કોમનવેલ્થ ગેમ્સ 2026માં ભારતે ગોલ્ડ મેડલનું ખાતું ખોલી દીધું છે. સ્ટાર વેઈટલિફ્ટર મીરાબાઈ ચાનુએ ભારતને પહેલો ગોલ્ડ મેડલ અપાવીને ઈતિહાસ રચ્યો છે. તેમણે વિમેન્સ 48 કિલો વેઈટલિફ્ટિંગ કેટેગરીમાં કુલ 190 કિલો વજન ઉઠાવીને કોમનવેલ્થ ગેમ્સનો રેકોર્ડ બનાવ્યો અને ગોલ્ડ મેડલ પોતાના નામે કર્યો.
મીરાબાઈ ચાનુએ સ્નેચમાં 85 કિલો અને ક્લીન એન્ડ જર્કમાં 105 કિલો વજન ઉઠાવ્યું હતું. બંને ઇવેન્ટમાં કુલ 190 કિલો વજન સાથે તેમણે શાનદાર પ્રદર્શન કરી ભારતને સ્પર્ધાનો પહેલો ગોલ્ડ અપાવ્યો છે.
ભારતના ખાતામાં 1 ગોલ્ડ, 1 સિલ્વર અને 1 બ્રોન્ઝ
મીરાબાઈ ચાનુના ગોલ્ડ સાથે ભારતના ખાતામાં હવે કુલ 3 મેડલ થઈ ગયા છે. ભારતે અત્યાર સુધી 1 ગોલ્ડ, 1 સિલ્વર અને 1 બ્રોન્ઝ મેડલ જીત્યો છે.
આ પહેલા રવિવારે ઋષિકાંત સિંહે મેન્સ 60 કિલો વેઈટલિફ્ટિંગમાં 264 કિલોનું કુલ વજન ઉઠાવી સિલ્વર મેડલ જીત્યો હતો. તેમણે સ્નેચમાં 121 કિલો અને ક્લીન એન્ડ જર્કમાં 143 કિલો વજન ઉઠાવ્યું હતું.
જ્યારે શુક્રવારે ઝંડુ કુમારે પેરા પાવરલિફ્ટિંગમાં બ્રોન્ઝ મેડલ જીતીને ભારતને કોમનવેલ્થ ગેમ્સ 2026નો પ્રથમ મેડલ અપાવ્યો હતો.
આ પ્રદર્શન સાથે ભારત મેડલ ટેલીમાં સાતમા સ્થાને પહોંચી ગયું છે. ઓસ્ટ્રેલિયા 12 ગોલ્ડ સહિત કુલ 24 મેડલ સાથે મેડલ ટેલીમાં ટોચ પર છે.
ઋષિકાંત સિંહની બીજી કોમનવેલ્થ ગેમ્સ
સિલ્વર મેડલ જીતનાર ઋષિકાંત સિંહની આ બીજી કોમનવેલ્થ ગેમ્સ છે. તેમણે અગાઉ બર્મિંગહામ 2022માં 55 કિલો કેટેગરીમાં ભારતનું પ્રતિનિધિત્વ કર્યું હતું. ગ્લાસગોમાં તેઓ પ્રથમ વખત 60 કિલો કેટેગરીમાં ઉતર્યા હતા.
ઋષિકાંત વર્તમાન કોમનવેલ્થ વેઈટલિફ્ટિંગ ચેમ્પિયનશિપના ચેમ્પિયન પણ છે. તેમણે 2009માં મણિપુર સ્પોર્ટ્સ એકેડમીથી વેઈટલિફ્ટિંગની શરૂઆત કરી હતી.
તેમના શરૂઆતના કોચ અને મણિપુર વેઈટલિફ્ટિંગ એસોસિએશનના સેક્રેટરી બ્રોજેન્દ્ર સિંહના જણાવ્યા અનુસાર, ત્યારબાદ ઋષિકાંતની પસંદગી સ્પોર્ટ્સ ઓથોરિટી ઓફ ઈન્ડિયા (SAI)ના સેન્ટરમાં થઈ હતી. બાદમાં તેઓ ભારતીય નૌકાદળ સાથે જોડાયા અને ટ્રેનિંગ બાદ ભારતીય સેનાના સ્પોર્ટ્સ સેટઅપનો ભાગ બન્યા.
ઋષિકાંત મણિપુરના ઇમ્ફાલ વેસ્ટના રહેવાસી છે. તેમના મોટા ભાઈ ભારતીય સેનામાં સેવા આપે છે.
વેઈટલિફ્ટિંગમાં મેડલ કેવી રીતે નક્કી થાય છે?
વેઈટલિફ્ટિંગમાં બે મુખ્ય ઇવેન્ટ હોય છે—સ્નેચ અને ક્લીન એન્ડ જર્ક.
1. સ્નેચ
સ્નેચમાં ખેલાડી એક જ મૂવમેન્ટમાં બારબેલને જમીન પરથી સીધું માથા ઉપર લઈ જાય છે. આ દરમિયાન ખેલાડી બારબેલની નીચે સ્ક્વોટની સ્થિતિમાં આવે છે અને પછી ઊભો થઈને વજનને નિયંત્રિત કરે છે.
આ ઇવેન્ટમાં ગતિ, સંતુલન, તાકાત અને લચીલાપણું ખૂબ જ મહત્વપૂર્ણ હોય છે.
2. ક્લીન એન્ડ જર્ક
આ ઇવેન્ટ બે તબક્કામાં યોજાય છે.
ક્લીન: ખેલાડી બારબેલને જમીન પરથી ઉઠાવીને ખભા સુધી લાવે છે.
જર્ક: ત્યારબાદ પગ અને ખભાની તાકાતનો ઉપયોગ કરીને બારબેલને માથા ઉપર લઈ જઈને બંને હાથ સંપૂર્ણ રીતે સીધા કરવામાં આવે છે.
બંને ઇવેન્ટમાં ખેલાડીને ત્રણ-ત્રણ પ્રયાસ મળે છે. સ્નેચ અને ક્લીન એન્ડ જર્કમાં ઉઠાવેલા સૌથી વધુ સફળ વજનને જોડીને કુલ વજન નક્કી કરવામાં આવે છે. સૌથી વધુ કુલ વજન ઉઠાવનાર ખેલાડી વિજેતા બને છે.
લૉન બૉલ્સમાં ભારતીય જોડીનો મુકાબલો
વુમન્સ પેયર્સ લૉન બૉલ્સમાં ભારતને નામિબિયા સામે ટાઈ-બ્રેકમાં હારનો સામનો કરવો પડ્યો છે. હવે સેમિફાઈનલમાં પહોંચવા માટે રૂપા રાની તિર્કી અને પિંકી સિંહની જોડી માટે ઇંગ્લેન્ડ સામેનો મુકાબલો કરો યા મરોનો બની ગયો છે.
ઇંગ્લેન્ડ સામે જીત મેળવશે તો ભારતીય જોડી સેમિફાઈનલમાં સ્થાન મેળવી શકશે અને ભારતની મેડલની આશાઓ યથાવત રહેશે.
જિમ્નાસ્ટિક્સમાં ભારતીય ખેલાડીઓનો પડકાર
જિમ્નાસ્ટિક્સમાં યોગેશ્વર સિંહ અને તપન મોહંતી પુરુષ ઓલ-અરાઉન્ડ ફાઈનલમાં ઉતરશે. જ્યારે મહિલા ઓલ-અરાઉન્ડ ફાઈનલમાં પણ ભારતીય ખેલાડીઓ ક્વોલિફાય થવા પર ભાગ લેશે.
લૉન બૉલ્સમાં પણ ભારતના અનેક ખેલાડીઓ મેદાનમાં ઉતરવાના છે. રૂપા રાની તિર્કી અને પિંકી સિંહની જોડી મહિલા પેયર્સ સેક્શનલ પ્લેમાં નામિબિયા સામે રમશે. જ્યારે પુતુલ સોનોવાલ પુરુષ સિંગલ્સ સેક્શનલ પ્લેમાં માલ્ટાના શૉન જેમ્સ પાર્નિસ સામે ટકરાશે.
સ્વિમિંગ અને બોક્સિંગમાં પણ ભારતની નજર
સ્વિમિંગમાં શ્રીહરિ નટરાજ, આર્યન નેહરા, અનીશ ગૌડા અને ધાક્ષણ શશિકુમાર પુરુષોની 4×200 મીટર ફ્રીસ્ટાઇલ રિલે હીટ્સમાં ઉતરશે. ક્વોલિફાય થવા પર ભારતીય ટીમ ફાઈનલમાં સ્થાન મેળવશે.
બોક્સિંગમાં પ્રીતિ પવાર મહિલા 54 કિલો કેટેગરીના રાઉન્ડ ઓફ-16માં મલાવીની ડેબોરા મટેન્જે સામે ટકરાશે. ત્યારબાદ જદુમણિ સિંહ પુરુષ 55 કિલો કેટેગરીમાં પાકિસ્તાનના બોક્સર સામે રિંગમાં ઉતરશે.
આદિત્ય પ્રતાપ યાદવ પણ પુરુષ 65 કિલો કેટેગરીના રાઉન્ડ ઓફ-16માં યુગાન્ડાના બોક્સર સામે મુકાબલો કરશે.
મીરાબાઈ ચાનુના ગોલ્ડ બાદ હવે ભારતીય ખેલાડીઓ પાસેથી વધુ મેડલની આશાઓ વધી ગઈ છે. ભારતની નજર હવે મેડલ ટેલીમાં વધુ આગળ વધવા પર છે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
