વધારવાની શક્યતા છે.

વૈશ્વિક સુરક્ષા:
મિડલ ઈસ્ટમાં શાંતિ, હોર્મુઝ સ્ટ્રેટની સુરક્ષા અને આંતરરાષ્ટ્રીય ભૂરાજકીય પડકારો પણ બેઠકના મુખ્ય એજન્ડામાં સામેલ રહી શકે છે.

છેલ્લા 10 વર્ષમાં મોદી-ટ્રમ્પની 9 મુલાકાતો

વડાપ્રધાન નરેન્દ્ર મોદી અને ડોનાલ્ડ ટ્રમ્પ વચ્ચે છેલ્લા એક દાયકામાં કુલ નવ વખત મુલાકાત થઈ ચૂકી છે. બંને નેતાઓ વોશિંગ્ટન, જર્મની, ફિલિપાઇન્સ, જાપાન, અમેરિકા, લંડન, ભારત તેમજ G7 જેવા આંતરરાષ્ટ્રીય મંચો પર અનેક વખત મળ્યા છે.

તાજેતરમાં ફ્રાન્સના એવિયનમાં યોજાયેલી G7 સમિટ દરમિયાન પણ બંને નેતાઓ વચ્ચે મુલાકાત થઈ હતી.

G7 સમિટમાં ટ્રમ્પે મોદીના નેતૃત્વની કરી પ્રશંસા

G7 સમિટ દરમિયાન ટ્રમ્પે કહ્યું હતું કે, “જ્યાં સુધી હું અમેરિકાનો રાષ્ટ્રપતિ છું, ત્યાં સુધી વ્હાઇટ હાઉસમાં મોદીનો હંમેશા સારો મિત્ર રહેશે.” તેમણે મોદીને શાંત પરંતુ અત્યંત પ્રભાવશાળી નેતા ગણાવ્યા હતા.

આ બેઠક દરમિયાન વડાપ્રધાન મોદીએ ભારતીય નાવિકોની સુરક્ષા, હોર્મુઝ સ્ટ્રેટ ખુલ્લું રાખવાની જરૂરિયાત અને પશ્ચિમ એશિયામાં શાંતિ સ્થાપવાના મુદ્દા પર ભાર મૂક્યો હતો.

ભારત-અમેરિકા વેપાર સતત વધી રહ્યો છે

વર્ષ 2025 દરમિયાન ભારત અને અમેરિકા વચ્ચે અંદાજે ₹12.54 લાખ કરોડનો દ્વિપક્ષીય વેપાર નોંધાયો હતો. તેમાં ભારતે અમેરિકાને આશરે ₹8 લાખ કરોડની નિકાસ કરી હતી, જ્યારે અમેરિકાથી લગભગ ₹4.6 લાખ કરોડની આયાત કરવામાં આવી હતી.

ટ્રેડ ડીલમાં હજુ પણ પડકારો

ભારત અને અમેરિકા વચ્ચે વચગાળાના વેપાર કરાર અંગે સહમતિ બનવા છતાં કેટલાક મુદ્દાઓ હજુ બાકી છે.

ભારત કાપડ, જેમ્સ-જ્વેલરી, ફાર્માસ્યુટિકલ્સ, એન્જિનિયરિંગ અને કૃષિ ઉત્પાદનો પર અમેરિકાના વધારાના ટેરિફમાં રાહત ઈચ્છે છે. બીજી તરફ અમેરિકા પોતાના કૃષિ ઉત્પાદનો, ડેરી, દારૂ, મેડિકલ ઉપકરણો અને ડિજિટલ કંપનીઓ માટે ભારતીય બજારમાં વધુ પ્રવેશ માંગે છે.

ખાસ કરીને કૃષિ અને ડેરી ક્ષેત્ર બંને દેશો વચ્ચેના વેપાર કરારનો સૌથી મોટો અવરોધ માનવામાં આવે છે, કારણ કે ભારતને પોતાના ખેડૂતો અને સ્થાનિક ડેરી ઉદ્યોગના હિતોની ચિંતા છે.