રોહિત શેટ્ટીની ‘ગોલમાલ 5’માં મોટો ટ્વિસ્ટ: અક્ષય કુમાર વિલન બની કરશે એન્ટ્રી, અજય દેવગણ સાથે થશે જબરદસ્ત ટક્કર

બોલિવૂડની સૌથી લોકપ્રિય અને સફળ કોમેડી ફ્રેન્ચાઇઝી ‘ગોલમાલ’ હવે તેની પાંચમી કડી સાથે ફરી એકવાર દર્શકોને હસાવવા તૈયાર છે. પરંતુ આ વખતે માત્ર હાસ્ય નહીં, એક મોટો સરપ્રાઇઝ પણ ફિલ્મમાં જોવા મળશે. તાજા અહેવાલો અનુસાર, અક્ષય કુમાર ‘ગોલમાલ 5’માં મુખ્ય વિલન તરીકે એન્ટ્રી કરશે, જે અજય દેવગણ અને તેની ટીમ સામે સ્ક્રીન પર સીધી ટક્કર લેતા જોવા મળશે.

અજય દેવગણ સાથે જૂની ટીમની વાપસી

‘ગોલમાલ 5’માં અજય દેવગણ ફરી એકવાર આ ફ્રેન્ચાઇઝીના મુખ્ય પાત્ર અજય તરીકે જોવા મળશે. તેમની સાથે ફેન્સની મનપસંદ ટીમ પણ પરત ફરી રહી છે, જેમાં અરશદ વારસી, તુષાર કપૂર, કુણાલ ખેમુ અને શ્રેયસ તલપડેનો સમાવેશ થાય છે.

આ ઉપરાંત જોની લીવર, સંજય મિશ્રા, મુકેશ તિવારી અને અશ્વિની કલસેકર જેવા અનુભવી કલાકારો પણ ફિલ્મમાં મહત્વની ભૂમિકામાં નજરે પડશે. રિપોર્ટ્સ મુજબ શર્મન જોશી પણ ફરી જોડાઈ શકે છે, જ્યારે કરીના કપૂર ખાનની હાજરી અંગે હજુ સુધી અંતિમ નિર્ણય લેવાયો નથી.

વિલન અક્ષય કુમાર: ફ્રેન્ચાઇઝીમાં મોટો બદલાવ

‘ગોલમાલ’ સિરીઝ અત્યાર સુધી હળવા-ફુલકા કોમેડી અને સ્લેપસ્ટિક હ્યુમર માટે જાણીતી રહી છે. પરંતુ ‘ગોલમાલ 5’માં અક્ષય કુમારને નેગેટિવ રોલમાં રજૂ કરવાનો નિર્ણય ફ્રેન્ચાઇઝી માટે મોટો બદલાવ માનવામાં આવી રહ્યો છે.

વેરાયટી ઇન્ડિયાના રિપોર્ટ અનુસાર, આ વખતે ફિલ્મમાં પરંપરાગત કોમેડી સાથે ફેન્ટસી એલિમેન્ટ્સ પણ ઉમેરવામાં આવશે, જેથી ફિલ્મને પહેલા કરતાં વધુ ગ્રાન્ડ અને એન્ટરટેનિંગ બનાવવામાં આવે.

શૂટિંગ અને રિલીઝ ટાઇમલાઇન

ફિલ્મનું શૂટિંગ ફેબ્રુઆરીના અંતમાં મુંબઈના ફિલ્મ સિટીમાં શરૂ થવાની શક્યતા છે. મેકર્સનું લક્ષ્ય ફિલ્મને 2027ની શરૂઆતમાં સિનેમાઘરોમાં રિલીઝ કરવાનો છે.

‘ગોલમાલ’ ફ્રેન્ચાઇઝીને 20 વર્ષ

આ પાંચમો ભાગ ખાસ એટલા માટે પણ મહત્વનો છે કે ‘ગોલમાલ’ ફ્રેન્ચાઇઝીના 20 વર્ષ પૂર્ણ થઈ રહ્યા છે. પહેલી ફિલ્મ 2006માં રિલીઝ થઈ હતી અને ત્યારથી આ સિરીઝે બોક્સ ઓફિસ પર સતત સફળતા મેળવી છે.

અક્ષય–અજયની જૂની જુગલબંધી, હવે સામસામે

અક્ષય કુમાર અને અજય દેવગણ અગાઉ ‘સુહાગ’, ‘ખાકી’, ‘ઇન્સાન’, ‘સૂર્યવંશી’ અને ‘સિંઘમ અગેઇન’ જેવી ફિલ્મોમાં સાથે કામ કરી ચૂક્યા છે. પરંતુ ‘ગોલમાલ 5’માં બંનેનો સામ-સામે ક્લેશ પહેલીવાર જોવા મળશે, જે દર્શકો માટે એકદમ નવું અને રોમાંચક અનુભવ બનશે.

હવે જોવું રહ્યું કે કોમેડી અને વિલનગિરીનું આ નવું કોમ્બિનેશન બોક્સ ઓફિસ પર કેટલો ધમાકો કરે છે.