ભારતીય રેલવેની નવી પેઢીની પહેલી વંદે ભારત સ્લીપર ટ્રેન ગુવાહાટીથી કોલકાતા (હાવડા) વચ્ચે ચલાવવામાં આવશે. રેલવે દ્વારા આ ટ્રેનના ભાડાં પણ નક્કી કરવામાં આવ્યા છે. ગુવાહાટી–હાવડા રૂટ પર થર્ડ એસીનું ભાડું ₹2,300, સેકન્ડ એસીનું ₹3,000 અને ફર્સ્ટ ACનું ભાડું આશરે ₹3,600 રાખવાનો પ્રસ્તાવ છે. આ ભાડાં હવાઈ મુસાફરીની સરખામણીમાં ઘણી ઓછી કિંમતના હોવાથી લાંબા અંતરની મુસાફરી માટે મોટી રાહત સાબિત થશે.
ટેસ્ટિંગ, ટ્રાયલ અને સર્ટિફિકેશન પૂર્ણ
રેલમંત્રી અશ્વિની વૈષ્ણવે ગુરુવારે પ્રેસ કોન્ફરન્સમાં જણાવ્યું હતું કે વંદે ભારત સ્લીપર ટ્રેનનું ટેસ્ટિંગ, ટ્રાયલ અને સર્ટિફિકેશન પૂર્ણ થઈ ગયું છે. આ ટ્રેન ખાસ કરીને 1000 કિલોમીટરથી વધુ લાંબા અંતરની યાત્રાને ધ્યાનમાં રાખીને ડિઝાઇન કરવામાં આવી છે. તેમણે ઉમેર્યું કે આ વર્ષના અંત સુધીમાં આશરે 12 વંદે ભારત સ્લીપર ટ્રેનો તૈયાર થઈ જશે.
180 કિમીની ઝડપે પણ પાણી ન છલકાયું
બે દિવસ અગાઉ વંદે ભારત સ્લીપર ટ્રેનનું ટ્રાયલ રન કોટા–નાગદા રેલવે ટ્રેક પર કરવામાં આવ્યું હતું. આ દરમિયાન ટ્રેન 180 કિલોમીટર પ્રતિ કલાકની ઝડપે દોડી. ટ્રાયલ વખતે લોકોપાઇલટે કેબિનમાં ચાર ગ્લાસમાં પાણી રાખ્યું હતું, પરંતુ આટલી તેજ ઝડપે પણ ગ્લાસમાંથી પાણી છલકાયું નહોતું. આ દ્રશ્ય ટ્રેનની એડવાન્સ્ડ સસ્પેન્શન સિસ્ટમ અને આરામદાયક મુસાફરીની ક્ષમતાનું જીવંત ઉદાહરણ બની ગયું.
વંદે ભારત સ્લીપર ટ્રેનની ખાસિયતો
વંદે ભારત સ્લીપર ટ્રેનમાં કુલ 16 કોચ હશે. તેમાં 11 થર્ડ એસી, 4 સેકન્ડ એસી અને 1 ફર્સ્ટ AC કોચ સામેલ છે. ઉપરના બર્થ સુધી સરળતાથી ચડવા માટે સીડીઓ આપવામાં આવી છે. ટ્રેનમાં વર્લ્ડ-ક્લાસ સ્લીપર કોચ, આધુનિક સેફ્ટી ફીચર્સ અને એડવાન્સ્ડ સસ્પેન્શન સિસ્ટમ આપવામાં આવી છે, જેથી લાંબી મુસાફરી વધુ આરામદાયક બની શકે.
PM મોદી કરશે લીલી ઝંડી
રેલમંત્રી વૈષ્ણવે જણાવ્યું હતું કે વડાપ્રધાન નરેન્દ્ર મોદી ટૂંક સમયમાં પહેલી વંદે ભારત સ્લીપર ટ્રેનને લીલી ઝંડી બતાવશે. વંદે ભારત ચેર કાર ટ્રેનોને લોકોનો ઉત્તમ પ્રતિસાદ મળ્યો છે અને હવે સ્લીપર વર્ઝન લાંબા અંતરની મુસાફરીમાં નવી ક્રાંતિ લાવશે.
બુલેટ ટ્રેન પર પણ મોટો અપડેટ
બુલેટ ટ્રેન પ્રોજેક્ટ અંગે રેલમંત્રીએ કહ્યું કે દેશની પહેલી બુલેટ ટ્રેન 15 ઓગસ્ટ 2027ના રોજ શરૂ થશે. શરૂઆતમાં સુરતથી બીલીમોરા સુધીનું સેક્શન ખુલશે. ત્યારબાદ વાપી–સુરત, વાપી–અમદાવાદ અને અંતે થાણેથી અમદાવાદ સુધીનો સમગ્ર રૂટ તબક્કાવાર શરૂ કરવામાં આવશે.
વંદે ભારત સ્લીપર ટ્રેન અને બુલેટ ટ્રેન બંને પ્રોજેક્ટ સાથે ભારતીય રેલવે હાઈસ્પીડ અને આરામદાયક મુસાફરીના નવા યુગમાં પ્રવેશ કરવા જઈ રહી છે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
