અમેરિકા અને ઈરાન વચ્ચે વધી રહેલા તણાવ અને પશ્ચિમ એશિયામાં સર્જાયેલા સંકટ વચ્ચે સરકારી તેલ કંપની Indian Oil Corporationએ દેશને રાહત આપતી માહિતી આપી છે. કંપનીએ મંગળવારે જણાવ્યું કે તેની પાસે એક મહિનાથી વધુ સમય સુધી પૂરતો ક્રૂડ ઓઇલ સ્ટોક ઉપલબ્ધ છે અને હાલ દેશમાં ઈંધણની કોઈ અછત નહીં સર્જાય.
કંપનીના જણાવ્યા અનુસાર, હોર્મુઝ જળમાર્ગ પર પડેલા પ્રભાવને કારણે ઊર્જા સપ્લાયનો લગભગ 50% હિસ્સો અને ખાડી દેશોમાંથી આવતો 90% LPG સપ્લાય અસરગ્રસ્ત થયો છે. તેમ છતાં કંપની વૈકલ્પિક વ્યવસ્થા દ્વારા સમગ્ર દેશમાં પુરવઠો જાળવી રાખી રહી છે.
LPG સપ્લાય માટે નવા દેશોમાંથી ખરીદી શરૂ
IOCLના ડાયરેક્ટર ફાઇનાન્સ અનુજ જૈને જણાવ્યું હતું કે મિડલ ઈસ્ટમાં તણાવ શરૂ થયા બાદ કંપનીની તમામ રિફાઇનરીઓ સંપૂર્ણ ક્ષમતા સાથે કામ કરી રહી છે.
તેમણે જણાવ્યું કે LPG સપ્લાયમાં કેટલીક મુશ્કેલીઓ આવી હતી, પરંતુ હવે કંપનીએ ઇન્ડોનેશિયા, નાઇજીરીયા, અંગોલા અને ઓમાન જેવા દેશોમાંથી સ્પોટ પ્રોક્યોરમેન્ટ શરૂ કરી દીધી છે. જેના કારણે દેશભરમાં LPGનો પૂરતો પુરવઠો જાળવી શકાયો છે.
હોર્મુઝ રૂટ કેમ મહત્વપૂર્ણ?
Strait of Hormuz દુનિયાના સૌથી મહત્વપૂર્ણ દરિયાઈ વેપાર માર્ગોમાંનો એક માનવામાં આવે છે. ઓમાનના અખાત અને ફારસના અખાત વચ્ચે આવેલા આ માર્ગ પરથી વિશ્વના કુલ ક્રૂડ ઓઇલ વેપારનો લગભગ 20% હિસ્સો પસાર થાય છે. હાલ ઈરાન સંબંધિત તણાવને કારણે આ માર્ગ પર વૈશ્વિક ચિંતા વધી છે.
કંપનીનો નફો 81% વધ્યો
IOCLએ જાહેર કરેલા નાણાકીય પરિણામો અનુસાર, નાણાકીય વર્ષ 2025-26ના ચોથા ક્વાર્ટર (Q4FY26)માં કંપનીનો કન્સોલિડેટેડ નેટ પ્રોફિટ 81% વધીને ₹15,176.08 કરોડ થયો છે. ગયા વર્ષના સમાન ક્વાર્ટરમાં કંપનીને ₹8,367.63 કરોડનો નફો થયો હતો.
કંપનીના મજબૂત નાણાકીય પરિણામો બાદ બોર્ડે શેરધારકો માટે 12.5% અંતિમ ડિવિડન્ડની ભલામણ પણ કરી છે. આ મુજબ ₹10 ફેસ વેલ્યુ ધરાવતા દરેક શેર પર ₹1.25 ડિવિડન્ડ આપવામાં આવશે, જોકે AGMમાં મંજૂરી મળવી બાકી છે.
રિફાઇનરી વિસ્તરણ માટે ₹32,700 કરોડનો પ્લાન
ચાલુ નાણાકીય વર્ષ 2026-27 માટે IOCએ ₹32,700 કરોડના કેપેક્સ (મૂડી રોકાણ)ની યોજના બનાવી છે. કંપની વિવિધ રિફાઇનરીઓની ક્ષમતા વધારવા માટે મોટા પ્રોજેક્ટ પર કામ કરી રહી છે.
- પાણીપત રિફાઇનરીની ક્ષમતા 15 MMTPAથી વધારીને 25 MMTPA કરવામાં આવશે.
- ગુજરાત રિફાઇનરીમાં ₹19,000 કરોડના રોકાણથી ક્ષમતા 13.7 MMTPAથી 18 MMTPA થશે.
- બરૌની રિફાઇનરીની ક્ષમતા 6 MMTPAથી વધારીને 9 MMTPA કરવામાં આવશે.
કંપનીના જણાવ્યા અનુસાર, આ તમામ પ્રોજેક્ટ ડિસેમ્બર 2026 સુધીમાં પૂર્ણ થવાની શક્યતા છે.
પેટ્રોલ-ડીઝલ ફરી મોંઘું
આ વચ્ચે દેશમાં પેટ્રોલ અને ડીઝલના ભાવમાં ફરી વધારો કરવામાં આવ્યો છે. મંગળવારે પેટ્રોલ-ડીઝલના ભાવમાં 90 પૈસા પ્રતિ લિટરનો વધારો થયો છે. છેલ્લા પાંચ દિવસમાં આ બીજી વખત વધારો થયો છે. અમદાવાદમાં પેટ્રોલનો ભાવ ₹98.33 અને ડીઝલ ₹94.10 પ્રતિ લિટર સુધી પહોંચી ગયો છે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
