ગુજરાતમાં મારુતિ સુઝુકીનું મેગા પ્રોજેક્ટ: ખોરજમાં ₹35,000 કરોડનું રોકાણ, 10 લાખ કાર પ્રતિ વર્ષનું ઉત્પાદન

ગાંધીનગરના ખોરજ ખાતે મારુતિ સુઝુકી ઇન્ડિયા લિમિટેડ દ્વારા રૂ. 35,000 કરોડના માતબર રોકાણ સાથે વિશ્વકક્ષાનો વ્હિકલ મેન્યુફેક્ચરિંગ પ્લાન્ટ સ્થાપિત થવાનો છે. 17 જાન્યુઆરીએ મુખ્યમંત્રી ભૂપેન્દ્ર પટેલની પ્રેરક ઉપસ્થિતિમાં આ પ્રોજેક્ટ માટેનું ઇન્વેસ્ટમેન્ટ લેટર હેન્ડઓવર સેરેમની યોજાઈ હતી. આ અવસરે રાજ્ય સરકાર અને મારુતિ સુઝુકી વચ્ચે રોકાણ એગ્રીમેન્ટ પર સત્તાવાર રીતે હસ્તાક્ષર થયા હતા.

1750 એકરમાં વિશ્વકક્ષાનો પ્લાન્ટ

ખોરજ ખાતે 1750 એકર જમીન પર બનનારો આ પ્લાન્ટ દર વર્ષે કુલ 10 લાખ કારનું ઉત્પાદન કરવાની ક્ષમતા ધરાવશે. પ્રોજેક્ટ અંતર્ગત 2.5 લાખ કાર ક્ષમતા ધરાવતા ચાર પ્લાન્ટ સ્થાપિત કરાશે. કંપનીનું આયોજન છે કે પ્રથમ પ્લાન્ટનું ઉત્પાદન 2029ના નાણાકીય વર્ષથી શરૂ થશે.

રોજગારીની મોટી તક

આ પ્રોજેક્ટથી સીધા અંદાજે 12,000થી વધુ લોકોને રોજગાર મળશે, જ્યારે એન્સિલીયરી યુનિટ્સ, MSME અને સપ્લાય ચેઇનના વિકાસથી લગભગ 7.5 લાખ જેટલી પરોક્ષ રોજગારીનું સર્જન થવાની શક્યતા છે. હાંસલપુર બાદ માત્ર 66 કિમી અંતરે ખોરજમાં બીજો પ્લાન્ટ બનતા ગુજરાતનું ઓટોમોબાઈલ હબ તરીકે સ્થાન વધુ મજબૂત બનશે.

રાજ્ય સરકાર અને કંપની વચ્ચે સહયોગ

ઇન્વેસ્ટમેન્ટ લેટર હેન્ડઓવર સેરેમનીમાં મુખ્યમંત્રી ભૂપેન્દ્ર પટેલ અને મારુતિ સુઝુકીના મેનેજિંગ ડિરેક્ટર હિતાશી તાકેઉચીની ઉપસ્થિતિમાં એગ્રીમેન્ટ લેટર આપવામાં આવ્યું. આ કાર્યક્રમમાં નાયબ મુખ્યમંત્રી હર્ષ સંઘવી સહિત રાજ્યના વરિષ્ઠ અધિકારીઓ અને કંપનીના ટોચના અધિકારીઓ હાજર રહ્યા હતા.

‘ગુજરાત-જાપાન ઉદ્યોગ સંબંધોને નવી મજબૂતી’

મુખ્યમંત્રીએ જણાવ્યું હતું કે આ માત્ર એક નવો પ્લાન્ટ નથી, પરંતુ દેશના સૌથી મોટા અને સ્પર્ધાત્મક ઓટોમોબાઈલ મેન્યુફેક્ચરિંગ કોરિડોરને વધુ મજબૂત બનાવવાનું મહત્વપૂર્ણ પગલું છે. ગુજરાત, ભારત અને જાપાન વચ્ચેના મજબૂત ઉદ્યોગ સંબંધોનું આ ઉત્તમ ઉદાહરણ છે.

2029 પહેલા 20 લાખ કારનું ઉત્પાદન લક્ષ્ય

નાયબ મુખ્યમંત્રી હર્ષ સંઘવીએ જણાવ્યું કે ગુજરાતમાં મારુતિ સુઝુકીનું વાર્ષિક ઉત્પાદન પહેલેથી જ સાડા સાત લાખ કાર સુધી પહોંચ્યું છે. 2026ના અંત અથવા 2027ની શરૂઆતમાં તે 10 લાખ કાર થશે અને નવા રોકાણ બાદ 2029 પહેલા 20 લાખ કારનું વાર્ષિક ઉત્પાદન શક્ય બનશે.

ઓટોમોબાઈલ હબ તરીકે ગુજરાત

સંઘવીએ જણાવ્યું કે આ રોકાણથી ગુજરાતમાં ઓટોમોબાઈલ મેન્યુફેક્ચરિંગ હબ અને મજબૂત ઇકો-સિસ્ટમ ઉભી થશે. સીધી રીતે 12 હજાર લોકોને રોજગારી મળશે અને પરોક્ષ રીતે હજારો પરિવારોની આવક વધશે. આ સફળતા પાછળ ગુજરાત સરકારની ઉદ્યોગમૈત્રી નીતિઓ અને સતત પ્રયાસો મહત્વપૂર્ણ ભૂમિકા ભજવી રહ્યા છે.

આ મેગા પ્રોજેક્ટ સાથે ગુજરાત દેશના ઓટોમોબાઈલ ક્ષેત્રમાં આગવું સ્થાન મેળવવાની દિશામાં વધુ એક મોટું પગલું આગળ વધારશે.