CM ઓફિસ, AMC અને RSS કાર્યાલયને બોમ્બથી ઉડાવવાની ધમકી: સુરક્ષા એજન્સીઓ એલર્ટ મોડમાં

અમદાવાદ અને ગાંધીનગરમાં બોમ્બ બ્લાસ્ટની ગંભીર ધમકી મળતાં સુરક્ષા એજન્સીઓ હાઈ એલર્ટ પર આવી ગઈ છે. મુખ્યમંત્રી કાર્યાલય (CMO), અમદાવાદ મ્યુનિસિપલ કોર્પોરેશન (AMC)ની દાણાપીઠ સ્થિત મુખ્ય કચેરી અને RSS કાર્યાલયને નિશાન બનાવી જુદા-જુદા ઈ-મેલ આઈડી પરથી ધમકીભર્યા સંદેશા મોકલવામાં આવ્યા છે. ઈ-મેલમાં 10 જૂનથી 30 સપ્ટેમ્બર દરમિયાન અલગ-અલગ સ્થળોએ વિસ્ફોટ કરવાની ચેતવણી આપવામાં આવી છે, જેમાં CMOને બપોરે 1:11 વાગ્યે, AMC ઓફિસને 3:11 વાગ્યે અને RSS કચેરીને સાંજે 5:11 વાગ્યે ઉડાવી દેવાનો ઉલ્લેખ કરવામાં આવ્યો છે.

ધમકી મળતા જ અમદાવાદ અને ગાંધીનગરમાં પોલીસ, બોમ્બ ડિટેક્શન એન્ડ ડિસ્પોઝલ સ્કવોડ (BDDS), ફાયર બ્રિગેડ અને સાયબર ક્રાઈમની ટીમો સક્રિય થઈ ગઈ છે. ખાસ કરીને અમદાવાદ મ્યુનિસિપલ કોર્પોરેશનની દાણાપીઠ સ્થિત મુખ્ય કચેરીમાં હડકંપ મચી ગયો હતો. સુરક્ષાના ભાગરૂપે સમગ્ર બિલ્ડિંગ ખાલી કરાવવામાં આવ્યું હતું અને અંદર હાજર તમામ કર્મચારીઓ તથા મુલાકાતીઓને બહાર કાઢવામાં આવ્યા હતા.

AMCના મેયર, ડેપ્યુટી મેયર, સ્ટેન્ડિંગ કમિટી ચેરમેન, શાસક પક્ષના નેતા, દંડક સહિત મુખ્ય કચેરીના અધિકારીઓ અને સ્ટાફને પણ તાત્કાલિક બિલ્ડિંગની બહાર મોકલવામાં આવ્યા હતા. દાણાપીઠ ઓફિસના B અને C બ્લોકમાં આવેલી વિવિધ વિભાગોની કચેરીઓ પણ ખાલી કરાવવામાં આવી હતી. જન્મ-મરણ નોંધણી કોર્ટ અને ફૂડ વિભાગની કચેરીઓને પણ સુરક્ષાના કારણોસર બંધ કરીને તમામ લોકોને બહાર કાઢવામાં આવ્યા હતા.

પોલીસ, BDDS અને ફાયર વિભાગની ટીમોએ AMC બિલ્ડિંગના સરદાર પટેલ ભવન સહિત સમગ્ર પરિસરમાં સઘન તપાસ હાથ ધરી હતી. બિલ્ડિંગના દરેક ખૂણાની ચકાસણી કરવામાં આવી રહી છે અને કોઈ શંકાસ્પદ વસ્તુ મળી આવે તો તાત્કાલિક કાર્યવાહી માટે વિશેષ ટીમો તૈનાત કરવામાં આવી છે.

બીજી તરફ ગાંધીનગર સ્થિત મુખ્યમંત્રી કાર્યાલય બહાર પણ સુરક્ષા વ્યવસ્થા વધુ કડક બનાવવામાં આવી છે. CMO અને અન્ય સંવેદનશીલ સરકારી કચેરીઓની આસપાસ વધારાનો પોલીસ બંદોબસ્ત ગોઠવવામાં આવ્યો છે. નોંધનીય છે કે મુખ્યમંત્રી ભૂપેન્દ્ર પટેલ હાલમાં વડાપ્રધાન નરેન્દ્ર મોદી સાથે બેઠક માટે દિલ્હીમાં છે અને આ દરમિયાન જ ધમકીભર્યો ઈ-મેલ મળતા સુરક્ષા એજન્સીઓ વધુ સતર્ક બની ગઈ છે.

સાયબર ક્રાઈમની ટીમ ધમકીભર્યા ઈ-મેલના સ્ત્રોતની તપાસ કરી રહી છે. ઈ-મેલ કયા સર્વર અને IP એડ્રેસ પરથી મોકલવામાં આવ્યો હતો તેની ટેક્નિકલ તપાસ શરૂ કરવામાં આવી છે. પોલીસ અધિકારીઓના જણાવ્યા અનુસાર હાલમાં સમગ્ર મામલાને ગંભીરતાથી લેવામાં આવ્યો છે અને કોઈપણ પ્રકારની બેદરકારી રાખવામાં નહીં આવે.

ધમકીની ઘટનાને પગલે અમદાવાદ અને ગાંધીનગરના તમામ સંવેદનશીલ સ્થળોએ સુરક્ષા વ્યવસ્થા વધુ મજબૂત બનાવવામાં આવી છે. તપાસ પૂર્ણ થયા બાદ જ ધમકીની વાસ્તવિકતા અંગે સ્પષ્ટતા થઈ શકશે, પરંતુ હાલ સમગ્ર તંત્ર એલર્ટ મોડમાં છે.