કેન્દ્ર સરકારે સ્પષ્ટ કર્યું છે કે ‘સિમ બાઈન્ડિંગ’ નિયમોની 28 ફેબ્રુઆરીની ડેડલાઈન લંબાવવામાં આવશે નહીં. 1 માર્ચ 2026થી નવા નિયમો અમલમાં આવશે, જેના હેઠળ મોબાઈલમાં રજિસ્ટર્ડ સિમકાર્ડ હાજર ન હોય તો WhatsApp, Telegram, Signal, Snapchat, ShareChat, JioChat, Arattai અને Josh જેવી મેસેજિંગ એપ્સ કામ નહીં કરે.
ડેસ્કટોપ પર લોગઇન કરાયેલ WhatsApp એકાઉન્ટ પણ દર 6 કલાકે ઓટો લોગઆઉટ થઈ જશે. સરકારનો દાવો છે કે આ પગલાથી સાયબર છેતરપિંડી અને ફ્રોડને રોકવામાં મદદ મળશે.
શું છે ‘સિમ બાઈન્ડિંગ’?
‘સિમ બાઈન્ડિંગ’ એક સુરક્ષા વ્યવસ્થા છે, જેમાં મેસેજિંગ એપ તમારા ફિઝિકલ સિમકાર્ડ સાથે લિંક થાય છે. એટલે કે, જે નંબરથી એકાઉન્ટ બનાવ્યું છે, તે જ સિમકાર્ડ તે ફોનમાં હોવું જરૂરી રહેશે.
આથી કોઈ હેકર કે ઠગ તમારા નંબરને બીજા ડિવાઇસ પર એક્ટિવ કરી શકશે નહીં.
ક્યારેથી લાગુ થશે નિયમ?
નવો નિયમ 1 માર્ચ 2026થી લાગુ પડશે. જો તમે ફોનમાંથી સિમકાર્ડ કાઢી નાખશો, તો સંબંધિત મેસેજિંગ એપ કાર્ય કરવાનું બંધ કરી શકે છે.
ડેડલાઈન કેમ લંબાવવામાં નહીં આવે?
કેન્દ્રીય સંચારમંત્રી Jyotiraditya Scindia એ જણાવ્યું છે કે રાષ્ટ્રીય સુરક્ષા અને સાયબર છેતરપિંડી રોકવા માટે આ નિયમો જરૂરી છે. સુરક્ષાના મુદ્દે સરકાર કોઈ સમાધાન નહીં કરે.
યુઝર્સ પર શું અસર પડશે?
- જે નંબર પર WhatsApp કે અન્ય એપ રજિસ્ટર્ડ છે, તે જ સિમ ફોનમાં હોવું ફરજિયાત રહેશે.
- ડેસ્કટોપ/વેબ વર્ઝનમાં દર 6 કલાકે ફરીથી લોગઇન કરવું પડશે.
- એક જ એકાઉન્ટને અનેક લોકો દ્વારા શેર કરવાનું મુશ્કેલ બનશે.
ઇન્ડસ્ટ્રી એસોસિયેશન IAMAI એ ચિંતા વ્યક્ત કરી છે કે 6 કલાકે લોગઆઉટનો નિયમ પ્રોફેશનલ્સ અને બિઝનેસ યુઝર્સ માટે અસુવિધાજનક બની શકે છે.
નિયમ ન માનનાર કંપનીઓ સામે કાર્યવાહી
કેન્દ્ર સરકારે કંપનીઓને 120 દિવસમાં પાલન રિપોર્ટ આપવા કહ્યું છે. નિયમોનું ઉલ્લંઘન કરનાર સામે ટેલિકોમ્યુનિકેશન એક્ટ 2023 અને સાયબર સિક્યોરિટી નિયમો હેઠળ કાર્યવાહી થશે.
અન્ય મુદ્દાઓ પર પણ મંત્રીનો નિવેદન
1. Starlink લોન્ચિંગ મુદ્દો
સિંધિયાએ જણાવ્યું કે સ્ટારલિંકે હજી સુધી સુરક્ષા એજન્સીઓ સમક્ષ જરૂરી ડેમો પૂરાં કર્યા નથી. કંપનીએ બતાવવું પડશે કે જરૂર પડે ત્યારે ભારતીય સીમા બહાર ઇન્ટરનેટ એક્સેસ બંધ કરી શકે.
2. BSNL અધિકારી મામલો
BSNL ડાયરેક્ટર વિવેક બંજલના પ્રવાસ માટે 50 કર્મચારીની વ્યવસ્થા કરવાના આદેશ પર ‘કારણ દર્શાવો’ નોટિસ જારી કરવામાં આવી છે. મંત્રીના જણાવ્યા મુજબ 21મી સદીમાં આવી વ્યવસ્થા સ્વીકાર્ય નથી.
તેમણે ઉમેર્યું કે BSNL હાલમાં સારો નાણાકીય પ્રદર્શન કરી રહી છે અને “હેલ્ધી કેશ ફ્લો” જનરેટ કરી રહી છે.
નવા નિયમો સાથે સરકાર સાયબર સુરક્ષા મજબૂત બનાવવાનો દાવો કરે છે. હવે 1 માર્ચથી યુઝર્સે પોતાના સિમ અને મેસેજિંગ એપ વચ્ચેનો સંબંધ સુનિશ્ચિત કરવો ફરજિયાત બનશે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
Leave feedback about this