વડાપ્રધાન નરેન્દ્ર મોદી આગામી 11 અને 12 જાન્યુઆરીએ ગુજરાતના મહેમાન બનશે. બે દિવસીય ગુજરાત પ્રવાસ દરમિયાન વડાપ્રધાન રાજકોટ અને અમદાવાદમાં વિવિધ મહત્વપૂર્ણ કાર્યક્રમોમાં ભાગ લેશે. 11 જાન્યુઆરીએ વડાપ્રધાન રાજકોટ પહોંચીને સૌરાષ્ટ્ર-કચ્છ રીજનલ વાયબ્રન્ટ સમિટ–2026નું ઉદ્ઘાટન કરશે, જ્યારે 12 જાન્યુઆરીએ અમદાવાદમાં આંતરરાષ્ટ્રીય કાઈટ ફેસ્ટિવલનો પ્રારંભ કરાવશે.
રાજકોટમાં રોડ શો અને વાયબ્રન્ટ સમિટનું ઉદ્ઘાટન
પ્રભારી મંત્રી જિતુ વાઘાણીના જણાવ્યા અનુસાર, વડાપ્રધાન મોદી 11 જાન્યુઆરીના બપોરે રાજકોટના જૂના એરપોર્ટ ખાતે પહોંચશે. ત્યાં મુખ્યમંત્રી ભૂપેન્દ્ર પટેલ, નાયબ મુખ્યમંત્રી હર્ષ સંઘવી અને ભાજપ પ્રદેશ પ્રમુખ જગદીશ વિશ્વકર્મા દ્વારા સ્વદેશી થીમ સાથે તેમનું ભવ્ય સ્વાગત કરવામાં આવશે. બાદમાં જૂના એરપોર્ટથી મારવાડી યુનિવર્સિટી સુધી લગભગ એક કિલોમીટર લાંબો રોડ શો યોજાશે.
રાજકોટની મારવાડી યુનિવર્સિટીમાં 11 અને 12 જાન્યુઆરી દરમિયાન સૌરાષ્ટ્ર-કચ્છ રીજનલ વાયબ્રન્ટ સમિટ યોજાવાની છે. આ સમિટમાં વડાપ્રધાનના હસ્તે ટ્રેડ શોનું ઉદ્ઘાટન કરવામાં આવશે. સમિટમાં જાપાન, યુક્રેન, રિપબ્લિક ઓફ કોરિયા, રવાન્ડા સહિત કુલ 22 દેશો ભાગ લેશે. અત્યાર સુધીમાં 6,364 ઉદ્યોગકારોના રજિસ્ટ્રેશન થઈ ચૂક્યા છે.
વિશાળ ટ્રેડ શો અને ઉદ્યોગકારોને વૈશ્વિક મંચ
26400 ચોરસ મીટરમાં ટ્રેડ શો યોજાશે, જે અગાઉ મહેસાણામાં યોજાયેલી રીજનલ સમિટ કરતાં પણ મોટો હશે. ઉપરાંત 4500 ચોરસ મીટરમાં MSME, કુટીર અને હસ્તકલા ઉદ્યોગ માટે વિશેષ પેવેલિયન બનાવવામાં આવ્યો છે. અહીં ‘વન ડિસ્ટ્રિક્ટ વન પ્રોડક્ટ’, GI ટેગ ડિસ્પ્લે, ડેઇલી લક્કી ડ્રો અને કારીગરોના લાઇવ ઉત્પાદન જેવા આકર્ષણો રહેશે. અદાણી, રિલાયન્સ અને ટાટા કેમિકલ જેવી મોટી કંપનીઓ પણ વિવિધ ક્ષેત્રોમાં સહભાગી બનશે. બે દિવસ દરમિયાન 20થી વધુ સેમિનાર હોલમાં અલગ-અલગ વિષય પર સેમિનારો યોજાશે.
અમદાવાદમાં કાઈટ ફેસ્ટિવલ અને ફ્લાવર શોમાં હાજરી
12 જાન્યુઆરીએ વડાપ્રધાન મોદી અમદાવાદમાં સાબરમતી રિવરફ્રન્ટ ખાતે યોજાનારા આંતરરાષ્ટ્રીય કાઈટ ફેસ્ટિવલનું ઉદ્ઘાટન કરે એવી શક્યતા છે. સાથે સાથે તેઓ ફ્લાવર શોની પણ મુલાકાત લેશે. વડાપ્રધાન અમદાવાદમાં નાનો રોડ શો કરે તેવી પણ ચર્ચા છે.
જર્મનીના ચાન્સેલર સાથે સંભવિત મુલાકાત
કાઈટ ફેસ્ટિવલ દરમિયાન જર્મનીના ચાન્સેલર પણ ગુજરાતના મહેમાન બનવાની શક્યતા છે. આ દરમિયાન વડાપ્રધાન મોદી અને જર્મનીના ચાન્સેલર વચ્ચે મુલાકાત થઈ શકે છે. બંને નેતાઓ ગાંધી આશ્રમ અને સાબરમતી રિવરફ્રન્ટની મુલાકાત લે તેવી પણ સંભાવના છે. આ ઉપરાંત મેટ્રો ટ્રેન ફેઝ-2 અને બુલેટ ટ્રેન પ્રોજેક્ટ અંગે રાજ્યના અધિકારીઓ સાથે ચર્ચા થવાની શક્યતા છે.
રાજકોટ ચેમ્બર ઓફ કોમર્સની આશા
રાજકોટ ચેમ્બર ઓફ કોમર્સ એન્ડ ઇન્ડસ્ટ્રીઝના પ્રમુખ વી.પી. વૈષ્ણવે જણાવ્યું કે વાયબ્રન્ટ ગુજરાત રીજનલ કોન્ફરન્સ સૌરાષ્ટ્ર-કચ્છની અર્થવ્યવસ્થાને મોટો બૂસ્ટ આપશે. આ સમિટથી ઓટોપાર્ટ્સ, ઓટોમોબાઈલ, સિરામિક, એગ્રી-કોમોડિટી અને MSME ક્ષેત્રોને સીધો લાભ મળશે અને સ્થાનિક ઉત્પાદકોને વૈશ્વિક બજાર મળશે.
₹1000 કરોડના MoUની તૈયારી
આ પ્રસંગે મારવાડી યુનિવર્સિટી રાજ્યના શિક્ષણ વિભાગ સાથે રૂ.1000 કરોડના ઇન્વેસ્ટમેન્ટ માટે મહત્વપૂર્ણ MoU કરવા માટે પ્રસ્તાવ રજૂ કરશે. આગામી ત્રણ વર્ષમાં નવી જમીન પર આધુનિક શૈક્ષણિક બ્લોક્સ અને ઇન્ફ્રાસ્ટ્રક્ચર વિકસાવાશે, જેનાથી ગુજરાતને શિક્ષણ ક્ષેત્રે નવી ઓળખ મળશે.
વડાપ્રધાનના કાર્યક્રમોને ધ્યાનમાં રાખીને રાજકોટ અને અમદાવાદમાં વહીવટીતંત્ર દ્વારા તડામાર તૈયારીઓ શરૂ કરી દેવામાં આવી છે અને સુરક્ષા તથા વ્યવસ્થાઓને અંતિમ સ્વરૂપ આપવામાં આવી રહ્યું છે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
