GPSC પ્રીલિમ 2026નું ટાઇમટેબલ જાહેર: ફેબ્રુઆરીથી એપ્રિલ સુધી તબક્કાવાર પરીક્ષા

ગુજરાતમાં સરકારી નોકરીનું સ્વપ્ન જોઈ રહેલા હજારો ઉમેદવારો માટે રાહતના સમાચાર સામે આવ્યા છે. ગુજરાત જાહેર સેવા આયોગ (GPSC) દ્વારા વર્ષ 2026 દરમિયાન યોજાનારી વિવિધ ક્લાસ-1 અને ક્લાસ-2 સંવર્ગની પ્રાથમિક પરીક્ષાઓની તારીખો જાહેર કરી દેવામાં આવી છે. લાંબા સમયથી પરીક્ષાની તારીખોની રાહ જોઈ રહેલા ઉમેદવારો માટે આ જાહેરાત અત્યંત મહત્વપૂર્ણ માનવામાં આવી રહી છે.

GPSC દ્વારા જાહેર કરાયેલા શેડ્યૂલ મુજબ, કુલ 18 અલગ-અલગ સંવર્ગોની પ્રીલિમ પરીક્ષા ફેબ્રુઆરી, માર્ચ અને એપ્રિલ 2026 દરમિયાન તબક્કાવાર યોજાશે. આ પરીક્ષાઓમાં વહીવટી, ટેક્નિકલ, શિક્ષણ તથા વિશેષ સેવાઓના પદોનો સમાવેશ થાય છે. તારીખો જાહેર થતાં જ પરીક્ષાની તૈયારીમાં લાગેલા ઉમેદવારોમાં ઉત્સાહ અને નવી ઉર્જા જોવા મળી રહી છે.

આ પદો માટે થશે પ્રીલિમ પરીક્ષા

આયોગ દ્વારા જાહેર કરાયેલા સમયપત્રક અનુસાર વહીવટી અને સચિવાલય સેવાઓમાં રહસ્ય સચિવ (ક્લાસ-2), મદદનીશ વહીવટી અધિકારી (ક્લાસ-2) સહિતના પદો માટે પ્રાથમિક કસોટી લેવામાં આવશે.

ટેક્નિકલ અને વિશેષ સેવાઓ હેઠળ MIS મેનેજર (ક્લાસ-1 અને 2), પશુચિકિત્સા અધિકારી (ક્લાસ-2), મુખ્ય વૈજ્ઞાનિક અધિકારી જેવા મહત્વપૂર્ણ પદો માટે પણ પરીક્ષા યોજાશે.

શિક્ષણ અને અન્ય સેવાઓમાં ગુજરાત શિક્ષણ સેવા, નિયામક ગ્રંથપાલ, નાયબ માહિતી નિયામક તથા મદદનીશ ઉદ્યોગ કમિશનર માટે પણ પ્રીલિમ પરીક્ષા લેવામાં આવશે. આ ઉપરાંત ગુજરાત મત્સ્યોદ્યોગ સેવા અને સામાન્ય રાજ્ય સેવામાં વહીવટી અધિકારી (ક્લાસ-2) માટેની પરીક્ષાઓ પણ આ જ સમયગાળા દરમિયાન યોજાશે.

ભરતી કેલેન્ડર જાન્યુઆરીના અંતે જાહેર થશે

GPSCના ચેરમેન દ્વારા સોશિયલ મીડિયા માધ્યમથી માહિતી આપતાં જણાવ્યું હતું કે વિવિધ વિભાગો સાથે પરામર્શની પ્રક્રિયા હાલ ચાલી રહી છે. આ પ્રક્રિયા પૂર્ણ થયા બાદ વર્ષ 2026 માટેનું સંપૂર્ણ ભરતી કેલેન્ડર જાન્યુઆરી મહિનાના અંત સુધીમાં જાહેર કરવામાં આવશે.

આયોગે ઉમેદવારોને સલાહ આપી છે કે પરીક્ષા કેન્દ્ર, સમય, એડમિટ કાર્ડ અને અન્ય વિગતવાર સૂચનાઓ માટે GPSCની સત્તાવાર વેબસાઇટ પર નિયમિત રીતે અપડેટ્સ ચકાસતા રહે.

તારીખોની જાહેરાત થયા બાદ હવે ઉમેદવારો પોતાની તૈયારીને અંતિમ તબક્કે લઈ જઈ રહ્યા છે. GPSC 2026ની પરીક્ષાઓ રાજ્યમાં સરકારી નોકરીની ઈચ્છા ધરાવતા યુવાનો માટે મહત્વપૂર્ણ તક બની રહેશે.