ગળાં કાપતી 43 હજાર ચાઇનીઝ દોરીની રીલ ઝડપાઈ: દાદરા–નગર હવેલીની ફેક્ટરી પર અમદાવાદ પોલીસનો દરોડો

ઉત્તરાયણ પહેલાં અમદાવાદ પોલીસનો મોટો પ્રહાર: દાદરા–નગર હવેલીની ચાઈનીઝ દોરી ફેક્ટરી ઝડપાઈ, 43,000 રીલ સહિત 2.34 કરોડનો મુદ્દામાલ જપ્ત

ઉત્તરાયણ નજીક આવતાં જ પ્રતિબંધિત ચાઈનીઝ દોરીનું ચોરીછુપી વેચાણ શરૂ થઈ ગયું છે. જોકે અમદાવાદ ગ્રામ્ય પોલીસે સખત કાર્યવાહી કરીને ચાઈનીઝ દોરીના નેટવર્કનો પર્દાફાશ કર્યો છે. સાણંદ પોલીસ સ્ટેશન હદ વિસ્તારમાંથી સાડાસાત લાખ રૂપિયાની ચાઈનીઝ દોરી ઝડપાયા બાદ તપાસ આગળ વધારતાં પોલીસ સીધી દાદરા અને નગર-હવેલીની ફેક્ટરી સુધી પહોંચી હતી.

સાણંદમાંથી દોરી ઝડપાયા બાદ ફેક્ટરી સુધી પહોંચેલી તપાસ
અમદાવાદ ગ્રામ્ય એસઓજી દ્વારા સાણંદના રણમલ ગામની સીમમાં આવેલ અમૃત રબારીના ફાર્મ હાઉસની ઓરડીમાંથી 7.48 લાખ રૂપિયાની પ્રતિબંધિત ચાઈનીઝ દોરી કબજે કરવામાં આવી હતી. આ કેસમાં ભીખા રાણા, રાજુ રાણા, અશોક ઠાકોર અને ભરત ગંગાવાણીની ધરપકડ કરાઈ હતી. પૂછપરછ દરમિયાન દોરીનો જથ્થો દાદરા અને નગર-હવેલીમાંથી વિરેન પટેલે મોકલ્યો હોવાનું ખુલ્યું હતું.

દાદરા–નગર હવેલીમાં ફેક્ટરી પર દરોડો
માહિતીના આધારે અમદાવાદ ગ્રામ્ય પોલીસની ટીમ દાદરા અને નગર-હવેલી પહોંચી હતી. સ્થાનિક પોલીસની મદદથી વંદના ઇન્ડસ્ટ્રીઝ નામની ફેક્ટરી પર દરોડો પાડવામાં આવ્યો, જ્યાં ચાઈનીઝ દોરી બનાવતી ફેક્ટરી ઝડપાઈ. અહીંથી તૈયાર દોરીનો અંદાજે 1.50 કરોડ રૂપિયાનો જથ્થો, દોરી બનાવવા માટેની મશીનરી અને રો-મટિરિયલ સહિત કુલ 2.34 કરોડ રૂપિયાનો મુદ્દામાલ જપ્ત કરી ફેક્ટરી સીલ કરવામાં આવી.

43,000 રીલ મળીઃ ડીવાયએસપી પ્રકાશ પ્રજાપતિ
ડેપ્યુટી એસપી પ્રકાશ પ્રજાપતિએ જણાવ્યું કે ગ્રામ્ય પોલીસે ‘ઓપરેશન દોરી’ હેઠળ અલગ અલગ ટીમો બનાવી કાર્યવાહી હાથ ધરી હતી. સાણંદમાં દોરી ઝડપાયા બાદ ચાર દિવસ સુધી દાદરા–નગર હવેલીની ફેક્ટરીની રેકી કરવામાં આવી હતી. બાદમાં સ્થાનિક પોલીસ સાથે મળીને રેડ કરી 43,000 ચાઈનીઝ દોરીની રીલ મળી આવી હતી. ફેક્ટરી વિરેન પટેલ અને તેનો સાગરિત જાવેદ મિર્ઝા ચલાવતા હોવાનું સામે આવ્યું છે.

15 આરોપીઓનો પર્દાફાશ, 6 કેસ નોંધાયા
આ ઓપરેશન હેઠળ અત્યાર સુધીમાં કુલ 15 આરોપીઓનો પર્દાફાશ કરવામાં આવ્યો છે અને 6 અલગ અલગ કેસ નોંધાયા છે. તપાસમાં ખુલ્યું છે કે ફેક્ટરીમાંથી મોટા ભાગની ચાઈનીઝ દોરી ઉત્તર ગુજરાત અને દક્ષિણ ગુજરાતમાં સપ્લાય થતી હતી. પોલીસે વધુ તપાસ શરૂ કરી છે.