અમેરિકા-ઈરાન વચ્ચે વધ્યો તણાવ: યુદ્ધ સમાપ્ત કરવા અમેરિકાની 5 કડક શરતોનો દાવો

અમેરિકા અને ઈરાન વચ્ચે ચાલી રહેલા તણાવ વચ્ચે હવે શાંતિ પ્રક્રિયાને લઈને મોટો દાવો સામે આવ્યો છે. ઈરાનની ‘ફાર્સ ન્યૂઝ એજન્સી’ના અહેવાલ મુજબ, અમેરિકાએ ઈરાન સામે યુદ્ધ સમાપ્ત કરવા માટે પાંચ મોટી અને કડક શરતો મૂકી છે. જોકે, આ દાવાઓ અંગે હજુ સુધી અમેરિકા કે ઈરાન તરફથી કોઈ સત્તાવાર પુષ્ટિ કરવામાં આવી નથી.

અહેવાલ અનુસાર, અમેરિકાએ સ્પષ્ટ કર્યું છે કે ઈરાનને બોમ્બમારાથી થયેલા નુકસાનનું કોઈ વળતર આપવામાં આવશે નહીં. સાથે જ ઈરાન પાસે રહેલું આશરે 400 કિલોગ્રામ એનરિચ્ડ (સંવર્ધિત) યુરેનિયમ અમેરિકાને સોંપવાની માંગ કરવામાં આવી છે.

માત્ર એક જ પરમાણુ કેન્દ્ર ચાલુ રાખવાની શરત

રિપોર્ટમાં વધુમાં જણાવાયું છે કે અમેરિકા ઈચ્છે છે કે ઈરાનમાં માત્ર એક જ પરમાણુ કેન્દ્ર કાર્યરત રહે. ઉપરાંત, ઈરાનની વિદેશોમાં ફ્રીઝ કરાયેલી સંપત્તિઓમાંથી માત્ર 25 ટકા રકમ જ મુક્ત કરવામાં આવે તેવી અમેરિકાની શરત હોવાનું કહેવાઈ રહ્યું છે.

વોશિંગ્ટન એ પણ ઈચ્છે છે કે લેબનાન સહિતના તમામ મોરચાઓ પર ચાલી રહેલા યુદ્ધ અને તણાવને વાતચીત દ્વારા સમાપ્ત કરવામાં આવે.

છેલ્લા 24 કલાકના 5 મોટા અપડેટ્સ

UAEના ન્યૂક્લિયર પ્લાન્ટ બહાર ડ્રોન હુમલો

યુનાઇટેડ આરબ અમીરાત (UAE)ના બરાકાહ પરમાણુ ઊર્જા પ્લાન્ટની બહાર ડ્રોન હુમલા બાદ આગ ફાટી નીકળી હતી. પ્રાથમિક તપાસમાં ઈરાન પર શંકા વ્યક્ત કરવામાં આવી રહી છે. જોકે UAEએ જણાવ્યું કે હુમલામાં કોઈ જાનહાનિ થઈ નથી અને રેડિયેશન સુરક્ષાને કોઈ અસર પહોંચી નથી.

હોર્મુઝ પાર કરીને ભારત પહોંચ્યા 15 LPG જહાજ

યુદ્ધ વચ્ચે પણ ભારત માટે LPG સપ્લાય ચાલુ રહ્યો છે. માર્શલ આઇલેન્ડ્સના ધ્વજવાળું LPG ટેન્કર ‘સિમી’ 20 હજાર ટન ગેસ લઈને કંડલા પોર્ટ પહોંચ્યું છે. અત્યાર સુધીમાં 15 LPG જહાજો ભારત પહોંચી ચૂક્યા છે.

ભારતનો સ્પષ્ટ સંદેશ- હોર્મુઝમાં શિપિંગ રોકવું અસ્વીકાર્ય

સંયુક્ત રાષ્ટ્રમાં ભારતના કાયમી પ્રતિનિધિ પર્વતનેની હરીશે જણાવ્યું કે હોર્મુઝ સ્ટ્રેટમાં વ્યાપારી જહાજોની અવરજવર રોકવી અથવા નૌકાદળના પરિવહનમાં અવરોધ ઉભો કરવો સ્વીકાર્ય નથી.

ટ્રમ્પની નવી ઓફર- 20 વર્ષ માટે પરમાણુ કાર્યક્રમ રોકો

અમેરિકી રાષ્ટ્રપતિ ડોનાલ્ડ ટ્રમ્પે પહેલીવાર કાયમી પ્રતિબંધની જગ્યાએ 20 વર્ષ માટે ઈરાનના પરમાણુ કાર્યક્રમને સસ્પેન્ડ કરવાની ઓફર આપી છે. સાથે જ તેમણે ચેતવણી આપી કે ઈરાન માટે સમય ઝડપથી પૂરો થઈ રહ્યો છે.

સીઝફાયર છતાં લેબનાન પર હુમલા યથાવત

સંઘર્ષવિરામ લંબાયા બાદ પણ ઇઝરાયેલે દક્ષિણ લેબનાનમાં 30થી વધુ હુમલા કર્યા હોવાનું જણાવાયું છે. હુમલાઓના કારણે હજારો લોકો સ્થળાંતર કરવા મજબૂર બન્યા છે.

અમેરિકા-ઇઝરાયલ વચ્ચે લશ્કરી ચર્ચા તેજ

અહેવાલો અનુસાર, ઇઝરાયલી વડાપ્રધાન બેન્જામિન નેતન્યાહૂ અને અમેરિકી રાષ્ટ્રપતિ ટ્રમ્પ વચ્ચે ઈરાન મુદ્દે મહત્વપૂર્ણ ચર્ચા થઈ છે. બંને દેશો ઈરાન સામે સંભવિત નવા હુમલાઓ માટે લશ્કરી વિકલ્પો પર ચર્ચા કરી રહ્યા હોવાનું કહેવાઈ રહ્યું છે.

ઇઝરાયલી મીડિયા અનુસાર, છેલ્લા 24 કલાકમાં જર્મની સ્થિત અમેરિકન સૈન્ય ઠેકાણાઓથી હથિયારો અને દારૂગોળો લઈને ડઝનબંધ કાર્ગો વિમાનો તેલ અવીવ પહોંચ્યા છે.

ઈરાનની ચેતવણી- નાકાબંધી નહીં હટાવો તો પરિણામ ગંભીર આવશે

ઈરાનના પૂર્વ IRGC કમાન્ડર મોહસેન રેઝાઈએ અમેરિકાને ચેતવણી આપી છે કે જો ઈરાની બંદરો પરની નાકાબંધી દૂર નહીં કરવામાં આવે તો ઓમાન સમુદ્ર અમેરિકન સેનાનું “કબ્રસ્તાન” બની શકે છે.

તેમણે જણાવ્યું કે અમેરિકા દ્વારા કરવામાં આવેલી નાકાબંધી યુદ્ધ સમાન કાર્યવાહી છે અને તેહરાનને તેનો જવાબ આપવાનો સંપૂર્ણ અધિકાર છે.

ઈરાનમાં યુવતીઓને AK-47 ટ્રેનિંગ

અમેરિકા સાથે વધતા તણાવ વચ્ચે ઈરાનમાં યુવતીઓને AK-47 એસોલ્ટ રાઈફલ ચલાવવાની ટ્રેનિંગ આપવામાં આવી રહી છે. સોશિયલ મીડિયા પર વાયરલ થયેલા વીડિયોમાં યુવતીઓ હથિયાર એસેમ્બલ અને ડિસએસેમ્બલ કરતી જોવા મળી રહી છે.

ટ્રમ્પની ફરી ચેતવણી

ટ્રમ્પે પોતાના સોશિયલ મીડિયા પ્લેટફોર્મ પર પોસ્ટ કરીને કહ્યું કે, “ઈરાન માટે સમય ઝડપથી પસાર થઈ રહ્યો છે. જો તે જલ્દી સમજૂતી નહીં કરે તો તેની પાસે કંઈ બચશે નહીં.”

આ તમામ ઘટનાઓ વચ્ચે મધ્ય પૂર્વમાં ફરી એકવાર મોટા સંઘર્ષની આશંકા વધી રહી છે અને વિશ્વભરના દેશો પરિસ્થિતિ પર નજીકથી નજર રાખી રહ્યા છે.