દિલ્હીના પ્રતિષ્ઠિત લીલા હોટલ ખાતે હરિયાણાના ઓલિમ્પિક ગોલ્ડ મેડલિસ્ટ નીરજ ચોપરા અને હિમાની મોરનું ભવ્ય VIP ગ્રાન્ડ રિસેપ્શન આયોજિત કરવામાં આવ્યું હતું. મર્યાદિત મહેમાનો સાથે સંપૂર્ણ પ્રોટોકોલ હેઠળ યોજાયેલ આ હાઈ-પ્રોફાઈલ સમારોહ વિશિષ્ટ મહેમાનોની હાજરીને કારણે ચર્ચાનો વિષય બન્યો હતો.
વડાપ્રધાન નરેન્દ્ર મોદી નવદંપતીને આશીર્વાદ આપવા ખાસ રિસેપ્શન પાર્ટીમાં પહોંચ્યા હતા. પીએમના આગમન પહેલા હોટલમાં સુરક્ષાના કડક બંદોબસ્ત કરવામાં આવ્યા હતા. વડાપ્રધાને નીરજ અને હિમાનીને આશીર્વાદ આપતા ભગવાન શ્રીરામની સુંદર મૂર્તિ ભેટ સ્વરૂપે અર્પણ કરી હતી. આ દરમિયાન દંપતીએ તથા પરિવારજનોએ પીએમના ચરણ સ્પર્શ કરીને આશીર્વાદ લીધા હતા.
150 VIP મહેમાનોને આમંત્રણ
આ રિસેપ્શન પાર્ટીમાં કેન્દ્રીય ગૃહમંત્રી અમિત શાહ, રાષ્ટ્રપતિ દ્રૌપદી મુર્મુ, પૂર્વ રાષ્ટ્રપતિ રામનાથ કોવિંદ સહિત અનેક દિગ્ગજ હસ્તીઓને આમંત્રણ અપાયું હતું, જોકે તેઓ વિવિધ કારણોસર હાજર રહી શક્યા નહોતા. નીરજ ચોપરાએ તમામ મહેમાનોને જાતે આમંત્રણ પાઠવ્યું હતું. કુલ 150 પસંદગીના VIP મહેમાનોને જ આમંત્રણ આપવામાં આવ્યું હતું.
19 જાન્યુઆરીએ ખાનગી રીતે થયા હતા લગ્ન
નીરજ ચોપરા અને હિમાની મોરના લગ્ન 19 જાન્યુઆરી 2025ના રોજ સોલન સ્થિત એક રિસોર્ટમાં ખાનગી સમારોહમાં યોજાયા હતા. રમતગમતના વ્યસ્ત શેડ્યૂલને કારણે રિસેપ્શનનું આયોજન હવે કરવામાં આવ્યું હતું.
મોડી રાત સુધી ચાલ્યો હાઈ-પ્રોફાઈલ કાર્યક્રમ
રિસેપ્શન પાર્ટી સાંજે 7 વાગ્યે શરૂ થઈ અને રાત્રે લગભગ 11:30 વાગ્યા સુધી ચાલી. કાર્યક્રમમાં બંને પરિવારોની અંદાજે 30 મહિલાઓ ખાસ હાજર રહી હતી. કાર્યક્રમને સંપૂર્ણ રીતે ખાનગી રાખવા માટે કડક પ્રવેશ નિયંત્રણો લાગુ કરવામાં આવ્યા હતા.
કડક સુરક્ષા વ્યવસ્થા
વડાપ્રધાનની હાજરીને કારણે સુરક્ષા એજન્સીઓ એલર્ટ મોડમાં રહી હતી. પ્રવેશ સમયે કોઈ પણ પ્રકારનો સામાન અંદર લઈ જવાની મંજૂરી આપવામાં આવી નહોતી, જોકે મોબાઈલ ફોન લઈ જવાની છૂટ આપવામાં આવી હતી.
ખાસ મહેમાનોની હાજરી
રિસેપ્શન પાર્ટીમાં હરિયાણાના બોક્સર વિજેન્દર સિંહ, સ્ટેજ એપના ફાઉન્ડર્સ વિનય સિંઘલ, પ્રવીણ સિંઘલ અને શશાંક વૈષ્ણવ સહિત અન્ય જાણીતા મહેમાનો હાજર રહ્યા હતા. તમામ મહેમાનોએ દંપતી સાથે ફોટોગ્રાફ્સ અને સેલ્ફી લીધી હતી.
મેચિંગ બ્લેક આઉટફિટમાં નજરે પડ્યું દંપતી
નીરજ ચોપરા અને હિમાની મોર રિસેપ્શન દરમિયાન મેચિંગ બ્લેક કલરના આકર્ષક ડ્રેસમાં જોવા મળ્યા હતા, જે સૌનું ધ્યાન ખેંચતું રહ્યું.
કવિતાએ ભાવુક બનાવ્યો માહોલ
કાર્યક્રમનું સંચાલન હરિયાણાના હિસારની રહેવાસી અલ્પના સુહાસિનીએ કર્યું હતું. તેમણે નીરજ અને હિમાનીને સમર્પિત કવિતા સંભળાવી, જેને મહેમાનોએ ખૂબ વખાણી. કવિતાએ સમગ્ર કાર્યક્રમને વધુ ભાવુક અને યાદગાર બનાવી દીધો.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
