વૈભવ સૂર્યવંશીનો મોટો દાવો: ‘આવનારા 20 વર્ષ વર્લ્ડ ક્રિકેટ પર ડોમિનેટ કરીશ’; કોહલી સાથેની મુલાકાતને ગણાવી સપના જેવી ક્ષણ

ભારતીય ક્રિકેટના નવા સેન્સેશન વૈભવ સૂર્યવંશીએ ટીમ ઈન્ડિયામાં પસંદગી મળ્યા બાદ પોતાના ભવિષ્યને લઈને મોટું નિવેદન આપ્યું છે. રાજસ્થાન રોયલ્સ દ્વારા શેર કરાયેલા એક ખાસ ઈન્ટરવ્યુમાં 15 વર્ષીય વૈભવે કહ્યું કે તે માત્ર ક્રિકેટ રમવા માટે નથી આવ્યો, પરંતુ આગામી 20 વર્ષ સુધી વિશ્વ ક્રિકેટ પર પોતાનું પ્રભુત્વ સ્થાપિત કરવા માંગે છે.

ભારતીય ટીમમાં સ્થાન મળ્યા બાદ વૈભવે કહ્યું, “મારું લક્ષ્ય માત્ર રમવાનું નથી. હું ઈચ્છું છું કે આગામી 20 વર્ષ સુધી વર્લ્ડ ક્રિકેટને ડોમિનેટ કરું. હું સતત મહેનત કરી રહ્યો છું અને દરેક દિવસ સાથે વધુ સારું બનવાનો પ્રયાસ કરું છું.”

ત્રણેય ફોર્મેટમાં ભારત માટે રમવાનું સપનું

રાજસ્થાન રોયલ્સના ટીમ મેનેજર રોમી ભીંડર સાથેની વાતચીત દરમિયાન વૈભવે જણાવ્યું કે તેનું સૌથી મોટું સપનું ભારત માટે ક્રિકેટના ત્રણેય ફોર્મેટમાં રમવાનું છે. તેણે કહ્યું કે તેને ખાસ કરીને રેડ-બોલ ક્રિકેટ ખૂબ પસંદ છે અને તે ટેસ્ટ ક્રિકેટમાં સફળતા મેળવવા માટે સતત પ્રેક્ટિસ કરી રહ્યો છે.

વૈભવે કહ્યું, “મેં રાજ્ય માટે ઘણા રેડ-બોલ મેચ રમ્યા છે. ટેસ્ટ અને વનડે ક્રિકેટમાં ટીમની જરૂરિયાત પ્રમાણે હું મારી બેટિંગને ઢાળી શકું છું. ભારત માટે ત્રણેય ફોર્મેટમાં રમવું મારું સૌથી મોટું સપનું છે.”

કોહલીનો સ્પર્શ જીવનભર યાદ રહેશે

IPL 2026 દરમિયાન બનેલી એક ખાસ ક્ષણને યાદ કરતાં વૈભવ ભાવુક બની ગયો. તેણે કહ્યું, “જ્યારે વિરાટ કોહલીએ મારા ખભા પર હાથ મૂક્યો હતો ત્યારે મને એવું લાગ્યું કે હું કોઈ સપનું જોઈ રહ્યો છું. બાળપણથી જેને ટીવી પર જોયા હોય, તે ખેલાડી તમારી સામે ઊભો હોય અને તમારું પ્રોત્સાહન કરે, એ ક્ષણ શબ્દોમાં વર્ણવી શકાય તેવી નથી.”

ઓરેન્જ કેપને સ્પર્શ કરવાની ઈચ્છા હતી

IPL 2026માં ઓરેન્જ કેપ જીતનાર વૈભવે કહ્યું કે એક સમય એવો હતો જ્યારે તે માત્ર ઓરેન્જ કેપને નજીકથી જોવાનું સપનું જોતો હતો. “જ્યારે કોઈ ખેલાડીના માથા પર ઓરેન્જ કેપ જોતો હતો ત્યારે મન થતું કે એકવાર તેને સ્પર્શી લઉં. આજે હું પોતે ઓરેન્જ કેપ પહેરી રહ્યો છું, એ મારા માટે ગર્વની વાત છે,” તેણે કહ્યું.

IPL ટ્રોફી ન જીતવાનો અફસોસ

પોતાના શાનદાર પ્રદર્શન છતાં વૈભવને એક વાતનો અફસોસ છે. તેણે કહ્યું કે જો રાજસ્થાન રોયલ્સ ફાઇનલ સુધી પહોંચી હોત અને ટ્રોફી જીતી હોત તો આ સિઝન વધુ યાદગાર બની હોત. “વ્યક્તિગત એવોર્ડ્સ કરતાં ટીમની જીત વધારે મહત્વની છે. ટ્રોફી જીત્યા પછી આ એવોર્ડ્સ મળ્યા હોત તો ખુશી અનેકગણી વધી જાત,” તેણે જણાવ્યું.

ભગવાનનો હજાર વખત આભાર માન્યો

IPL ઓક્શનમાં રાજસ્થાન રોયલ્સ દ્વારા પસંદગી અંગે વૈભવે કહ્યું કે શરૂઆતમાં તેને આશ્ચર્ય થયું હતું કે માત્ર બે જ ટીમોએ તેના માટે બોલી લગાવી. જોકે હવે તે રાજસ્થાન રોયલ્સ પરિવારનો ભાગ બનવા બદલ ભગવાનનો હજારો વખત આભાર માને છે.

તેણે કહ્યું, “છેલ્લા દોઢ વર્ષમાં મેં ભગવાનનો હજારો વખત આભાર માન્યો છે કે તેમણે મને રાજસ્થાન રોયલ્સ સુધી પહોંચાડ્યો. અહીં સપોર્ટ સ્ટાફથી લઈને સિનિયર ખેલાડીઓ સુધી દરેક વ્યક્તિ પરિવારની જેમ સાથ આપે છે.”

ભારત માટે સૌથી યુવા ડેબ્યૂટન્ટ બનવાની તક

15 વર્ષ અને 71 દિવસની ઉંમરે ભારતીય ટીમમાં પસંદગી પામનાર વૈભવ સૂર્યવંશી અત્યાર સુધીનો સૌથી યુવા ભારતીય ક્રિકેટર બની ગયો છે. તેને આયર્લેન્ડ અને ઈંગ્લેન્ડ સામેની ટી-20 શ્રેણી તેમજ એશિયન ગેમ્સ માટે ટીમમાં સ્થાન મળ્યું છે. જો તેને આ ટૂરમાં એક પણ મેચ રમવાની તક મળે તો તે શેફાલી વર્મા અને સચિન તેંડુલકરનો રેકોર્ડ તોડી ભારત માટે ડેબ્યૂ કરનાર સૌથી યુવા ખેલાડી બની જશે.

વૈભવના આત્મવિશ્વાસ, મહેનત અને મોટી મહત્ત્વાકાંક્ષાઓને જોતા ક્રિકેટ જગતના નિષ્ણાતો માની રહ્યા છે કે ભારતીય ક્રિકેટને આગામી દાયકાઓ માટે એક નવો સુપરસ્ટાર મળી ગયો છે.

સૌથી નાની વયે ઇન્ટરનેશનલ ડેબ્યૂ કરનાર 5 ભારતીય ખેલાડી

ખેલાડી	વય	ફોર્મેટ	કોની સામે
શેફાલી વર્મા	15 વર્ષ 239 દિવસ	T20 ઇન્ટરનેશનલ	સાઉથ આફ્રિકા (2019)
સચિન તેંડુલકર	16 વર્ષ 205 દિવસ	ટેસ્ટ	પાકિસ્તાન (1989)
જેમિમા રોડ્રિગ્સ	17 વર્ષ 130 દિવસ	T20 ઇન્ટરનેશનલ	સાઉથ આફ્રિકા (2018)
પાર્થિવ પટેલ	17 વર્ષ 153 દિવસ	ટેસ્ટ	ઇંગ્લેન્ડ (2002)
મિતાલી રાજ	17 વર્ષ 205 દિવસ	ODI	આયર્લેન્ડ (1999)