વર્ગ-3ની 5370 જગ્યાઓ પર ભરતીની મોટી જાહેરાત, 5 ફેબ્રુઆરીથી અરજી શરૂ

ગુજરાત ગૌણ સેવા પસંદગી મંડળ (GSSSB) દ્વારા રાજ્ય સરકારના વિવિધ વિભાગોમાં વર્ગ-3 (Group-A અને Group-B)ની મોટી ભરતી માટે સત્તાવાર જાહેરાત બહાર પાડવામાં આવી છે. આ ભરતી પ્રક્રિયા અંતર્ગત કુલ 5,370થી વધુ જગ્યાઓ ભરવામાં આવશે. રાજ્યના યુવાઓ માટે સરકારી નોકરી મેળવવાની આ એક મોટી અને મહત્વપૂર્ણ તક માનવામાં આવી રહી છે. આ ભરતી માટે 5 ફેબ્રુઆરી 2026થી ઓનલાઈન અરજી પ્રક્રિયા શરૂ થશે.

Group-A અને Group-B હેઠળ કેટલી જગ્યા?

જાહેરાત મુજબ Group-A કેટેગરી હેઠળ કુલ 2,365 જગ્યાઓ ઉપલબ્ધ છે. તેમાં સિનિયર ક્લાર્ક, હેડ ક્લાર્ક, ઓફિસ સુપ્રીન્ટેન્ડન્ટ સહિતના મહત્વના પદોનો સમાવેશ થાય છે. જ્યારે Group-B કેટેગરી હેઠળ કુલ 3,005 જગ્યાઓ માટે ભરતી કરવામાં આવશે, જેમાં મુખ્યત્વે જુનિયર ક્લાર્કના પદોનો સમાવેશ થાય છે.

અરજીની તારીખ અને પ્રક્રિયા

આ ભરતી માટે ઉમેદવારોને ગુજરાત સરકારના OJAS પોર્ટલ મારફતે ઓનલાઈન અરજી કરવાની રહેશે. અરજી પ્રક્રિયા 5 ફેબ્રુઆરી 2026થી શરૂ થશે અને 20 ફેબ્રુઆરી 2026 સુધી ચાલુ રહેશે. સમયમર્યાદા બાદ કોઈ પણ અરજી સ્વીકારવામાં આવશે નહીં, તેથી ઉમેદવારોને સમયસર અરજી કરવા સૂચના આપવામાં આવી છે.

સંયુક્ત સ્પર્ધાત્મક પરીક્ષા આધારિત ભરતી

GSSSB દ્વારા આ ભરતી પ્રક્રિયા સંયુક્ત સ્પર્ધાત્મક પરીક્ષા (Combined Competitive Examination) આધારે લેવામાં આવશે. પરીક્ષાના માધ્યમથી ઉમેદવારોની પસંદગી કરવામાં આવશે. પરીક્ષાની તારીખ, સિલેબસ અને પરીક્ષા પદ્ધતિ અંગેની માહિતી યોગ્ય સમયે જાહેર કરવામાં આવશે.

લાયકાત અને વયમર્યાદા

ભરતીને લઈને શૈક્ષણિક લાયકાત, વયમર્યાદા, આરક્ષણ નિયમો, પરીક્ષા પદ્ધતિ અને અન્ય તમામ વિગતવાર માહિતી ઉમેદવારોને GSSSBની અધિકૃત વેબસાઈટ પર ઉપલબ્ધ જાહેરાતમાં વાંચવાની રહેશે. ઉમેદવારોને સલાહ આપવામાં આવે છે કે અરજી કરતા પહેલા સત્તાવાર નોટિફિકેશન ધ્યાનપૂર્વક વાંચી લે.

યુવાઓ માટે મોટી તક

રાજ્ય સરકારના વિવિધ વિભાગોમાં ક્લાર્ક કેડરની આ મોટી ભરતીને કારણે રાજ્યના યુવાઓમાં ઉત્સાહ જોવા મળી રહ્યો છે. લાંબા સમય બાદ આવી મોટી સંખ્યામાં વર્ગ-3ની જગ્યાઓ માટે ભરતી જાહેર થતાં સરકારી નોકરી ઈચ્છુક ઉમેદવારો માટે આ એક સુવર્ણ તક સાબિત થઈ શકે છે.