ગાંધીનગરમાં અમિત શાહના હસ્તે ‘ભારત ટેક્સી’નો શુભારંભ: 2 વર્ષમાં 500 શહેર-ગામડાં સુધી વિસ્તરણનો લક્ષ્ય, અમદાવાદના મુખ્ય રૂટ પર સૌથી સસ્તું ભાડું

કેન્દ્રીય ગૃહ અને સહકાર મંત્રી તથા ગાંધીનગરના સાંસદ અમિત શાહે આજે ગાંધીનગરના મહાત્મા મંદિર ખાતે સહકારી મોડલ આધારિત ‘ભારત ટેક્સી’ સેવાનો રાજ્યમાં સત્તાવાર શુભારંભ કરાવ્યો. મુખ્યમંત્રી ભુપેન્દ્ર પટેલની ઉપસ્થિતિમાં યોજાયેલા આ કાર્યક્રમમાં વડોદરા, અમદાવાદ, રાજકોટ અને સુરતના એરપોર્ટ સહિત અનેક સરકારી સંસ્થાઓ સાથે મહત્વના એમઓયુ પણ કરવામાં આવ્યા.

કાર્યક્રમ દરમિયાન અમિત શાહે જણાવ્યું કે આગામી બે વર્ષમાં ભારત ટેક્સીની સેવા દેશના 500 નાના-મોટા શહેરો અને ગામડાં સુધી પહોંચાડવામાં આવશે. સાથે જ ટુ-વ્હીલર અને ફોર-વ્હીલર બંને કેટેગરીમાં સહકારી મોડલને દેશવ્યાપી બનાવવાની યોજના છે.

મુસાફરો અને ડ્રાઇવરોના શોષણને રોકવાનો પ્રયાસ

અમિત શાહે જણાવ્યું કે ખાનગી એપ આધારિત ટેક્સી સેવાઓમાં ડ્રાઇવરો પાસેથી ઊંચું કમિશન વસૂલાતું હતું, રજિસ્ટ્રેશન બંધ કરી દેવામાં આવતું હતું અને મહેનતાણું સમયસર મળતું નહોતું. આ સમસ્યાઓને દૂર કરવા માટે સહકારી મોડલ પર ભારત ટેક્સીની શરૂઆત કરવામાં આવી છે.

તેમણે કહ્યું કે અહીં ડ્રાઇવર નહીં પરંતુ ‘સારથિ’ હશે, જે માત્ર સેવા આપનાર નહીં પરંતુ સહકારી સંસ્થાનો સહ-માલિક પણ રહેશે.

ત્રણ મુખ્ય ઉદ્દેશ સાથે શરૂ થઈ સેવા

ભારત ટેક્સીના ત્રણ મુખ્ય ઉદ્દેશ હોવાનું અમિત શાહે જણાવ્યું.

• મુસાફરો અને સારથિઓનું શોષણ અટકાવવું
• સારથિઓને માલિકી અને સન્માન આપવું
• સુરક્ષા સાથે આવક અને સમૃદ્ધિ વધારવી

તેમણે જણાવ્યું કે હાલમાં દેશભરમાં 7 લાખથી વધુ સારથિઓ આ સહકારી સંસ્થાના સભ્ય છે અને અત્યાર સુધી 37 લાખથી વધુ મુસાફરો આ સેવાનો લાભ લઈ ચૂક્યા છે.

‘ભારત ટેક્સી મોંઘી હોવાની વાત અફવા’

અમિત શાહે કહ્યું કે કેટલાક લોકો ભારત ટેક્સીને મોંઘી ગણાવી અફવાઓ ફેલાવી રહ્યા છે, જ્યારે વાસ્તવમાં તેના ભાડા સંપૂર્ણપણે સ્પર્ધાત્મક છે. તેમણે દાવો કર્યો કે ભારત ટેક્સીના આગમન બાદ ખાનગી કંપનીઓએ પણ પોતાના ભાડાં ઘટાડવાની શરૂઆત કરી છે.

ભવિષ્યમાં સહકારી મોડલ હેઠળ સારથિઓને લોન, વીમા અને ધંધાના વિસ્તરણ માટે પણ મદદ આપવામાં આવશે.

મુખ્યમંત્રી ભુપેન્દ્ર પટેલે શું કહ્યું?

મુખ્યમંત્રી ભુપેન્દ્ર પટેલે જણાવ્યું કે સહકારિતા ગુજરાતની ઓળખ છે અને ભારત ટેક્સી આત્મનિર્ભર ભારતના વિઝનને આગળ ધપાવતી મહત્વપૂર્ણ પહેલ છે. તેમણે વિશ્વાસ વ્યક્ત કર્યો કે ગુજરાતમાં આ મોડલ સૌથી વધુ સફળ થશે.

તેમણે ઉમેર્યું કે ખાનગી કંપનીઓમાં માત્ર નોકરી કરતા ડ્રાઇવરો હવે સહકારી મોડલ હેઠળ નફામાં પણ ભાગીદાર બનશે.

અમદાવાદના મુખ્ય રૂટ પર ભારત ટેક્સી સૌથી સસ્તી

ભારત ટેક્સીના ભાડાની સરખામણી માટે અમદાવાદના ત્રણ મુખ્ય રૂટ પર ઓલા, ઉબેર અને રેપિડો સામે રિયાલિટી ચેક કરવામાં આવ્યો.

એરપોર્ટથી ઇસ્કોન મંદિર

• ભારત ટેક્સી – ₹271
• ઓલા – ₹354
• ઉબેર – ₹446
• રેપિડો – ₹531

આ રૂટ પર ભારત ટેક્સી સૌથી સસ્તી રહી.

ગીતામંદિર બસ સ્ટેન્ડથી ઇસ્કોન મંદિર

• ભારત ટેક્સી – ₹175
• ઉબેર – ₹179
• ઓલા – ₹186
• રેપિડો – ₹185

આ રૂટ પર ચારેય કંપનીઓના ભાડામાં ખાસ મોટો તફાવત જોવા મળ્યો નથી.

કાલુપુર રેલવે સ્ટેશનથી ઇસ્કોન મંદિર

• ભારત ટેક્સી – ₹190
• ઓલા – ₹212
• રેપિડો – ₹219
• ઉબેર – ₹249

અહીં પણ ભારત ટેક્સીનું ભાડું સૌથી ઓછું નોંધાયું.

ખાનગી ટેક્સી ચાલકોએ પણ ઉઠાવ્યા પ્રશ્નો

કાર્યક્રમ દરમિયાન કેટલાક ખાનગી ટેક્સી ચાલકોએ માંગ કરી હતી કે ખાનગી ટેક્સી વાહનોને પણ આ સહકારી મોડલમાં સામેલ કરવામાં આવે જેથી તેઓ પણ તેનો લાભ લઈ શકે.

વિવિધ સંસ્થાઓ સાથે થયા મહત્વના એમઓયુ

ભારત ટેક્સીના સીઈઓએ કાર્યક્રમ દરમિયાન વડોદરા એરપોર્ટ, અદાણી એરપોર્ટ, અમદાવાદ મ્યુનિસિપલ કોર્પોરેશન (AMC), GETCO, અમદાવાદ પોલીસ, રાજકોટ એરપોર્ટ અને સુરત એરપોર્ટ ઓથોરિટી સહિત અનેક સંસ્થાઓ સાથે સહકાર કરારો (MoU) પર હસ્તાક્ષર કર્યા.

બે દિવસના પ્રવાસ દરમિયાન અનેક કાર્યક્રમોમાં હાજરી

અમિત શાહ તેમના બે દિવસીય ગાંધીનગર-અમદાવાદ પ્રવાસ દરમિયાન અનેક વિકાસ કાર્યોનું લોકાર્પણ કરશે. તેઓ જિલ્લા વિકાસ સમિતિ (DISHA)ની બેઠકમાં સરકારી યોજનાઓની સમીક્ષા કરશે તેમજ ‘હરિયાળી લોકસભા’ અભિયાન અંતર્ગત વૃક્ષારોપણની કામગીરીની સમીક્ષા કરશે.

સાંજે રાણીપ ખાતે લોકદરબારમાં નાગરિકોની રજૂઆતો સાંભળશે. જ્યારે બીજા દિવસે સાબરમતી વિસ્તારમાં ભાજપના બુથ પ્રમુખો અને શક્તિકેન્દ્ર ઇન્ચાર્જોની ચિંતન શિબિરમાં માર્ગદર્શન આપશે.

પ્રવાસના અંતિમ તબક્કામાં ગાંધીનગરના સેક્ટર-17 ટાઉન હોલ ખાતે PM Family Care Tracker (FCT) પ્રોગ્રામનું પણ સત્તાવાર લોકાર્પણ કરવામાં આવશે. આ ડિજિટલ પ્લેટફોર્મ દ્વારા નાગરિકોની આરોગ્ય અને કલ્યાણ સેવાઓનું અસરકારક રીતે ટ્રેકિંગ કરી શકાશે.