ગુજરાતમાં ચોમાસાની એન્ટ્રી બાદ છેલ્લા કેટલાક દિવસથી વરસાદની ગતિ ધીમી પડી છે, પરંતુ હવે જુલાઈની શરૂઆત સાથે ફરી મેઘરાજા સક્રિય થવાના સંકેતો મળ્યા છે. હવામાન વિભાગે આજે રાજ્યના 19 જિલ્લામાં ગાજવીજ સાથે હળવાથી મધ્યમ વરસાદની આગાહી કરી છે. જ્યારે 1 જુલાઈથી સમગ્ર રાજ્યમાં વરસાદી માહોલ જામશે અને 2 જુલાઈએ દક્ષિણ ગુજરાતના કેટલાક જિલ્લાઓમાં ભારે વરસાદનું યલો એલર્ટ જાહેર કરવામાં આવ્યું છે.
સોમવાર, 29 જૂનની વહેલી સવારથી વલસાડ શહેર અને જિલ્લાના અનેક વિસ્તારોમાં હળવો વરસાદ શરૂ થયો હતો. વરસાદના કારણે લાંબા સમયથી ગરમી અને ઉકળાટનો સામનો કરી રહેલા લોકોને રાહત મળી હતી. બીજી તરફ, 28 જૂનની સાંજે ભાવનગર જિલ્લાના જેસર તાલુકાના કેટલાક વિસ્તારોમાં ભારે વરસાદને કારણે દેપલા-જેસર માર્ગ પર પાણી ભરાઈ જતા હાઈવે પર વાહનવ્યવહાર થોડા સમય માટે પ્રભાવિત થયો હતો.
આજે 19 જિલ્લામાં વરસાદની સંભાવના
હવામાન વિભાગના જણાવ્યા અનુસાર આજે આણંદ, પંચમહાલ, દાહોદ, વડોદરા, છોટાઉદેપુર, નર્મદા, ભરૂચ, સુરત, ડાંગ, તાપી, નવસારી, વલસાડ, દમણ અને દાદરા-નગર હવેલીમાં છૂટાછવાયા સ્થળોએ ગાજવીજ સાથે હળવાથી મધ્યમ વરસાદની શક્યતા છે.
સાથે જ સૌરાષ્ટ્રના રાજકોટ, પોરબંદર, જૂનાગઢ, અમરેલી, ભાવનગર, ગીર સોમનાથ, બોટાદ તેમજ દીવમાં પણ હળવાથી મધ્યમ વરસાદની આગાહી કરવામાં આવી છે. રાજ્યના અન્ય વિસ્તારોમાં હવામાન મુખ્યત્વે સૂકું રહેવાની શક્યતા છે.
જુલાઈની શરૂઆતથી ફરી સક્રિય થશે ચોમાસું
હવામાન વિભાગના અનુમાન મુજબ, 1 જુલાઈથી સમગ્ર ગુજરાતમાં વરસાદી પ્રવૃત્તિમાં વધારો થશે. ખાસ કરીને 2 જુલાઈએ સુરત, નવસારી, વલસાડ, ડાંગ, દમણ અને દાદરા-નગર હવેલીમાં ભારે વરસાદની શક્યતાને ધ્યાનમાં રાખીને યલો એલર્ટ જાહેર કરવામાં આવ્યું છે. આગામી દિવસોમાં દક્ષિણ ગુજરાતમાં સારો વરસાદ નોંધાય તેવી સંભાવના વ્યક્ત કરવામાં આવી છે.
અમદાવાદમાં વાદળછાયું વાતાવરણ
અમદાવાદમાં આજે દિવસભર વાદળછાયું વાતાવરણ રહેવાની શક્યતા છે. શહેરમાં મહત્તમ તાપમાન આશરે 41 ડિગ્રી સેલ્સિયસ સુધી પહોંચી શકે છે. નોંધનીય છે કે 28 જૂને પણ અમદાવાદમાં તાપમાન 40 ડિગ્રીથી વધુ નોંધાયું હતું.
વલસાડમાં વરસાદથી લોકોને રાહત
વલસાડ શહેર સહિત જિલ્લાના અનેક વિસ્તારોમાં વહેલી સવારથી છૂટોછવાયો વરસાદ વરસતા વાતાવરણમાં ઠંડક પ્રસરી ગઈ હતી. હવામાન વિભાગના આંકડા મુજબ ઉમરગામ તાલુકામાં સવારે 4થી 8 વાગ્યા દરમિયાન 46 મીલીમીટર એટલે કે અંદાજે બે ઇંચ વરસાદ નોંધાયો હતો. અન્ય વિસ્તારોમાં પણ હળવાથી મધ્યમ વરસાદ પડતાં રસ્તાઓ ભીના બન્યા અને ચોમાસાની સીઝનની અસર સ્પષ્ટ જોવા મળી.
ખેડૂતોમાં ખુશીનો માહોલ
વરસાદની શરૂઆત થતાં જ જિલ્લામાં ખેતીકામને વેગ મળ્યો છે. ખાસ કરીને ડાંગરના પાક માટે ધરું રોપવાની કામગીરી શરૂ થઈ ગઈ છે. ખેડૂતોનું કહેવું છે કે આગામી દિવસોમાં સારો વરસાદ ચાલુ રહેશે તો ખેતી માટે અનુકૂળ પરિસ્થિતિ સર્જાશે અને પાકને મોટો ફાયદો થશે.
ત્રણ દિવસ બાદ ઘટશે તાપમાન
હવામાન વિભાગના જણાવ્યા અનુસાર આગામી ત્રણ દિવસ સુધી મહત્તમ તાપમાનમાં કોઈ ખાસ ફેરફાર થવાની શક્યતા નથી. જોકે ત્યારબાદ રાજ્યના મોટા ભાગના વિસ્તારોમાં તાપમાનમાં 2થી 3 ડિગ્રી સેલ્સિયસ સુધીનો ઘટાડો થઈ શકે છે, જેના કારણે ગરમીમાં રાહત મળશે.
રાજકોટ સૌથી ગરમ શહેર
28 જૂનના મહત્તમ તાપમાનના આંકડા મુજબ રાજકોટ 41.1 ડિગ્રી સેલ્સિયસ સાથે રાજ્યનું સૌથી ગરમ શહેર રહ્યું હતું. ગાંધીનગર, અમદાવાદ અને સુરેન્દ્રનગરમાં પણ તાપમાન 40 ડિગ્રીને પાર રહ્યું હતું. સૌરાષ્ટ્ર અને કચ્છના દરિયાકાંઠાના વિસ્તારોમાં ગરમી સાથે ભેજનું પ્રમાણ વધુ રહેતાં લોકોને ઉકળાટનો સામનો કરવો પડી રહ્યો છે.
હાલ ચોમાસાની ગતિ ભલે ધીમી પડી હોય, પરંતુ હવામાન વિભાગના અનુમાન મુજબ જુલાઈના પ્રથમ સપ્તાહથી સમગ્ર ગુજરાતમાં વરસાદનું જોર વધશે અને ખાસ કરીને દક્ષિણ ગુજરાતમાં ભારે વરસાદની સંભાવના છે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
