મોંઘવારી વચ્ચે વાલીઓને મોટી રાહત: ગુજરાતમાં પાઠ્યપુસ્તકોના ભાવમાં નહીં થાય વધારો, સરકારે લીધો મહત્વનો નિર્ણય

અમદાવાદ: વૈશ્વિક સ્તરે વધી રહેલી મોંઘવારી અને ઇરાન-ઈઝરાયલ તથા અમેરિકા વચ્ચેના તણાવની અસર પેટ્રોલ, ડીઝલ અને ગેસ સહિત અનેક આયાતી ચીજવસ્તુઓના ભાવ પર જોવા મળી રહી છે. આવી સ્થિતિમાં ગુજરાત સરકારે વિદ્યાર્થીઓ અને વાલીઓ માટે મોટી રાહત આપતા રાજ્યના પાઠ્યપુસ્તકોના ભાવમાં કોઈ વધારો નહીં કરવાનો મહત્વપૂર્ણ નિર્ણય લીધો છે.

ગુજરાત રાજ્ય પાઠ્યપુસ્તક મંડળના ચેરમેન મનુભાઈ પાવરાએ જણાવ્યું કે કાગળ સહિતના રો-મટિરિયલના ભાવમાં નોંધપાત્ર વધારો થયો હોવા છતાં સરકાર વાલીઓ પર વધારાનો આર્થિક બોજ ન પડે તે માટે પાઠ્યપુસ્તકો જૂના જ ભાવે ઉપલબ્ધ કરાવશે.

જૂના ભાવે જ મળશે બોર્ડના પુસ્તકો

મનુભાઈ પાવરાના જણાવ્યા અનુસાર, પાઠ્યપુસ્તકોના ઉત્પાદનમાં ઉપયોગમાં લેવાતા કાગળનો મોટો હિસ્સો વિદેશમાંથી આયાત થાય છે. આંતરરાષ્ટ્રીય બજારમાં કાગળના ભાવ વધતાં પુસ્તકોના ઉત્પાદન ખર્ચમાં વધારો થયો છે. તેમ છતાં રાજ્ય સરકારે પુસ્તકોના ભાવ સ્થિર રાખવાનો નિર્ણય લીધો છે.

તેમણે વધુમાં જણાવ્યું કે વિદ્યાર્થીઓને સમયસર પુસ્તકો મળી રહે તે માટે બોર્ડ દ્વારા તડામાર કામગીરી કરવામાં આવી રહી છે. જોકે હાલની પરિસ્થિતિને કારણે વિતરણ પ્રક્રિયામાં થોડો વિલંબ થવાની શક્યતા નકારી શકાય નહીં. તેમ છતાં તમામ પુસ્તકો ઓનલાઈન ઉપલબ્ધ રહેશે, જેથી વિદ્યાર્થીઓના અભ્યાસને અસર ન થાય.

કાચા માલ અને ટ્રાન્સપોર્ટેશન ખર્ચમાં વધારો

વિશ્વભરમાં વધી રહેલા કાચા માલના ભાવ અને ઈંધણના ખર્ચમાં વધારાની સીધી અસર પ્રકાશન ઉદ્યોગ પર પડી છે. પાઠ્યપુસ્તકો અને નોટબુક્સ બનાવવા માટે જરૂરી કાગળના ભાવમાં આંતરરાષ્ટ્રીય સ્તરે નોંધપાત્ર વધારો નોંધાયો છે.

આ ઉપરાંત, વિદેશથી આવતી સામગ્રીના વધેલા દર અને મોંઘા ટ્રાન્સપોર્ટેશન ખર્ચને કારણે પ્રકાશકોનો ખર્ચ પણ વધી ગયો છે. સામાન્ય રીતે આવી સ્થિતિમાં પુસ્તકોના ભાવમાં વધારો થવાની સંભાવના રહેતી હોય છે, પરંતુ ગુજરાત સરકારે આ વર્ષે ભાવ વધારો ન કરવાનો નિર્ણય કરીને વાલીઓને રાહત આપી છે.

ખાનગી પ્રકાશનોની પુસ્તકો થઈ મોંઘી

જ્યાં એક તરફ સરકારી પાઠ્યપુસ્તકોના ભાવ સ્થિર રાખવામાં આવ્યા છે, ત્યાં બીજી તરફ ખાનગી પ્રકાશકો દ્વારા પ્રકાશિત થતી ગાઈડ, રેફરન્સ બુક્સ અને સ્પર્ધાત્મક પરીક્ષાની તૈયારી માટેના પુસ્તકોના ભાવમાં 20થી 25 ટકા સુધીનો વધારો કરવામાં આવ્યો છે.

પ્રકાશન ક્ષેત્રના નિષ્ણાતોના જણાવ્યા અનુસાર, વધતા ઉત્પાદન ખર્ચ અને કાગળના ભાવને કારણે ખાનગી પ્રકાશકો માટે જૂના દરે પુસ્તકો વેચવા મુશ્કેલ બન્યું છે.

નોટબુક અને સ્ટેશનરી પણ મોંઘી

માત્ર પાઠ્યપુસ્તકો જ નહીં, પરંતુ વિદ્યાર્થીઓ માટે જરૂરી નોટબુક્સ, ફૂલસ્કેપ બુક, પેન, પેન્સિલ અને અન્ય સ્ટેશનરી વસ્તુઓના ભાવમાં પણ 15થી 20 ટકા સુધીનો વધારો નોંધાયો છે.

વાલીઓનું કહેવું છે કે શૈક્ષણિક ખર્ચ સતત વધી રહ્યો છે, ત્યારે રાજ્ય સરકાર દ્વારા પાઠ્યપુસ્તકોના ભાવ સ્થિર રાખવાનો નિર્ણય ચોક્કસપણે રાહત આપનારો સાબિત થશે.

નવા શૈક્ષણિક સત્ર પહેલા સરકારની રાહત

નવા શૈક્ષણિક સત્રની શરૂઆત પહેલાં લેવાયેલા આ નિર્ણયને વાલીઓ અને વિદ્યાર્થીઓ માટે મહત્વપૂર્ણ ગણવામાં આવી રહ્યો છે. શિક્ષણ ક્ષેત્રે વધતા ખર્ચ વચ્ચે સરકારના આ પગલાથી લાખો પરિવારોને સીધો ફાયદો મળશે અને શૈક્ષણિક ખર્ચમાં થતો વધારાનો બોજ થોડો હળવો બનશે.

રાજ્ય સરકારનું માનવું છે કે શિક્ષણ દરેક વિદ્યાર્થી માટે સુલભ રહે તે માટે જરૂરી છે કે પાઠ્યપુસ્તકો જેવી મૂળભૂત જરૂરિયાતો વાજબી દરે ઉપલબ્ધ રહે, અને આ નિર્ણય પણ તે જ દિશામાં એક મહત્વપૂર્ણ પગલું છે.