મુંબઈનો બોસ ભાજપ! BMCમાં બહુમતીને પાર, ઠાકરે બ્રધર્સનો ખેલ ખતમ

મુંબઈ સહિત સમગ્ર મહારાષ્ટ્રની નજર દેશની સૌથી અમીર મ્યુનિસિપલ સંસ્થા બૃહન્મુંબઈ મ્યુનિસિપલ કોર્પોરેશન (BMC)ના પરિણામો પર હતી. પ્રારંભિક વલણો મુજબ ભાજપ ગઠબંધને ઐતિહાસિક સિદ્ધિ મેળવી છે. રાજ્યની 29 મ્યુનિસિપલ કોર્પોરેશનોમાંથી 23માં ભાજપ ગઠબંધન આગળ છે. મુંબઈ, પુણે, નાગપુર અને નાસિક જેવા મહાનગરોમાં ભાજપે નોંધપાત્ર લીડ મેળવી છે, જ્યારે લાતુર અને ચંદ્રપુરમાં કોંગ્રેસ આગળ છે.

BMCમાં ભાજપની ઐતિહાસિક લીડ

227 બેઠકો ધરાવતી BMCમાં બહુમતી માટે 114 બેઠકો જરૂરી છે. તાજેતરના વલણો મુજબ ભાજપ ગઠબંધન 115થી વધુ બેઠકો પર આગળ છે. આ સાથે પહેલીવાર ભાજપે BMCમાં બહુમતીનો આંકડો પાર કર્યો છે. ઉદ્ધવ ઠાકરેના નેતૃત્વ હેઠળની શિવસેના ગઠબંધનને અહીં મોટો ફટકો પડ્યો છે, જ્યારે કોંગ્રેસ માત્ર થોડા વોર્ડમાં સીમિત રહી છે.

પાંચ મહાનગરોની સ્થિતિ

મુંબઈ (227 બેઠકો, બહુમતી 114)

• BJP+: 118
• ઉદ્ધવ શિવસેના+: 70
• કોંગ્રેસ: 12

પુણે (165 બેઠકો, બહુમતી 83)

• BJP+: 90
• NCP+: 20
• કોંગ્રેસ+UBT: 10

થાણે (131 બેઠકો, બહુમતી 66)

• BJP+: 49
• NCP (અજિત): 8
• અન્ય: 9

નાગપુર (151 બેઠકો, બહુમતી 76)

• BJP+: 113
• કોંગ્રેસ: 30

નાસિક (122 બેઠકો, બહુમતી 62)

• BJP: 50
• શિવસેના-શિંદે+NCP: 41

ભાજપમાં ઉજવણી, વિરોધ પક્ષોમાં નિરાશા

મુંબઈ, પુણે અને દિલ્હીમાં ભાજપ કાર્યાલયોમાં જીતની ઉજવણી શરૂ થઈ ગઈ છે. મુખ્યમંત્રી દેવેન્દ્ર ફડણવીસ બપોરે ભાજપ કાર્યાલય પહોંચીને કાર્યકરોને સંબોધન કરશે. ભાજપના નેતા સુધાંશુ ત્રિવેદીએ કહ્યું કે, “આ પરિણામો દર્શાવે છે કે પીએમ મોદીના નેતૃત્વ પર જનતાનો વિશ્વાસ સતત વધી રહ્યો છે. BMC જેવી એશિયાની સૌથી મોટી મ્યુનિસિપલ સંસ્થામાં ભાજપની જીત ઐતિહાસિક છે.”

મંત્રી ઉદય સામંતે કહ્યું કે, “મુંબઈના વિકાસ માટે જે વચનો આપ્યા હતા, તે જનતાએ સ્વીકારી લીધા છે. મહાયુતિ મોટા માર્જિનથી જીતશે.”

કોંગ્રેસ અને AIMIMની પ્રતિક્રિયા

લાતુર અને ચંદ્રપુરમાં કોંગ્રેસ આગળ હોવા છતાં, પાર્ટી રાજ્યભરમાં પાછળ પડી છે. AIMIMના નેતા વારિસ પઠાણે કહ્યું કે તેમની પાર્ટી અનેક બેઠકો પર આગળ છે અને અંતિમ પરિણામો બાદ ચિત્ર વધુ સ્પષ્ટ થશે.

મતદાન અને ઉમેદવારો

મહારાષ્ટ્રમાં 15 જાન્યુઆરીએ મ્યુનિસિપલ ચૂંટણી યોજાઈ હતી. રાજ્યના 893 વોર્ડમાં કુલ 15,931 ઉમેદવારો મેદાનમાં હતા. મતદાન બાદ આજે સવારે 10 વાગ્યાથી મતગણતરી શરૂ થઈ હતી.

રાજકીય અર્થ

આ પરિણામોને 2029ની લોકસભા અને આવનારી વિધાનસભા ચૂંટણી માટે સેમિફાઇનલ તરીકે જોવામાં આવી રહ્યા છે. BMCમાં ભાજપની બહુમતીને ઉદ્ધવ ઠાકરે અને રાજ ઠાકરેના ગઠબંધન માટે મોટો ઝટકો માનવામાં આવી રહ્યો છે.

મહારાષ્ટ્ર મ્યુનિસિપલ કોર્પોરેશન ચૂંટણી 2026

વિગત	આંકડો
કુલ બેઠકો	2869
પરિણામ જાહેર	2801
બાકી બેઠકો	68
કુલ મતદાર	3.48 કરોડ
કુલ મ્યુનિસિપલ કોર્પોરેશન	29

---

29 મ્યુનિસિપલ કોર્પોરેશનની યાદી

ક્રમાંક	મ્યુનિસિપલ કોર્પોરેશન
1	બૃહન્મુંબઈ
2	પુણે
3	થાણે
4	નાગપુર
5	નવી મુંબઈ
6	નાસિક
7	સોલાપુર
8	વસઈ-વિરાર
9	મીરા-ભાયંદર
10	કોલ્હાપુર
11	અમરાવતી
12	અકોટા
13	ઉલ્હાસનગર
14	માલેગાંવ
15	ધુલે
16	જલગાંવ
17	લાતુર
18	પરભણી
19	ચંદ્રપુર
20	પનવેલ
21	અહમદનગર
22	ઇચલકરંજી
23	પિંપરી-ચિંચવડ
24	જાલના
25	કલ્યાણ-ડોમ્બિવલી
26	છત્રપતિ સંભાજીનગર
27	ભિવંડી-નિઝામપુર
28	નાંદેડ-વાઘાલા
29	સાંગલી-મીરજ-કુપવાડ

મહારાષ્ટ્રની મ્યુનિસિપલ ચૂંટણીમાં ભાજપ ગઠબંધને રાજ્યભરમાં પોતાનો દબદબો સાબિત કર્યો છે. ખાસ કરીને BMCમાં પહેલીવાર બહુમતી મેળવીને ભાજપે મુંબઈના રાજકારણમાં નવું અધ્યાય શરૂ કર્યો છે. હવે તમામની નજર અંતિમ પરિણામો અને નવી મ્યુનિસિપલ સરકારની રચનાની પ્રક્રિયા પર રહેશે.