એપસ્ટીન ફાઇલ્સે દુનિયા હચમચાવી: 10 દેશોમાં રાજીનામાં, 80થી વધુ શક્તિશાળી લોકો સામે તપાસ, ટ્રમ્પનું નામ 38 હજાર વખત નોંધાયું

અમેરિકામાં નાની છોકરીઓના યૌનશોષણ અને માનવ તસ્કરીના આરોપી અબજોપતિ જેફરી એપસ્ટીન સાથે સંકળાયેલા ગુપ્ત દસ્તાવેજો જાહેર થતાં જ વૈશ્વિક રાજકારણ, રાજદૂતિયાં સંબંધો અને પાવર એલિટમાં ભારે ખળભળાટ મચી ગયો છે. અમેરિકાના જસ્ટિસ ડિપાર્ટમેન્ટ દ્વારા જાહેર કરાયેલા અંદાજે 30 લાખ પાનાંના દસ્તાવેજોએ દુનિયાભરના સત્તા કેન્દ્રોને ઝાંઝવી નાખ્યા છે.

આ દસ્તાવેજો જાહેર થયા બાદ અત્યારસુધીમાં 10 દેશોમાં 15થી વધુ ઉચ્ચ અધિકારીઓએ રાજીનામું આપવું પડ્યું છે, જ્યારે 80થી વધુ રાજકારણીઓ, અબજોપતિઓ અને પ્રભાવશાળી લોકો સામે તપાસ શરૂ કરવામાં આવી છે.

રાજકારણીઓથી શાહી પરિવાર સુધી તપાસની આંચ

એપસ્ટીન ફાઇલ્સમાં 700થી 1000 પ્રભાવશાળી લોકોનાં નામ ઇ-મેલ્સ, ફ્લાઇટ લોગ્સ, ફોન રેકોર્ડ્સ અને સંપર્ક યાદીમાં નોંધાયેલાં છે. તેમાં

• 100થી વધુ રાજકારણી અને વરિષ્ઠ રાજદ્વારીઓ,
• 200થી વધુ અબજોપતિઓ અને કોર્પોરેટ જગતનાં મોટા નામો,
• તેમજ હજારો નાની છોકરીઓ અને યુવતીઓના યૌનશોષણ સંબંધિત વિગતો સામેલ હોવાનું જણાવાયું છે.

દસ્તાવેજોમાં અમેરિકાના રાષ્ટ્રપતિ ડોનાલ્ડ ટ્રમ્પ, પૂર્વ રાષ્ટ્રપતિ બિલ ક્લિન્ટન અને હિલેરી ક્લિન્ટન જેવા હાઈ-પ્રોફાઇલ નામો અલગ-અલગ સંદર્ભોમાં સામે આવ્યા છે.

ટ્રમ્પનું નામ 38 હજાર વખત, ખાનગી જેટ પ્રવાસોની વિગતો

એપસ્ટીન ફાઇલ્સમાં ડોનાલ્ડ ટ્રમ્પનું નામ 38,000થી વધુ વખત નોંધાયેલું હોવાનું સામે આવ્યું છે. રેકોર્ડ્સ મુજબ, 1990ના દાયકામાં એપસ્ટીનના ખાનગી વિમાન ‘લોલિતા એક્સપ્રેસ’ દ્વારા 7–8 પ્રવાસોનો ઉલ્લેખ છે. ટ્રમ્પના માર-એ-લાગો ક્લબની ગેસ્ટ લિસ્ટમાં પણ એપસ્ટીનના નામની નોંધ મળી છે.

યુરોપમાં સૌથી મોટો રાજકીય ભૂકંપ

એપસ્ટીન કાંડનો સૌથી મોટો અસર યુરોપમાં જોવા મળી રહ્યો છે.

• બ્રિટનમાં પૂર્વ રાજદૂત પીટર મેન્ડેલસન, સલાહકાર એડમ પેરી અને પીએમ કીર સ્ટારમરના ચીફ ઓફ સ્ટાફ મોર્ગન મેકસ્વીનીએ રાજીનામું આપ્યું.
• સ્લોવાકિયાના પૂર્વ વિદેશ મંત્રી મીરોસ્લાવ લાઇચાકે 300થી વધુ વાંધાજનક ઇ-મેલ્સ સામે આવતા પદ છોડ્યું.
• સ્વીડન, નોર્વે, ફ્રાન્સ અને પોલેન્ડ સહિતના દેશોમાં વરિષ્ઠ રાજદ્વારીઓ સામે તપાસ શરૂ થઈ છે.

બ્રિટનમાં પ્રિન્સ એન્ડ્રુ વિરુદ્ધ ફ્રેશ રિવ્યૂ શરૂ થયો છે, જ્યારે નોર્વે અને ફ્રાન્સમાં વિશેષ તપાસ ટીમો રચાઈ છે.

બિલ ગેટ્સ, ઇઝરાયલના પૂર્વ PM સહિતે અફસોસ વ્યક્ત કર્યો

ફાઇલ્સ જાહેર થતાં જ કેટલાક જાણીતા ચહેરાઓએ જાહેરમાં અફસોસ વ્યક્ત કર્યો છે.

• માઇક્રોસોફ્ટના સહ-સ્થાપક બિલ ગેટ્સે એપસ્ટીન સાથેની મુલાકાતો પર ખેદ વ્યક્ત કરી ફાઉન્ડેશનના બોર્ડમાંથી રાજીનામું આપ્યું.
• ઇઝરાયલના પૂર્વ PM એહુદ બરાકનું નામ ન્યૂયોર્કમાં એપસ્ટીનના એપાર્ટમેન્ટ મુલાકાત રેકોર્ડમાં આવ્યું, જેને લઈને તેમણે સ્પષ્ટતા આપી.
• નોર્વેની ક્રાઉન પ્રિન્સેસ મેટે-મેરિટે પણ માફી માગી.

15 દેશોમાં ફેલાયેલું યૌન તસ્કરી નેટવર્ક

તપાસમાં સામે આવ્યું છે કે એપસ્ટીનનું યૌનશોષણ નેટવર્ક માત્ર અમેરિકા સુધી સીમિત નહોતું, પરંતુ 15 દેશોમાં ફેલાયેલું સંગઠિત ટ્રાફિકિંગ નેટવર્ક હતું. ખાનગી ટાપુ, જેટ્સ અને વૈભવી પાર્ટીઓ દ્વારા નાબાલિક યુવતીઓનો શોષણ થતો હતો.

કેસની ટાઈમલાઇન: 2005થી 2026 સુધી

• 2005: 14 વર્ષની છોકરીએ ફ્લોરિડામાં પહેલી ફરિયાદ નોંધાવી
• 2006–08: વિવાદાસ્પદ ‘પ્લી ડીલ’, 13 મહિનાની હળવી સજા
• 2009–15: જેલ બાદ ફરી સક્રિય નેટવર્ક
• 2019: ન્યૂયોર્કમાં ધરપકડ, જેલમાં શંકાસ્પદ મૃત્યુ
• 2026: કોર્ટના આદેશથી 30 લાખ પાનાં જાહેર, વૈશ્વિક તપાસ શરૂ

‘વાઇલ્ડ ડિનર’ પાર્ટીમાં મસ્ક-ઝકરબર્ગની તસવીર

એપસ્ટીન ફાઇલ્સમાં ઇલોન મસ્ક અને માર્ક ઝકરબર્ગ સહિતના ટેક દિગ્ગજો સાથેની ડિનર પાર્ટીની તસવીર પણ સામે આવી છે. આ ફોટો 2015નો હોવાનું કહેવાય છે, જેને એપસ્ટીને ‘વાઇલ્ડ ડિનર’ તરીકે ઓળખાવ્યો હતો.