નશો કરી ગુજરાતમાં પ્રવેશ કર્યો? સીધા જ જેલ! સરહદી જિલ્લામાં પોલીસની ત્રીપલ સુરક્ષા

નવા વર્ષ પહેલા ગુજરાત બોર્ડર પર સઘન પોલીસ સુરક્ષા, 1.77 કરોડ રૂપિયાના દારૂ જપ્ત

નવા વર્ષની ઉજવણી અને ખાસ કરીને 31 ડિસેમ્બરના દિવસે કાયદો અને વ્યવસ્થા જળવાઈ રહે એ હેતુથી ગુજરાતના સરહદી જિલ્લાઓમાં પોલીસની ત્રી-લેયર સુરક્ષા ગોઠવવામાં આવી છે. મધ્યપ્રદેશ બોર્ડરને અડીને આવેલા દાહોદ અને રાજસ્થાન બોર્ડરને અડીને આવેલા બનાસકાંઠા જિલ્લાના બોર્ડર પર SRPFની ટીમ પણ જોડાઈ સઘન ચેકિંગ કરી રહી છે.

દાહોદ જિલ્લામાં નવા વર્ષને ધ્યાનમાં રાખીને કુલ 24 આંતરરાજ્ય બોર્ડર પોઈન્ટ પર પોલીસની ત્રી-લેયર સુરક્ષા વ્યવસ્થા અમલમાં મુકાઈ છે. મુખ્ય બોર્ડર ચેકપોસ્ટ, આંતરિક માર્ગો પર મોબાઇલ ચેકિંગ પોઈન્ટ અને હાઈવે તેમજ મુખ્ય માર્ગો પર સતત પેટ્રોલિંગનો સમાવેશ થાય છે. તમામ સંવેદનશીલ વિસ્તારોમાં 24×7 વાહન ચેકિંગ ચાલુ રાખવામાં આવ્યું છે.

ખંગેલા ચેકપોસ્ટ: અન્ડરબોડી મિરર અને કટર-સ્પેનરથી તપાસ
મધ્યપ્રદેશ સરહદ પર આવેલી ખંગેલા ચેકપોસ્ટમાં પોલીસ દિવસ-રાત વાહન તપાસ કરી રહી છે. ટ્રક અને મોટા વાહનોની નીચે અન્ડરબોડી મિરરથી તપાસ થાય છે, જ્યારે ડિક્કી અને માલસામાન માટે ખાસ ટૂલ કિટનો ઉપયોગ થાય છે. ચાલકો દારૂ પીધો હોય કે નહીં તે જોવા બ્રેથ એનાલાઈઝર મશીન પણ ઉપયોગમાં લેવાઈ રહ્યો છે. શંકાસ્પદ વાહનોને સાઈડમાં લઈ ગુપ્ત ખાનાં કટર-સ્પેનર વડે તપાસ કરવામાં આવે છે.

દારૂના ત્રણ મોટા જથ્થા ઝડપાયા
ખંગેલા ચેકપોસ્ટ પર તાજેતરમાં દારૂની હેરાફેરીના ત્રણ મોટા કિસ્સા સામે આવ્યા છે:

• રબ્બરના દાણાની આડમાં છુપાવેલો વિદેશી દારૂ: 8,808 બોટલો, કિંમત ₹75,02,160
• કલરના બોક્સમાં છુપાવેલો ભારતીય બનાવટનો દારૂ: 5,640 બોટલો, કિંમત ₹28,20,000
• પશુ આહારની આડમાં ટ્રકમાં છુપાવ્યો દારૂ: 6,060 બોટલો, કિંમત ₹74,10,000

ખંગેલા બોર્ડર પર કુલ 20,508 બોટલો દારૂ ઝડપાઈ, જેની કિંમત લગભગ ₹1.77 કરોડ છે. તમામ કેસોમાં પોલીસએ વાહન અને દારૂ જપ્ત કરી આરોપીઓ સામે પ્રોહિબિશન એક્ટ હેઠળ કાર્યવાહી કરી છે.

ઉચ્ચ અધિકારીઓની નજર
દાહોદ DySP જગદીશ ભંડારી મુજબ, પી.એસ.આઈ. કક્ષાના અધિકારીઓ, સિનિયર પોલીસ અધિકારીઓ અને SRPFની ટીમો તમામ સંવેદનશીલ બોર્ડર પર 24×7 રાઉન્ડ ધ ક્લોક ચેકિંગ કરી રહી છે. શહેર અને ગ્રામ્ય વિસ્તારોના મુખ્ય માર્ગો, હાઈવે, ઢાબા અને અન્ય સંવેદનશીલ સ્થળો પર પેટ્રોલિંગ વધારવામાં આવ્યું છે.

બનાસકાંઠા બોર્ડર પર SRPFની ટીમ
રાજસ્થાન બોર્ડર નજીકના અમીરગઢ ચેકપોસ્ટ પર પોલીસ સાથે SRPFના જવાનો જોડાયા છે. બોડીવોર્ન કેમેરા અને બ્રેથ એનાલાઈઝરનો ઉપયોગ કરીને દારૂબંધી ભંગ અટકાવવામાં આવી રહી છે.

દાહોદ અને બનાસકાંઠા જિલ્લામાં પોલીસ સ્પષ્ટ સંદેશ આપી રહી છે કે નશામાં વાહન ચલાવવું, ગેરકાયદે દારૂની હેરાફેરી અથવા અન્ય ગેરકાયદે પ્રવૃત્તિ સહન નહીં થાય. નવા વર્ષની ઉજવણી સલામત અને કાયદેસર રીતે થાય એ માટે પોલીસ સંપૂર્ણ રીતે તત્પર છે.