PM મોદી અને જર્મન ચાન્સેલરની ગુજરાત મુલાકાતને લઈ તડામાર તૈયારીઓ: ગાંધી આશ્રમથી રિવરફ્રન્ટ સુધી સુરક્ષા વ્યવસ્થા કડક

આગામી 11 અને 12 જાન્યુઆરીના રોજ વડાપ્રધાન નરેન્દ્ર મોદી તેમજ જર્મન ચાન્સેલરની ગુજરાત મુલાકાતને લઈને અમદાવાદમાં તૈયારીઓનો ધમધમાટ શરૂ થઈ ગયો છે. બંને મહાનુભાવોની બે દિવસની મુલાકાતને ધ્યાનમાં રાખીને વહીવટી તંત્ર અને પોલીસ વિભાગ એલર્ટ મોડમાં આવી ગયો છે. વડાપ્રધાન અને જર્મન ચાન્સેલર અમદાવાદમાં ગાંધી આશ્રમ તેમજ સાબરમતી રિવરફ્રન્ટ પર યોજાનારા કાઈટ ફેસ્ટિવલની મુલાકાત લેશે.

જર્મન ચાન્સેલર અમદાવાદ ખાતે આવેલી ITC નર્મદા હોટેલમાં રોકાય તેવી સંભાવના છે. સમગ્ર કાર્યક્રમને લઈને સુરક્ષા વ્યવસ્થાને અગ્રતા આપવામાં આવી રહી છે.

ઉચ્ચ પોલીસ અધિકારીઓએ સ્થળ નિરીક્ષણ કર્યું

પોલીસ કમિશનર જી.એસ. મલિક, સેક્ટર-1 JCP નીરજ બડગુજર, JCP એન.એન. ચૌધરી, ડીસીપી ઝોન-1 હર્ષદ પટેલ, ડીસીપી ભાવના પટેલ સહિતના ઉચ્ચ અધિકારીઓએ સાબરમતી રિવરફ્રન્ટ, મેટ્રો સ્ટેશન અને ગાંધી આશ્રમની મુલાકાત લઈ સુરક્ષા વ્યવસ્થાનું સ્થળ નિરીક્ષણ કર્યું હતું. તમામ સંવેદનશીલ વિસ્તારોમાં વધારાનો પોલીસ બંદોબસ્ત ગોઠવવાની યોજના બનાવવામાં આવી છે.

PMના આગમનને લઈ રંગરોગાન શરૂ

વડાપ્રધાનના આગમનને લઈને તેમના રૂટ પર રંગરોગાન, ફૂટપાથનું નવીનીકરણ અને રોડની દિવાલોને કલર કરવાની કામગીરી શરૂ કરી દેવામાં આવી છે. નવરંગપુરા ટાઈમ્સ ઓફ ઇન્ડિયા ચાર રસ્તા પાસે આવેલા સોમેશ્વર મહાદેવ મંદિરની આજુબાજુ પણ મોટા બેનરો લગાવી મંદિરને ઢાંકી દેવામાં આવ્યું છે. અમદાવાદ શહેરની હેરિટેજ જગ્યાઓના વિશેષ બેનરો લગાવવામાં આવ્યા છે.

11મીએ ગાંધી આશ્રમની મુલાકાત

સંભવિત કાર્યક્રમ મુજબ વડાપ્રધાન નરેન્દ્ર મોદી 11 જાન્યુઆરીએ રાજકોટથી સીધા અમદાવાદ આવશે. સાંજે તેઓ ગાંધી આશ્રમની મુલાકાત લેશે. જર્મન ચાન્સેલર પણ અમદાવાદ પહોંચશે, જ્યાં વડાપ્રધાન તેમનું સ્વાગત કરશે. ત્યારબાદ બંને મહાનુભાવો સાથે ગાંધી આશ્રમની મુલાકાત લેશે.

12મીએ કાઈટ ફેસ્ટિવલનું ઉદ્ઘાટન

12 જાન્યુઆરીના રોજ સવારે 8 વાગ્યે વડાપ્રધાન નરેન્દ્ર મોદી અને જર્મન ચાન્સેલર સાબરમતી રિવરફ્રન્ટ ખાતે કાઈટ ફેસ્ટિવલનું ઉદ્ઘાટન કરશે. ત્યારબાદ બંને મહાનુભાવો ઇન્કમટેક્સ પાસે આવેલા ઓલ્ડ હાઇકોર્ટ મેટ્રો સ્ટેશનથી મેટ્રો ટ્રેનમાં બેસીને ગાંધીનગર મહાત્મા મંદિર જશે.

PM મોદીનો ગુજરાત પ્રવાસ કાર્યક્રમ

📅 10 જાન્યુઆરી

સમય	કાર્યક્રમ
4:25	રાજકોટ એરપોર્ટ પહોંચશે
5:35	સોમનાથ હેલિપેડ
5:45	સોમનાથ લાઇટ ડાર્મ (રાત્રિવાસ)

📅 11 જાન્યુઆરી

સમય	કાર્યક્રમ
9:45	સોમનાથમાં દર્શન અને પૂજા
10:25	રોટે યાત્રા (રોડ શો)
11:00	સભાને સંબોધન
12:10	સોમનાથ હેલિપેડથી રાજકોટ રવાના
1:30	રાજકોટ મારવાડી યુનિ.માં કાર્યક્રમ
3:55	રાજકોટ હેલિપેડથી અમદાવાદ રવાના
5:00	સાબરમતી આશ્રમની મુલાકાત
6:30	ગાંધીનગર રાજભવન (રાત્રિવાસ)

📅 12 જાન્યુઆરી

સમય	કાર્યક્રમ
8:25	અમદાવાદ સાબરમતી આશ્રમ
9:00	સાબરમતી રિવરફ્રન્ટ
9:40	જૂની હાઇકોર્ટ મેટ્રો સ્ટેશનથી મડાલા મંદિર સુધી મુસાફરી
10:55	મડાલા મંદિરે કાર્યક્રમ
11:00	કેન્દ્રીય રિપબ્લિક ઓફ જર્મનીના ચાન્સેલર સાથે મુલાકાત
2:30	અમદાવાદ એરપોર્ટથી દિલ્હી રવાના

ગાંધી આશ્રમ અને રિવરફ્રન્ટ ખાતે તડામાર તૈયારીઓ

વડાપ્રધાન અને જર્મન ચાન્સેલરના કાર્યક્રમને લઈ ગાંધી આશ્રમ તેમજ સાબરમતી રિવરફ્રન્ટ ખાતે વિશેષ તૈયારીઓ કરવામાં આવી રહી છે. આજે રાજ્યના ચીફ સેક્રેટરી, ઉચ્ચ પોલીસ અધિકારીઓ અને ગાંધી આશ્રમ પ્રોજેક્ટના અધિકારીઓ સહિતના વહીવટી અધિકારીઓએ ગાંધી આશ્રમની મુલાકાત લઈ તૈયારીઓ અને સુરક્ષા વ્યવસ્થાની સમીક્ષા કરી હતી.

પોલીસ બંદોબસ્ત કડક

કોઈ અનિચ્છનીય ઘટના ન બને તે માટે સમગ્ર રૂટ પર ચુસ્ત પોલીસ બંદોબસ્ત ગોઠવવામાં આવ્યો છે. જિલ્લા પોલીસ વડા સહિતના ઉચ્ચ અધિકારીઓએ સ્થળ નિરીક્ષણ કરી તમામ અધિકારીઓને જરૂરી સૂચનાઓ આપી છે.

વડાપ્રધાન અને જર્મન ચાન્સેલરની આ મુલાકાત ગુજરાત માટે રાજકીય તેમજ આંતરરાષ્ટ્રીય દ્રષ્ટિએ મહત્વપૂર્ણ માનવામાં આવી રહી છે. અમદાવાદ શહેર હાલમાં મહેમાનોના સ્વાગત માટે સંપૂર્ણ રીતે સજ્જ બનતું જોવા મળી રહ્યું છે.