ગુજરાત લોકરક્ષક ભરતી: શારીરિક કસોટીનું પરિણામ જાહેર, 14 જૂને લેખિત પરીક્ષા

ગુજરાત રાજ્યમાં લોકરક્ષક ભરતી પ્રક્રિયાનું એક મહત્વપૂર્ણ તબક્કો પૂર્ણ થયો છે. લોકરક્ષક દળ (LRD) કેડરની શારીરિક કસોટી પૂર્ણ થયા બાદ તેનું પરિણામ સત્તાવાર રીતે જાહેર કરવામાં આવ્યું છે. 21 જાન્યુઆરી, 2026થી રાજ્યના 15 વિવિધ કેન્દ્રો પર યોજાયેલી આ કસોટી સફળતાપૂર્વક પૂર્ણ થઈ હતી, અને હવે ઉમેદવારો પોતાનું પરિણામ ઓનલાઈન ચેક કરી શકે છે.

ગુજરાત પોલીસ ભરતી બોર્ડ દ્વારા પોલીસ વિભાગના વર્ગ-3 હેઠળ પોલીસ સબ ઈન્સ્પેક્ટર (PSI) અને લોકરક્ષક દળ (LRD) માટે કુલ 13,591 જગ્યાઓ ભરવા ભરતી પ્રક્રિયા હાથ ધરવામાં આવી હતી. આમાં LRD માટે યોજાયેલી શારીરિક કસોટીમાં આશરે 10 લાખ ઉમેદવારોએ ભાગ લીધો હતો. જેમાંથી 2,63,344 ઉમેદવારો સફળ રહ્યા છે. તેમાં 1,73,112 પુરુષ, 89,405 મહિલા અને 827 માજી સૈનિક ઉમેદવારોનો સમાવેશ થાય છે. બોર્ડ દ્વારા દરેક ઉમેદવારનો ગ્રાઉન્ડ ટાઈમ સહિતની વિગતવાર યાદી પણ જાહેર કરવામાં આવી છે.

શારીરિક કસોટીમાં પાસ ઉમેદવાર

વર્ગ	ઉમેદવારોની સંખ્યા
પુરુષ	173112
મહિલા	89405
માજી સૈનિક	827

ઉમેદવારોની સુવિધા માટે ભરતી બોર્ડે પુરુષ, મહિલા અને માજી સૈનિક ઉમેદવારો માટે અલગ-અલગ લિંક્સ દ્વારા પરિણામ ઉપલબ્ધ કરાવ્યું છે. ઉમેદવારોને પોતાની કેટેગરી મુજબની લિંક પરથી માહિતી મેળવવાની સલાહ આપવામાં આવી છે.

શારીરિક કસોટી

ઉમેદવાર	દોડનું અંતર	સમયમર્યાદા
પુરુષ	5,000 મીટર	25 મિનિટ
મહિલા	1,600 મીટર	9.30 મિનિટ
માજી સૈનિક	2,400 મીટર	12.30 મિનિટ

આ સમગ્ર પ્રક્રિયામાં પારદર્શિતા જળવાઈ રહે તે માટે આધુનિક ટેક્નોલોજીનો ઉપયોગ કરવામાં આવ્યો હતો. RFID લૅપ ડેટા અને CCTV કેમેરાની મદદથી દરેક ઉમેદવારની કામગીરી પર નજર રાખવામાં આવી હતી. ઉપરાંત, શારીરિક માપદંડોની કસોટી દરમિયાન ઊંચાઈ સહિતના તમામ માપોની સઘન ચકાસણી કરવામાં આવી હતી. તમામ ચકાસણીઓ પૂર્ણ થયા બાદ જ પરિણામ જાહેર કરવામાં આવ્યું હોવાનું બોર્ડે જણાવ્યું છે.

ગુજરાત પોલીસમાં પદ વાર ખાલી જગ્યાઓ ની વિગત

પી.એસ.આઈ. (PSI)

પોસ્ટ	ખાલી જગ્યા
બિન હથિયારી પોલીસ સબ-ઇન્સ્પેક્ટર	659
હથિયારી પોલીસ સબ-ઇન્સ્પેક્ટર	129
જેલર ગ્રુપ-2	70
કુલ	858

શૈક્ષણિક લાયકાત:
ઉમેદવાર પાસે માન્ય યુનિવર્સિટી અથવા ગ્રેજ્યુએશનની ડિગ્રી જરૂરી.

---

લોકરક્ષક (LRD)

પોસ્ટ	ખાલી જગ્યા
બિન હથિયારી પોલીસ કોન્સ્ટેબલ	6942
હથિયારી પોલીસ કોન્સ્ટેબલ	2458
એસઆરપીએફ કોન્સ્ટેબલ	3002
જેલ સિપાઈ (પુરુષ)	300
જેલ સિપાઈ (મહિલા/મેટ્રન)	31
કુલ	12733

શૈક્ષણિક લાયકાત:
ઉમેદવાર ધોરણ 12 અથવા સમકક્ષ પરીક્ષા પાસ કરેલ હોવો જોઈએ.

ભરતી પ્રક્રિયા દરમિયાન જો કોઈ ઉમેદવાર તરફથી ગેરરીતિ કે ખોટી માહિતી સામે આવશે તો તેની ઉમેદવારી રદ કરવામાં આવશે. તેમજ સરકાર કે ન્યાયાલયના નવા આદેશો લાગુ પડશે તો તે તમામ ઉમેદવારો માટે બાધ્ય રહેશે.

હવે શારીરિક કસોટીમાં સફળ થયેલા ઉમેદવારો માટે આગામી તબક્કા તરીકે લેખિત પરીક્ષા 14 જૂન, 2026 (રવિવાર)ના રોજ યોજાશે. ઉમેદવારોને સમયસર તૈયારી શરૂ કરવાની સૂચના આપવામાં આવી છે.

જો કોઈ ઉમેદવારને પોતાના પરિણામ અંગે કોઈ વાંધો કે રજૂઆત કરવી હોય તો જરૂરી દસ્તાવેજો સાથે ગુજરાત પોલીસ ભરતી બોર્ડ, ગાંધીનગર ખાતે નિર્ધારિત સમયમર્યાદામાં લેખિતમાં રજૂઆત કરવાની રહેશે. સમયમર્યાદા બાદ મળતી રજૂઆતો માન્ય ગણાશે નહીં.

ઉમેદવારોને વધુ માહિતી અને અપડેટ્સ માટે સત્તાવાર વેબસાઈટની મુલાકાત લેવાની સલાહ આપવામાં આવી છે.