ખેડૂતોના અધિકારો માટે કોંગ્રેસની 1111 ટ્રેક્ટર સાથે કિસાન અધિકાર યાત્રા, ગાંધીનગર કૂચને લઈ પોલીસનો કડક બંદોબસ્ત

ખેડૂતોના પ્રશ્નો અને પડતર માંગણીઓને લઈને ગુજરાત કોંગ્રેસે આજે (15 જૂન) અમદાવાદના શાંતિપુરા ચોકડીથી ગાંધીનગર સુધી ‘કિસાન અધિકાર યાત્રા’નું આયોજન કર્યું છે. કોંગ્રેસના આંદોલનમાં રાજ્યભરના 20થી વધુ ખેડૂત સંગઠનો જોડાયા છે અને 1111 ટ્રેક્ટર સાથે ગાંધીનગર કૂચ કરવાની જાહેરાત કરવામાં આવી છે. જોકે પોલીસ દ્વારા ટ્રેક્ટર રેલીને ગાંધીનગર સુધી જવાની મંજૂરી આપવામાં આવી નથી અને માત્ર શાંતિપુરાથી ઓગણજ સુધી જ રેલીની પરવાનગી આપવામાં આવી છે.

કોંગ્રેસનો આરોપ છે કે રાજ્યમાં ખેડૂતોની જમીનો કાયદાકીય પ્રક્રિયાઓને બાજુએ રાખીને હડપ કરવામાં આવી રહી છે, જ્યારે વીજ લાઇનો, જમીન સંપાદન, દેવા માફી અને પાકના વ્યાજબી ભાવ જેવા પ્રશ્નો પર સરકાર ખેડૂતોને ન્યાય આપવામાં નિષ્ફળ રહી છે.

કોંગ્રેસના નેતાઓએ સંભાળ્યું યાત્રાનું સંકલન

આ કિસાન અધિકાર યાત્રાનું સંકલન સેવા દળના રાષ્ટ્રીય અધ્યક્ષ લાલજી દેસાઈ, કિસાન કોંગ્રેસના પ્રમુખ પાલ આંબલિયા, જયેશ પટેલ, મહેશ રાજકોટીયા અને કોંગ્રેસના કાર્યકારી પ્રમુખ Jignesh Mevani કરી રહ્યા છે.

આ ઉપરાંત વિધાનસભામાં કોંગ્રેસના નેતા Tushar Chaudhary અને પ્રદેશ કોંગ્રેસ પ્રમુખ Amit Chavda ખેડૂતોને સંબોધિત કરશે.

મોટી સંખ્યામાં ખેડૂતો શાંતિપુરા પહોંચ્યા

રાજ્યના વિવિધ જિલ્લાઓમાંથી ખેડૂતો મોટી સંખ્યામાં અમદાવાદના શાંતિપુરા ચોકડી ખાતે પહોંચ્યા છે. મોરબીથી આવેલા એક ખેડૂત હળ સાથે પહોંચ્યા હતા અને તેમના ટ્રેક્ટર પર ‘ખેડૂત મજબૂત તો દેશ મજબૂત’ જેવા સંદેશાઓ લખેલા હોવાથી લોકોનું ધ્યાન આકર્ષાયું હતું.

ખેડૂતો ‘જય જવાન, જય કિસાન’ના નારા સાથે રેલીમાં જોડાયા હતા.

આમ આદમી પાર્ટીનું પણ સમર્થન

કોંગ્રેસના આ ખેડૂત આંદોલનને આમ આદમી પાર્ટી (AAP)એ પણ સમર્થન જાહેર કર્યું છે. ધારાસભ્ય Gopal Italia સહિત પાર્ટીના અનેક નેતાઓ ટ્રેક્ટર રેલીમાં હાજરી આપી ખેડૂતોની માંગણીઓને ટેકો આપશે.

AAP નેતાઓએ જણાવ્યું કે ખેડૂતોના પ્રશ્નોનું નિરાકરણ નહીં આવે ત્યાં સુધી તેઓ ખેડૂતોની સાથે ખભેખભો મિલાવીને લડત આપતા રહેશે.

સરકારને અલ્ટીમેટમ આપવાની તૈયારી

કોંગ્રેસ અને ખેડૂત સંગઠનોએ દેવા માફી, મફત વીજળી, જમીન સંપાદનમાં પારદર્શિતા, પાકના પોષણક્ષમ ભાવ અને ખેડૂતોના અધિકારો સહિતની પાંચ મુખ્ય માંગણીઓ સરકાર સમક્ષ મૂકી છે.

સંગઠનોએ ચેતવણી આપી છે કે જો સરકાર આ માંગણીઓ સ્વીકારશે નહીં તો ગાંધીનગરમાં ધરણા-પ્રદર્શન સહિત ઉગ્ર આંદોલન શરૂ કરવામાં આવશે.

પોલીસનો કડક બંદોબસ્ત

ખેડૂતોના ગાંધીનગર પ્રવેશને ધ્યાનમાં રાખીને પોલીસ દ્વારા ચુસ્ત સુરક્ષા વ્યવસ્થા ગોઠવવામાં આવી છે. ગાંધીનગરના પ્રવેશદ્વાર સેક્ટર-30 સર્કલ ખાતે વિશેષ બંદોબસ્ત ગોઠવાયો છે.

શાંતિપુરા સર્કલ ખાતે ઝોન-7ના DCP, બે ACP, 10 PI સહિત 100થી વધુ પોલીસ કર્મચારીઓને તૈનાત કરવામાં આવ્યા છે. DCP હર્ષદ પટેલે જણાવ્યું કે ટ્રેક્ટર રેલીને માત્ર શાંતિપુરા સર્કલથી ઓગણજ સ્થિત શતાબ્દી મહોત્સવ મેદાન સુધી જ મંજૂરી આપવામાં આવી છે અને ત્યાં ખેડૂત સભા યોજાશે.

ખેડૂતોનો સરકાર સામે આક્રોશ

મોરબીથી આવેલા ખેડૂત મુકેશભાઈ ગાંધીએ સરકાર પર નિશાન સાધતાં કહ્યું કે ખેડૂતો સાથે આતંકવાદીઓ જેવું વર્તન કરવામાં આવે છે. ખેડૂતોને પોતાના ખેતરમાં જવા માટે પણ અનેક અવરોધોનો સામનો કરવો પડે છે, જ્યારે તેમની સમસ્યાઓ સાંભળવામાં આવતી નથી.

ખેડૂત મહાદેવભાઈ પટેલે જણાવ્યું કે કંપનીઓ અને સરકાર સામે છેલ્લા એક વર્ષથી સંઘર્ષ ચાલી રહ્યો છે. વાવણીનો સમય હોવા છતાં ખેડૂતો પોતાના ખેતરોમાં જઈ શકતા નથી. યોગ્ય વળતર નહીં મળે ત્યાં સુધી આંદોલન ચાલુ રહેશે.

જમીન સંપાદન અને વીજ લાઇનો મુદ્દે સરકારને ઘેરાઈ

કિસાન કોંગ્રેસ પ્રમુખ પાલ આંબલિયાએ આરોપ લગાવ્યો કે ગુજરાતમાં જમીન સંપાદન પ્રક્રિયામાં મોટા પાયે ભ્રષ્ટાચાર થઈ રહ્યો છે. ખેડૂતોને ઓછી કિંમત ચૂકવી તેમની જમીનો લેવામાં આવે છે, જ્યારે કેટલાક પ્રભાવશાળી લોકોને એ જ જમીન ઊંચા ભાવે ફાળવવામાં આવે છે.

તેમણે વધુમાં જણાવ્યું કે વીજ કંપનીઓ પોલીસ રક્ષણ સાથે ખેડૂતોના ખેતરોમાં ઘૂસી જાય છે અને નિયમોની અવગણના કરીને કામ કરે છે, જેના કારણે ખેડૂતોમાં ભારે રોષ છે.

લાલજી દેસાઈનું નિવેદન

સેવા દળના રાષ્ટ્રીય અધ્યક્ષ લાલજી દેસાઈએ કહ્યું કે સરકાર ખેડૂતોને ‘જગતનો તાત’ કહે છે, પરંતુ નીતિઓ એવી છે કે ખેડૂતો સતત મુશ્કેલીમાં ધકેલાઈ રહ્યા છે.

તેમણે જણાવ્યું કે ગુજરાતના લાખો ખેડૂતો દેવાના બોજા હેઠળ દબાયેલા છે. દેવા માફી, મફત વીજળી અને પાકના યોગ્ય ભાવ જેવી માંગણીઓ સાથે 1111 ટ્રેક્ટર લઈને ખેડૂતો ગાંધીનગર તરફ કૂચ કરી રહ્યા છે. જો સરકાર હજુ પણ ખેડૂતોની વાત નહીં સાંભળે તો આગામી દિવસોમાં વધુ ઉગ્ર આંદોલનની તૈયારી કરવામાં આવશે.

ખેડૂતોની આ કિસાન અધિકાર યાત્રાને લઈને સમગ્ર રાજ્યમાં રાજકીય ગરમાવો જોવા મળી રહ્યો છે. હવે સરકાર ખેડૂતોની માંગણીઓ પર શું નિર્ણય લે છે અને આંદોલન કયા તબક્કે પહોંચે છે તેના પર સૌની નજર ટકેલી છે.