“મંગળ કરતા ચંદ્ર પર પહોંચવું સરળ”, 10 વર્ષમાં ‘સેલ્ફ-ગ્રોઈંગ સિટી’ બનાવવાનો દાવો
સ્પેસએક્સના સ્થાપક ઈલોન મસ્કે પોતાના અવકાશ મિશન અંગે મોટી જાહેરાત કરી છે. 9 ફેબ્રુઆરીએ સોશિયલ મીડિયા પ્લેટફોર્મ X પર મસ્કે જણાવ્યું કે હવે કંપનીનું મુખ્ય ધ્યાન મંગળ ગ્રહની જગ્યાએ ચંદ્ર પર શહેર વસાવવાનો છે. તેમનો દાવો છે કે ચંદ્ર પર માનવ વસાહત સ્થાપિત કરવી મંગળની તુલનામાં વધુ ઝડપી અને વ્યવહારુ છે.
10 વર્ષમાં ચંદ્ર પર “સેલ્ફ-ગ્રોઈંગ સિટી”નો લક્ષ્ય
મસ્કે કહ્યું કે સ્પેસએક્સ હવે ચંદ્ર પર “Self-Growing City” બનાવવાના મિશન પર કામ કરી રહી છે. તેમના અનુસાર, આ લક્ષ્ય 10 વર્ષથી પણ ઓછા સમયમાં હાંસલ કરી શકાય છે, જ્યારે મંગળ પર શહેર વસાવવામાં 20 વર્ષથી વધુ સમય લાગી શકે છે.
તેમણે ઉમેર્યું કે સ્પેસએક્સનું અંતિમ મિશન હજુ પણ એ જ છે—“જીવન અને ચેતનાને તારાઓ સુધી લઈ જવું.”
ચંદ્ર સુધી પહોંચવું કેમ સરળ?
મંગળ પર જવાની તક દર 26 મહિને જ મળે છે, જ્યારે પૃથ્વી અને મંગળ એક સીધી રેખામાં આવે છે. મંગળ સુધી પહોંચવામાં આશરે 6 મહિના લાગી શકે છે.
તેની સામે, ચંદ્ર માટે દર 10 દિવસે રોકેટ લોન્ચ કરી શકાય છે અને ત્યાં પહોંચવામાં માત્ર 2 દિવસનો સમય લાગે છે. આ કારણોસર મસ્કે ચંદ્રને હાલની પ્રાથમિકતા બનાવ્યો છે.
મંગળ હજુ પણ ‘પ્લાન-બી’
ભલે હાલમાં ફોકસ ચંદ્ર પર હોય, મસ્કે સ્પષ્ટ કર્યું છે કે મંગળ મિશન રદ થયું નથી. તેઓ આશા રાખે છે કે લગભગ 7 વર્ષમાં મંગળ પર વસાહત સ્થાપિત કરવાની શરૂઆત કરી શકાય.
મસ્ક લાંબા સમયથી કહી રહ્યા છે કે મંગળ માનવતાને બચાવવા માટે “પ્લાન-બી” છે. જો પૃથ્વી પર કોઈ વૈશ્વિક આપત્તિ સર્જાય, તો મંગળ પર માનવ વસાહત માનવ જાતિના અસ્તિત્વને જાળવી રાખી શકે છે.
નાસાનું ધ્યાન ચંદ્ર મિશન પર
જ્યાં સ્પેસએક્સ હવે ચંદ્ર પર શહેર વસાવવાની વાત કરી રહ્યું છે, ત્યાં નાસા પહેલેથી જ ચંદ્ર મિશન પર ધ્યાન કેન્દ્રિત કરી રહી છે. નાસાનું લક્ષ્ય 2028 સુધીમાં અવકાશયાત્રીઓને ફરીથી ચંદ્રની સપાટી પર ઉતારવાનું છે.
1972માં એપોલો પ્રોગ્રામ પૂર્ણ થયા બાદ પહેલીવાર માનવીઓ ચંદ્ર પર પગ મુકશે.
‘આર્ટેમિસ’ પર મસ્કની ટીકા અને હવે બદલાતું વલણ
ગયા વર્ષે મસ્કે નાસાના ‘આર્ટેમિસ’ મૂન પ્રોગ્રામને “ધ્યાન ભટકાવનાર” ગણાવ્યો હતો અને કહ્યું હતું કે “અમે સીધા મંગળ પર જઈ રહ્યા છીએ.”
હવે, તેમના નિવેદનથી સ્પષ્ટ થાય છે કે વ્યૂહરચનામાં ફેરફાર થયો છે અને ચંદ્રને માનવ વસાહત માટે પહેલું પગથિયું માનવામાં આવી રહ્યું છે.
નાસાના મૂન મિશનમાં સ્પેસએક્સનો લેન્ડર
નાસાના ચંદ્ર મિશન માટે સ્પેસએક્સનું લુનર લેન્ડર પસંદ કરવામાં આવ્યું છે. તેને બનાવવા માટે નાસાએ સ્પેસએક્સને લગભગ 3 બિલિયન ડોલર (અંદાજે ₹27 હજાર કરોડ)નો કોન્ટ્રાક્ટ આપ્યો છે.
હાલમાં આ લેન્ડર ટેસ્ટિંગ ફેઝમાં છે અને કેટલાક પરીક્ષણો દરમિયાન વિસ્ફોટ પણ થયા છે. માર્ચમાં નવા પ્રોટોટાઇપનું પરીક્ષણ થવાની શક્યતા છે.
સ્પેસ રેસમાં બ્લુ ઓરિજિનની એન્ટ્રી
જેફ બેઝોસની કંપની ‘બ્લુ ઓરિજિન’ પણ સમાન પ્રકારનું લુનર લેન્ડર વિકસાવી રહી છે. અવકાશ ક્ષેત્રમાં હવે ખાનગી કંપનીઓ વચ્ચે કડક સ્પર્ધા જોવા મળી રહી છે.
માનવતાનું ભવિષ્ય સુરક્ષિત કરવાનો દાવો
ઈલોન મસ્કના નવા નિવેદનથી સ્પષ્ટ થાય છે કે સ્પેસએક્સ ચંદ્રને ભવિષ્યના માનવ વસાહત માટે પ્રથમ સ્ટેપ તરીકે જોે છે. ચંદ્ર પર સફળતા મળ્યા બાદ મંગળ તરફનો માર્ગ વધુ મજબૂત બની શકે છે.
આવતા દાયકામાં ચંદ્ર પર માનવ શહેરનો વિચાર હવે કલ્પના નહીં પરંતુ હકીકત બની શકે છે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
Leave feedback about this