‘આપણો પ્રેમનો માળો જોઈ ટ્રમ્પને પણ અદેખાઈ આવશે: મહાઠગ સુકેશે ક્રિસમસ પર જેકલિનને ભેટમાં આપ્યો આલીશાન બંગલો, જેલમાંથી લખ્યો પત્ર

દિલ્હીની મંડોલી જેલમાં બંધ ઠગ સુકેશ ચંદ્રશેખર એ આ વર્ષે પણ બોલિવૂડ એક્ટ્રેસ જૅકલિન ફર્નાન્ડિસ માટે ભવ્ય ભેટ મોકલવાનો દાવો કર્યો છે. સુકેશે ક્રિસમસની શુભેચ્છા પાઠવી, જૅકલિન માટે અમેરિકાના પોશ વિસ્તારમાં બેવર્લી હિલ્સમાં ‘લવ નેસ્ટ’ બંગલો ભેટ આપ્યો હોવાનો દાવો કર્યો.

જેલમાંથી લખેલા પત્રમાં સુકેશે લખ્યું:
“ક્રિસમસની ખૂબ ખૂબ શુભેચ્છાઓ બેબી. આ તહેવાર મને તારી સાથે વિતાવેલી ખાસ ક્ષણો અને તારા માટે ભરેલો પ્રેમ યાદ અપાવે છે. હું તને ‘ધ લવ નેસ્ટ’ ભેટ આપી રહ્યો છું, જે જોઈને ડોનાલ્ડ ટ્રમ્પને પણ ઇર્ષા થશે.”

સુકેશે ‘ધ લવ નેસ્ટ’ની તુલના અમેરિકાના રાષ્ટ્રપતિ માર-એ-લાગો રિસોર્ટ સાથે કરી છે અને રમુજી અંદાજમાં કહ્યું કે, “આભવ્યતા ભારતમાં અને અમેરિકામાં અજોડ છે, DTને પણ ઇર્ષા થશે.”

આ પહેલા પણ ગત વર્ષે સુકેશે ક્રિસમસ પર જૅકલિનને ફ્રાન્સમાં વિન્યાર્ડ ભેટ આપવાનો દાવો કર્યો હતો.

જૅકલિન સામે ફરિયાદ અને ED તપાસ:

સુકેશ ચંદ્રશેખર 200 કરોડના મની લૉન્ડરિંગ કેસમાં જેલમાં છે. તપાસમાં જાણવા મળ્યું કે જૅકલિન સુકેશ સાથે સંબંધમાં હતી. પરિણામે એક્ટ્રેસ સામે પણ તપાસ હાથ ધરાઈ છે.

ED મુજબ, સુકેશે જૅકલિન પર ₹7 કરોડથી વધુ ખર્ચ કર્યો, જેમાં સમાવિષ્ટ છે:

• મોંઘા ઘરેણાં અને ચાર પર્શિયન બિલાડીઓ
• ₹57 લાખનો ઘોડો
• જૅકલિનના માતા-પિતાને 1.89 કરોડની બે કાર (પોર્શ અને માસેરાટી)
• જૅકલિનના ભાઈ માટે SUV
• જૅકલિનની બહેન માટે 1.25 કરોડની BMW

જૅકલિનએ પોલીસમાં જણાવ્યુ કે, તેને સુકેશની ઠગાઇ અંગે ખબર નહોતી. છતાં, સુકેશ ખાસ પ્રસંગે જેલમાંથી પત્રો લખીને ભેટો આપી હોવાનું દાવો કરે છે.