જાપાન ચૂંટણીમાં PM સાને તકાઈચીનો પ્રચંડ વિજય, LDPએ 465માંથી 310થી વધુ બેઠકો જીતી

PM મોદીએ પાઠવ્યા અભિનંદન, ઇન્ડો-પેસિફિક નીતિ પર પડશે અસર

જાપાનમાં રવિવારે યોજાયેલી સામાન્ય ચૂંટણીમાં વડાપ્રધાન સાને તકાઈચીની લિબરલ ડેમોક્રેટિક પાર્ટી (LDP) એ ઐતિહાસિક અને પ્રચંડ વિજય નોંધાવ્યો છે. સરકારી બ્રોડકાસ્ટર NHK વર્લ્ડના અહેવાલ મુજબ, અત્યાર સુધીમાં LDPએ કુલ 465 બેઠકોમાંથી 310થી વધુ બેઠકો જીતી છે, જે બહુમતી માટે જરૂરી 233 બેઠકો કરતાં ઘણી વધારે છે.

LDPના આ શાનદાર વિજય બાદ જાપાનમાં સ્થિર સરકાર રચાવાની શક્યતા મજબૂત બની છે. LDPના નેતૃત્વ હેઠળનું ગઠબંધન સહયોગી જાપાન ઇનોવેશન પાર્ટી (ઇશિન) સાથે મળીને કુલ 366 બેઠકો મેળવી શકે છે. આ સંખ્યાબળના કારણે ઉપલા ગૃહમાં વિપક્ષના નિયંત્રણ છતાં સરકારને કાયદા પસાર કરવાની સત્તા મળશે.

PM મોદીએ પાઠવ્યા અભિનંદન

સાને તકાઈચીની જીત પર ભારતીય વડાપ્રધાન નરેન્દ્ર મોદીએ તેમને અભિનંદન પાઠવ્યા છે. PM મોદીએ X (પૂર્વ ટ્વિટર) પર પોસ્ટ કરીને જણાવ્યું કે,
“મને વિશ્વાસ છે કે તમારા કુશળ નેતૃત્વ હેઠળ ભારત-જાપાન મિત્રતા નવી ઊંચાઈઓ પર પહોંચશે.”

18 કલાક કામ માટે જાણીતા સાને તકાઈચી

સાને તકાઈચી તેમના કડક કાર્યશૈલી માટે જાણીતા છે અને તેઓ રોજે રોજ 18 કલાક સુધી કામ કરે છે. તેમના નેતૃત્વમાં જાપાને ચીન વિરુદ્ધ વધુ મજબૂત વલણ અપનાવ્યું છે. તેમણે લશ્કરી ખર્ચમાં વધારો કર્યો છે, સાથે સાથે આર્થિક પેકેજ અને ટેક્સમાં રાહતની જાહેરાત કરી છે.

તકાઈચીએ વધતી મોંઘવારી સામે રાહત આપવા માટે ખાદ્ય પદાર્થો પર લાગતા 8% સેલ્સ ટેક્સને બે વર્ષ માટે સ્થગિત કરવાનો વચન આપ્યો છે.

વ્યૂહાત્મક સલાહકાર કંપની FGS Globalના મેનેજિંગ ડિરેક્ટર સેઇજી ઇનાડાના જણાવ્યા અનુસાર, “જો તકાઈચી મોટી જીત નોંધાવે છે તો તેમને ટેક્સ કપાત જેવા મહત્વના નિર્ણયો અમલમાં મૂકવાની સંપૂર્ણ સ્વતંત્રતા મળશે.”

ટ્રમ્પનું ખુલ્લું સમર્થન

અમેરિકી રાષ્ટ્રપતિ ડોનાલ્ડ ટ્રમ્પએ પણ સાને તકાઈચીને ખુલ્લું સમર્થન આપ્યું હતું. 5 ફેબ્રુઆરીએ કરેલી પોસ્ટમાં ટ્રમ્પે તકાઈચીને “મજબૂત, શક્તિશાળી અને બુદ્ધિશાળી નેતા” ગણાવ્યા હતા.

ટ્રમ્પે જણાવ્યું કે તેઓ 19 માર્ચ 2026ના રોજ વ્હાઇટ હાઉસમાં તકાઈચીને મળશે. નોંધનીય છે કે જાપાનની 8 ફેબ્રુઆરી 2026ની ચૂંટણીના માત્ર બે દિવસ પહેલાં આ સમર્થન જાહેર કરવામાં આવ્યું હતું. આ પહેલી વખત છે જ્યારે કોઈ અમેરિકી રાષ્ટ્રપતિએ જાપાનના નેતાને ચૂંટણી દરમિયાન ખુલ્લેઆમ સમર્થન આપ્યું હોય.

સોશિયલ મીડિયામાં ‘સાનાકાત્સુ’ ટ્રેન્ડ

સાને તકાઈચી સોશિયલ મીડિયામાં પણ ભારે લોકપ્રિય બન્યા છે. તેમના નામ પરથી ‘સાનાકાત્સુ’ નામનો ટ્રેન્ડ ચાલી રહ્યો છે, જેમાં તેમની હેન્ડબેગ, સંસદમાં વપરાતી ગુલાબી પેન જેવી વસ્તુઓ યુવાનોમાં ફેશન સ્ટેટમેન્ટ બની ગઈ છે.

એક સર્વે અનુસાર, 30 વર્ષથી ઓછી ઉંમરના 90%થી વધુ મતદારો તકાઈચીની તરફેણમાં છે, જોકે આ વર્ગ સામાન્ય રીતે ઓછું મતદાન કરે છે.

બરફવર્ષા વચ્ચે મતદાન

ચૂંટણીના દિવસે જાપાનના અનેક વિસ્તારોમાં ભારે બરફવર્ષા થઈ હતી. પરિવહન મંત્રાલય અનુસાર, ડઝનબંધ ટ્રેન સેવાઓ રોકવી પડી અને 230 સ્થાનિક ફ્લાઇટ્સ રદ કરવી પડી.

ઘણા મતદાન મથકોને સમય પહેલાં બંધ કરવાં પડ્યા, છતાં લોકો બરફ અને કડકડતી ઠંડીમાં મતદાન કરવા પહોંચ્યા. નિક્કેઈ અખબાર મુજબ, મતદાન પૂર્ણ થવાના ચાર કલાક પહેલાં સુધી મતદાન 21.6% નોંધાયું હતું, જે 2024ની ચૂંટણી કરતાં ઓછું હતું.

ચૂંટણી કેમ મહત્વની છે?

આ ચૂંટણી માત્ર જાપાનની આંતરિક રાજનીતિ માટે નહીં, પરંતુ ઇન્ડો-પેસિફિક ક્ષેત્રની સુરક્ષા, આર્થિક નીતિઓ અને આંતરરાષ્ટ્રીય સંબંધો માટે પણ અત્યંત મહત્વની માનવામાં આવી રહી છે.

તકાઈચીનું કહેવું છે કે આ ચૂંટણી તેમના રૂઢિચુસ્ત એજન્ડા—રાષ્ટ્રીય સુરક્ષા મજબૂત કરવી, ઇમિગ્રેશન સુધારા અને ચીન પરની આર્થિક નિર્ભરતા ઘટાડવા—માટે જનાદેશ છે.