ભારતીય રૂપિયાએ મંગળવારે (3 ફેબ્રુઆરી) અમેરિકન ડોલર સામે 3 વર્ષની સૌથી મોટી મજબૂતી નોંધાવી છે. રૂપિયા 1.2% ઉછળીને 90.20ના સ્તરે પહોંચ્યો, જેનું મુખ્ય કારણ ભારત અને અમેરિકા વચ્ચે થયેલી મહત્વપૂર્ણ ટ્રેડ ડીલ છે. આ ડીલ અંતર્ગત અમેરિકાએ ભારતીય માલસામાન પર લગાવવામાં આવેલા ટેરિફને 50%માંથી ઘટાડીને 18% કરી દીધા છે.
આ તેજી પહેલાં રૂપિયાની સ્થિતિ ઘણી નબળી હતી. 2025 દરમિયાન રૂપિયો લગભગ 5% તૂટ્યો હતો અને એશિયાની સૌથી નબળી કરન્સી બની ગયો હતો. જાન્યુઆરી 2026માં પણ તેમાં લગભગ 2%નો ઘટાડો નોંધાયો હતો. સતત વિદેશી પોર્ટફોલિયો રોકાણકારો (FIIs)ની ઉપાડને કારણે રૂપિયાની ઉપર ભારે દબાણ હતું. જોકે, મંગળવારે રૂપિયાએ જોરદાર વાપસી કરતા 91.49ના અગાઉના ક્લોઝની સરખામણીમાં 130 પૈસાની મજબૂતી નોંધાવી.
ટ્રેડ ડીલથી બજારમાં વિશ્વાસ વધ્યો
રૂપિયામાં આવેલી આ અચાનક તેજી પાછળ ભારત અને અમેરિકા વચ્ચે થયેલો ‘ગિવ એન્ડ ટેક’ કરાર મુખ્ય કારણ છે. અમેરિકાના રાષ્ટ્રપતિ ડોનાલ્ડ ટ્રમ્પે સોશિયલ મીડિયા પર જણાવ્યું કે ભારત હવે રશિયા પાસેથી ઓઈલ ખરીદવાનું ઘટાડશે અને તેના બદલે અમેરિકા તથા વેનેઝુએલાથી ઓઈલ આયાત કરશે.
આ ઉપરાંત, ભારતે આગામી કેટલાક વર્ષોમાં અમેરિકા પાસેથી લગભગ 500 અબજ ડોલર (લગભગ 45 લાખ કરોડ રૂપિયા)ની ઊર્જા, ટેકનોલોજી અને કૃષિ ઉત્પાદનો ખરીદવાની પ્રતિબદ્ધતા વ્યક્ત કરી છે. આ જાહેરાતથી ગયા વર્ષે ઓગસ્ટમાં અમેરિકાના ટેરિફ લાગ્યા બાદ ઉભી થયેલી અનિશ્ચિતતાનો અંત આવ્યો છે અને બજારમાં ફરી વિશ્વાસનો માહોલ સર્જાયો છે.
89 સુધી જઈ શકે છે રૂપિયો
માર્કેટ નિષ્ણાતોનું માનવું છે કે રૂપિયામાં આવેલી તેજી હજી આગળ વધી શકે છે. માર્કેટ એક્સપર્ટ અનુજ ગુપ્તાના જણાવ્યા મુજબ, ટેરિફમાં ઘટાડા બાદ નિકાસ વધવાની સંભાવના છે, જેના કારણે રૂપિયાની માંગ વધશે. ટૂંકા ગાળામાં રૂપિયો 89.50થી 89.00ના સ્તર સુધી મજબૂત થઈ શકે છે.
કોટક સિક્યોરિટીઝના કરન્સી રિસર્ચ હેડ અનિંદ્ય બેનર્જી કહે છે કે ટેરિફમાં ઘટાડાથી રૂપિયા માટે મજબૂતીના નવા રસ્તા ખુલ્યા છે, પરંતુ આ વધારાની ગતિ ભારતીય રિઝર્વ બેંક (RBI) કયા સ્તરે હસ્તક્ષેપ કરે છે તેના પર પણ આધાર રાખશે.
કરન્સીની કિંમત કેવી રીતે નક્કી થાય છે?
ડોલરની સરખામણીમાં કોઈ પણ કરન્સીની કિંમત ઘટે તેને કરન્સીનું ઘટવું અથવા ડેપ્રિસિયેશન કહેવામાં આવે છે. દરેક દેશ પાસે ફોરેન કરન્સી રિઝર્વ હોય છે, જેના આધારે આંતરરાષ્ટ્રીય વ્યવહારો થાય છે. ફોરેન રિઝર્વમાં વધારો થાય તો કરન્સી મજબૂત બને છે અને રિઝર્વ ઘટે તો કરન્સી નબળી પડે છે.
ભારતના ફોરેન રિઝર્વમાં ડોલરની ઉપલબ્ધતા સ્થિર રહેશે તો રૂપિયાની કિંમત પણ સ્થિર રહેશે. ડોલરની આવક વધશે તો રૂપિયો મજબૂત થશે અને ઘટશે તો રૂપિયો નબળો પડશે.
સંબંધિત સમાચાર
10 મહિનાની ખેંચતાણ માત્ર 72 મિનિટમાં ખતમ થઈ ગઈ છે. અમેરિકાએ ભારત પર લાગેલા 50% ટેરિફને ઘટાડીને 18% કર્યા બાદ ટ્રેડ સંબંધોમાં નવી શરૂઆત થઈ છે. ટ્રમ્પે કહ્યું કે ભારત હવે વેનેઝુએલાથી ઓઈલ ખરીદશે, જ્યારે વડાપ્રધાન નરેન્દ્ર મોદીએ આ નિર્ણય બદલ ‘Thank You’ કહીને સ્વાગત કર્યું છે.
આ ટ્રેડ ડીલને કારણે ભારતીય અર્થવ્યવસ્થા, શેરબજાર અને કરન્સી માર્કેટમાં આગામી સમયમાં વધુ હકારાત્મક અસર જોવા મળી શકે છે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
