અયોધ્યામાં રામ મંદિરના 191 ફૂટ ઊંચા મુખ્ય શિખર પર પ્રથમવાર ધ્વજારોહણ થવાનું છે, અને તેનું ધ્વજ પીએમ નરેન્દ્ર મોદી પોતાના હસ્તે ચડાવશે. આ ધજા સંપૂર્ણ રીતે અમદાવાદમાં બનાવવામાં આવી છે. 11 ફૂટ પહોળી અને 22 ફૂટ લાંબી આ ધજા શ્રી અંબિકા એન્જિનિયરિંગ વર્કસ દ્વારા તૈયાર કરાઈ છે, જેમાં 10 અનુભવી કારીગરોએ સતત 25 દિવસ સુધી કાર્ય કર્યું.
કલ્પવૃક્ષ, સૂર્ય અને ઓમના પ્રતીકો સાથેની થ્રી-લેયર ધજા
રામ મંદિર ટ્રસ્ટે નક્કી કરેલી વિશેષ ડિઝાઇન પ્રમાણે ધજામાં રેશ્મી સાટીન માટીરિયલના ત્રણ સ્તરનો ઉપયોગ થયો છે. ધજાની બંને બાજુ રામ ભગવાનના પ્રતીક — કલ્પવૃક્ષ, સૂર્યનારાયણ અને ૐ — સુંદર કાષ્ઠકલા પ્રમાણે અંકિત કરવામાં આવ્યા છે. ધજા બનાવનાર પરિવારને આ યોગદાન બદલ રામ મંદિરમાં યજમાન તરીકે હવનમાં બેસાડવામાં આવ્યા છે, જે તેમના માટે ગર્વની પળ છે.
5100 કિલો વજનનો 42 ફૂટ ધ્વજ દંડ પણ અમદાવાદમાં તૈયાર
ધજા ઉપરાંત રામ મંદિર માટે 42 ફૂટનો અને 5100 કિલો વજન ધરાવતો વિશાળ ધ્વજ દંડ પણ અમદાવાદમાં બનેલો છે. તેના ઉપરાંત દાનપેટી, હૂંડી ભંડાર, ભગવાનના આભૂષણો માટેના પિત્તળના કબાટ, લોખંડના હાર્ડવેર, કડા તથા અન્ય જરૂરી વસ્તુઓ પણ આ જ ટીમે તૈયાર કરીને અયોધ્યા મોકલી છે.
કાર્યક્રમના વિશેષ મહેમાનો
ધ્વજારોહણ સમારોહમાં રાષ્ટ્રપતિ દ્રૌપદી મુર્મુ, આરએસએસ વડા મોહન ભાગવત, ઉત્તર પ્રદેશના મુખ્યમંત્રી યોગી આદિત્યનાથ સહિતના મહત્વના મહેમાનો હાજર રહેશે.
ગુજરાતના 22 વર્ષના જ્યોતિષીએ નક્કી કર્યું ‘અભિજિતનું સૂક્ષ્મ મૂહુર્ત’
આ ઐતિહાસિક વિધિ માટેનું 12 મિનિટનું ‘અભિજિત મૂહુર્ત’ ગુજરાતના 22 વર્ષીય યુવા જ્યોતિષી વિશ્વ વોરાએ નક્કી કર્યું છે. આ વિધિ 25 નવેમ્બર 2025ના રોજ માગશર સુદ પાંચમ — વિવાહ પંચમી —ના સુપર્ણ સંયોગમાં સંપન્ન થશે. જ્યોતિષીય રીતે આ દિવસ અને ગ્રહનક્ષત્રો ધ્વજારોહણ માટે અત્યંત શુભ માનવામાં આવે છે.
કેસરિયા શૌર્યનું પ્રતીક
મંદિરના મુખ્ય શિખર પર લહેરાનારી ધજા શૌર્ય અને અદમ્ય સંકલ્પનું પ્રતીક એવા કેસરિયા રંગની હશે. પેરાશૂટ ફેબ્રિકથી બનેલી આ ધજા ચારેય દિશામાં સતત લહેરાતી રહે તે માટે ખાસ ડિઝાઇન કરવામાં આવી છે.
મંદિર નિર્માણની પૂર્ણાહુતિનું પ્રતીક
આ ધ્વજારોહણ રામ લલ્લાની 22 જાન્યુઆરી 2024ની પ્રાણ-પ્રતિષ્ઠા પછી મંદિર નિર્માણ પૂર્ણ થવાનું એક મહત્ત્વનું ચિહ્ન છે. મંત્રોચ્ચાર, યજ્ઞવિધિ અને પરંપરાગત ક્રિયાઓ સાથે આ ઐતિહાસિક ક્ષણ સમગ્ર દેશ માટે ગૌરવની પળ બની રહેશે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
