અમદાવાદના EKA એરેનામાં ભારતે ઈરાનને 2-1થી હરાવીને ગ્રુપ Dની અંતિમ મુકાબલામાં શાનદાર અને ઐતિહાસિક જીત નોંધાવી. આ સાથે જ ભારતીય U17 ફૂટબોલ ટીમે AFC U17 એશિયન કપ 2026 માટે ક્વોલિફાય કર્યું છે. ભારતની આ ટુર્નામેન્ટમાં કુલ 10મી ઉપસ્થિતિ રહેશે.
ઈરાનને ક્વોલિફાય કરવા માટે માત્ર ડ્રોની જરૂર
મેચ પહેલા ઈરાન મજબૂત દાવેદાર હતું. તેની પાસે 7 પોઈન્ટ હતા અને ફક્ત એક ડ્રોથી તે ક્વોલિફાય થઈ જાય એમ હતું. બીજી તરફ, ભારત પાસે 4 પોઈન્ટ હતા અને ટુર્નામેન્ટમાં સ્થાન મેળવવા માટે તેને જીત સિવાય કોઈ વિકલ્પ નહોતો.
હાફ ટાઈમ સુધી 1-1: દલાલમુઆનનો મહત્વનો ગોલ
19મી મિનિટે ઈરાનના અમીરેઝા વેલીપુરે ગોલ કરીને ભારતને દબાણમાં મૂકી દીધો. પરંતુ હાફ ટાઈમ પહેલાં વધારાના સમય (45+1)માં મળેલી પેનલ્ટી પર દલાલમુઆન ગંગટેએ ગોલ કરીને સ્કોર 1-1 સમાન કરી દીધો અને ભારત મેચમાં પાછું આવ્યું.
બીજા હાફમાં ભારતનો ધમાકેદાર ખેલ
બીજા હાફની શરૂઆત સાથે જ ભારતીય ખેલાડીઓએ આક્રમક ગેમ રમી. 52મી મિનિટે ઈરાનના ડિફેન્ડરની ભૂલનો ફાયદો ઉઠાવતા ગુનલેબા વાંગખૈરાકપમે શાનદાર ગોલ કરીને ભારતને 2-1ની લીડ અપાવી.
ગોલકીપર રાજરૂપ સરકાર બન્યા હીરો
મેચના અંતિમ 30 મિનિટમાં ઈરાન સતત એટેક કરતા રહ્યું—ફ્રી-કિક, ક્રોસ અને લાંબા પાસથી ગોલ કરવાનો પ્રયાસ કર્યો. પરંતુ ભારતીય ગોલકીપર રાજરૂપ સરકાર અનેક મહત્વના સેવ કરીને ટીમને લીડ જાળવવામાં મદદ કરી. ડિફેન્સે પણ દીવાલ બનીને પ્રતિસ્પર્ધીને રોક્યો.
અંતિમ મિનિટોમાં ભારે દબાણ છતાં ભારત ટક્યું
ઈરાને અંતિમ મિનિટોમાં દબાણ વધાર્યું, પરંતુ ભારતીય ખેલાડીઓ સંયમિત રહીને રમ્યા અને મેચને સારી રીતે મેનેજ કરી. અંતિમ સીટી વાગતા જ ભારતનો ઐતિહાસિક વિજય નોંધાયો.
આ જીત ટીમવર્ક, હિંમત અને વિશ્વાસનું પ્રતિક
આ જીત માત્ર ક્વોલિફિકેશન નથી, પરંતુ ભારતીય ફૂટબોલના નવા આત્મવિશ્વાસનો પુરાવો છે. દબાણની સ્થિતિમાં કમબેક કરતું ભારત હવે એશિયન કપ 2026માં 10મી વખત રમશે.
તમામ લેટેસ્ટ ન્યૂઝના અપડેટ્સ સીધા તમારા મોબાઈલ પર મેળવવા માટે, નીચે આપેલા બટન પર ક્લિક કરીને અમારા વોટ્સએપ ગ્રુપમાં જોડાઓ.
Join WhatsApp Group
